មីយ៉ាន់ម៉ា៖ មានសេចក្ដីរាយការណ៍មកថា Paing Takhon តារាម៉ូដែលដែលខ្នះខ្នែងខ្លាំងក្នុងការទាមទារសិទ្ធិ និងយុត្តិធម៌ពីក្រុមយោធាភូមា ត្រូវបានគេចាប់ខ្លួនហើយនៅព្រឹកម៉ោង ៥ ថ្ងៃនេះក្នុងផ្ទះរបស់លោកដែលស្ថិតនៅ North Dagon។
ជាមួយគ្នានេះដែរនាថ្ងៃទី០៨ ខែមេសា ឆ្នាំ២០២១ បងស្រីរបស់តារាបង្ហាញម៉ូត Paing Takhon បានផុសលើ Facebook ខ្លួនថា នៅម៉ោង៥ ព្រឹកនេះ ប្អូនប្រុសរបស់ខ្លួនត្រូវបានទាហានភូមា នឹង ប៉ូលិសភូមាបុកចូលចាប់ខ្លួននៅក្នុងផ្ទះ បន្ទាប់ពីមានដីកាចាប់ខ្លួនកាលពីយប់ម្សិលមិញ។
បងស្រីតារាបង្ហាញម៉ូតរូបនេះបញ្ជាក់ទៀតថា ទាហាននឹងប៉ូលីសភូមាមកច្រើននាក់ រួមជាមួយរថយន្ត៨គ្រឿង បានធ្វើដំណើរទៅផ្ទះប្អូនប្រុសគាត់ Paing Takhon ហើយបានសម្រុកចូលទៅចាប់ប្អូនប្រុសគាត់នៅព្រឹកព្រលឹមងងឹតនេះ នៅផ្ទះប្អូនគាត់ទីក្រុងយ៉ាំងហ្គោន ពេលនេះគាត់មិនអាចទាក់ទងប្អូនប្រុសបានមិនដឹងសុខទុក្ខយ៉ាងណានោះទេ គ្រួសារបារម្ភខ្លាំង.
អ្នកប្រើបណ្ដាញសង្គមជាច្រើននាក់ ក្នុងនោះរួមមានអ្នកចាត់ការទូទៅរបស់ Paing Takhon ផងបាននាំគ្នាបង្ហោះជាបន្តបន្ទាប់ពីករណីចាប់ខ្លួនរបស់តារាប្រុសរូបនេះ ហើយក៏បានបញ្ជាក់ថាលោកបានធ្លាក់ខ្លួនឈឺប៉ុន្មានថ្ងៃហើយ ហើយក៏ត្រូវជួបរឿងបែបនេះទៀត ឯខាងក្រុមគ្រួសារក៏កំពុងទាមទារ និងស្នើសុំយ៉ាងទទូចទៅកាន់យោធា ឲ្យមេត្តាដោះលែង Paing Takhon មកវិញ ដើម្បីព្យាបាលជំងឺ។
យ៉ាងណាទាក់ទងនឹងព័ត៌មានចាប់ខ្លួនតារាៗបានផ្ទុះឡើងច្រើនថ្ងៃមកហើយ ឯប្រតិបត្តិការចាប់ខ្លួនក៏ត្រូវបានធ្វើឡើងជាបន្តបន្ទាប់ចំពោះតារាលើសពី ៥០នាក់ទៅទៀត ក្នុងនោះមានតាំងពីតារាសម្ដែង អ្នកដឹកនាំរឿង តារាចម្រៀង តារាម៉ូដែល -ល- ដែលពួកគេទាំងនេះសុទ្ធតែជាអ្នកដែលព្យាយាមប្រឆាំងតវ៉ានឹងរបបយោធាថ្មីរបស់ភូមា ៕