ខេត្តកំពង់ស្ពឺ៖ ឡបូជាសពដ៏ទំនើបសម្រាប់បូជាសពរបស់អ្នកស្លាប់ដោយសារជំងឺកូវីដ១៩ បានដឹកទៅដល់សាលាស្រុកឱរាល់ ហើយត្រៀមនឹងដឹកទៅកាន់ឈាបនដ្ឋាន ស្ថិតក្នុងឃុំតាសាល ស្រុកឱរ៉ាល់។
សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី៩ ខែមីនា ឆ្នាំ២០២១ បានណែនាំអំពីវិធានការរៀបចំសាងសង់នូវឈាបនដ្ឋាន សម្រាប់បូជាសពរបស់អ្នកស្លាប់ ដោយសារកូវីដ-១៩ដល់អាជ្ញាធររាជធានី-ខេត្តទាំងអស់។ ដោយអនុវត្តតាមប្រសាសន៍ដ៏ខ្ពង់ខ្ពស់របស់សម្តេចតេជោ ទើបមានការបញ្ជាទិញឡស្វ័យប្រវត្តិដ៏ទំនើប សម្រាប់បូជាសពរបស់អ្នកស្លាប់ ដោយសារជំងឺកូវីដ-១៩។
ឡបូជាសពដ៏ទំនើបនេះ បានដឹកមកដល់សាលាស្រុកឱរ៉ាល់ ខេត្តកំពង់ស្ពឺ ហើយត្រៀមរៀបចំដឹកបន្តទៅកាន់ទីតាំងឈាបនដ្ឋានបូជាសព។ រីឯទីតាំងឈាបនដ្ឋាននេះ មានផ្ទៃដីប្រមាណ១០ហិកតា ត្រូវបានរៀបចំឡើង ដោយសាលារាជធានីភ្នំពេញ ហើយមានទីតាំងស្ថិតក្នុងឃុំតាសាល ស្រុកឱរ៉ាល់ ខេត្តកំពង់ស្ពឺ៕
