ខេត្តបាត់ដំបង៖ ដោយសារតែមានការភ័យខ្លាចពីការឆ្លងរីករាលដាល នៃកូវីដ១៩ ចូលទៅក្នុងសហគមន៍ នៅក្នុងខេត្តបាត់ដំបងនោះ មន្ទីរទេសចរណ៍ខេត្ត បានសម្រេចបិទរមណីយដ្ឋាននានា នៅក្នុងខេត្ត ជាបណ្ដោះអាសន្នមួយរយៈពេលសិន។
មន្ទីរទេសចរណ៍ខេត្តបាត់ដំបង នៅថ្ងៃទី៨ ខែមេសា ឆ្នាំ២០២១ បានសម្រេចផ្អាកដំណើរការរមណីយដ្ឋាននានា ជិត៣០កន្លែង នៅក្នុងខេត្ត ដើម្បីចូលរួមស្កាត់ការឆ្លងការរីករាលដាលនូវជំងឺកូវីដ-១៩ ចូលក្នុងសហគមន៍។ គោលដៅទេសចរណ៍ ទាំងធំ ទាំងតូច ជាច្រើន នៅក្នុងខេត្តបាត់ដំបង ត្រូវផ្អាកដំណើរការទាំងស្រុង ជាបណ្តោះអាសន្ន ពិសេស នៅក្នុងអំឡុងបុណ្យចូលឆ្នាំប្រពៃណីខ្មែរ ដែលឈានចូលមកដល់ នាពេលខាងមុខនេះ។
មន្ទីរទេសចរណ៍ខេត្តបាត់ដំបង បានបញ្ជាក់ថា មន្ទីរទេសចរណ៍ខេត្តបាត់ដំបង បានជូនដំណឹងរម្លឹកបន្ថែមទៅដល់បណ្តាម្ចាស់រមណីយដ្ឋាន សហគមន៍ទេសចរណ៍ និងកន្លែងមានសក្តានុពល ទេសចរណ៍ បានជ្រាបស្រេចបាច់ហើយ ដើម្បីចូលរួមពីគ្រប់ភាគី ទាំងវិស័យឯកជន និងរដ្ឋ គោរព ឬអនុវត្តតាមឲ្យមានប្រសិទ្ធភាព ក្នុងស្មារតីទទួលខុសត្រូវខ្ពស់ សំដៅទប់ស្កាត់ការឆ្លងរីករាលដាលនូវជំងឺកូវីដ-១៩ ចូលក្នុងសហគមន៍។
រមណីយដ្ឋាន និងគោលដៅទេសចរណ៍សំខាន់ៗ ប្រកបដោយសក្តានុពល នៅលើទឹកដីខេត្តបាត់ដំបង នាពេលបច្ចុប្បន្ន រួមមាន រមណីយដ្ឋានប្រាសាទបាណន់, រមណីយដ្ឋានភ្នំសំពៅ, ទស្សនាហ្វូងសត្វប្រចៀវ ល្អាងភ្នំភ្នំពៅ, រមណីយដ្ឋានប្រាសាទឯកភ្នំ, អាងទឹកកំពីងពួយ, រមណីយដ្ឋានស្ទឹងថ្មដា រមណីយដ្ឋានទឹកធ្លាក់ ៥៣ ក្នុងស្រុកភ្នំព្រឹក, រមណីយដ្ឋាននគរជុំភ្នំព្រឹក, ភ្នំកំពូល, វត្តល្អាងកង្កែប, វត្តនាងរំសាយសក់, វត្តភ្នំជីហង្ស, រមណីយដ្ឋានវត្តភ្នំចំបាំង និងសហគមន៍អេកូទេសចរណ៍ទឹកធ្លាក់អូរជាំល្អាងភ្នំប្រាំពីរជាដើម។
ដោយសារតែវិធានការទប់ស្កាត់ជំងឺកុវីដនេះ គឺគោលដៅទេសចរណ៍ ទាំងធំ និងតូចជាច្រើននៅក្នុងខេត្តបាត់ដំបង ត្រូវផ្អាកដំណើរការទាំងស្រុង ដោយធ្វើឡើងស្របគ្នាជាមួយនឹងប្រមុខរាជរដ្ឋាភិបាល កាលពីថ្មីៗកន្លងមកនេះ បានចេញសេចក្តីជូនដំណឹង ស្តីពីការមិនអនុញ្ញាតឲ្យធ្វើមានដំណើរឆ្លងកាត់ចេញ ចូលពីខេត្តមួយ ទៅខេត្តមួយ ជាបណ្តោះអាសន្ន ក្នុងរង្វង់រយ:ពេល១៤ ថ្ងៃ ចាប់ពីថ្ងៃទី ៧ រហូតដល់ថ្ងៃទី១៤ ខែមេសា ឆ្នាំ ២០២១៕
