រាជធានីភ្នំពេញ៖ នាថ្ងៃទី០៧ ខែមេសា ឆ្នាំ២០២១ សមាគមគ្រឹះស្ថានមីក្រូហិរញ្ញវត្ថុកម្ពុជា បានប្រកាសសម្រេចឲ្យអ្នកកើតកូវីដ១៩ និងអ្នកចត្តាឡីស័ក នឹងទទួលបានការអនុគ្រោះសងបំណុលពីធនាគារ និងមីក្រូហិរញ្ញវត្ថុ។
យោងតាមសេចក្ដីថ្លែងការណ៍រួមរវាងសមាគមមីក្រូហិរញ្ញវត្ថុ និងសមាគមធនាគារនៅកម្ពុជា បានសម្រេចផ្ដល់ការអនុគ្រោះចំពោះអ្នកកើតកូវីដ១៩ និង អ្នកតម្រូវធ្វើចត្តាឡីស័កដោយ ៖
១. សម្រាប់អតិថិជនដែលឆ្លងជំងឺកូវីដ-១៩៖ លើកលែងការបង់ការប្រាក់ និងរាល់ការផាកពិន័យទាំងអស់រយៈពេលយ៉ាងតិចមួយខែ ព្រមទាំងទទួលបានការរៀបចំឥណទានឡើងវិញដោយស្វ័យប្រវត្តិ (ប្រសិនបើអតិថិជនយល់ព្រម) រួមទាំងការពន្យារការបង់ប្រាក់ដើមរយៈពេលបីខែ។ រាល់អតិថិជនដែលឆ្លងជំងឺកូវីដ-១៩ ត្រូវបង្ហាញលទ្ធផលតេស្តវិជ្ជមានកូវីដ-១៩ ចេញដោយអាជ្ញាធរមានសមត្ថកិច្ច។
២. សម្រាប់អតិថិជនដែលជាប់ធ្វើចត្តាឡីស័ក៖ ផ្តល់ការរៀបចំឥណទានឡើងវិញដោយស្វ័យប្រវត្តិ (ប្រសិនបើអតិថិជនយល់ព្រម) រួមទាំងពន្យារការបង់ទាំងប្រាក់ដើម និងការប្រាក់រយៈពេល មួយខែ និងលើកលែងរាល់ការផាកពិន័យទាំងអស់។
គួរជម្រាបផងដែរថា កន្លងមកគ្រឹះស្ថានមីក្រូហិរញ្ញវត្ថុកម្ពុជា បានឲ្យដឹងថាសមាគម មិនបានឈរអោបដៃមើលទេ នៅពេលដែលឃើញអតិថិជនរងផលប៉ះពាល់ដោយសារវិបត្តិនៃជំងឺកូវីដ-១៩។ ការឆ្លើយតបនេះ ធ្វើឡើងក្រោយអង្គការសង្គមស៊ីវិលជាង១០០ បានចេញសេចក្តីថ្លែងការណ៍រួមមួយ នៅថ្ងៃចន្ទនេះ ដោយស្នើសុំទៅរដ្ឋាភិបាល ដាក់ចេញនូវវិធានការណែនាំដល់គ្រឹះស្ថានមីក្រូហិរញ្ញវត្ថុ និងធនាគារទាំងអស់នៅកម្ពុជា ដើម្បីផ្អាកការបង់ប្រាក់កម្ចី និងការប្រាក់បង្គរទាំងអស់ សម្រាប់រយៈពេលយ៉ាងតិច ៣ខែ។
លោក កាំង តុងងី បញ្ជាក់ថាគ្រឹះស្ថានមីក្រូហិរញ្ញវត្ថុ បានរៀបចំឥណទានឡើងវិញដល់អតិថិជនប្រមាណជា៣០ម៉ឺនគ្រួសារ ដោយមានទឹកប្រាក់ជាង ១ ៤០០លានដុល្លារ។ លោកថាអំឡុងពេលនៃវិបត្តិកូវីដ-១៩នេះ មិនមានសមាជិកសមាគមគ្រឹះស្ថានមីក្រូហិរញ្ញវត្ថុណាមួយរឹបអូសទ្រព្យបញ្ចាំរបស់អតិថិជន ឬប្តឹងអតិថិជនឡើងតុលាការឡើយ ៕
