បរទេស៖ រដ្ឋបាលថ្មីរបស់សហរដ្ឋអាមរិក បានបង្កើនការចាក់វ៉ាក់សាំង បានជាង១៥០លានដូស ដោយប្រើក្នុងរយៈពេល៧៥ថ្ងៃ ហើយលោកប្រធានាធិបតី ចូ បៃដិន ប្រកាសឲ្យពលរដ្ឋអាមេរិកាំងពេញវ័យទាំងអស់ នឹងមានសិទ្ធិទទួលការចាក់វ៉ាក់សាំង បង្ការកូវីដ១៩ មិនលើសពីថ្ងៃទី១៩ ខែមេសា ឆ្នាំ២០២១។
លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានប្រកាស កាលពីថ្ងៃទី៦ ខែមេសា ឆ្នាំ២០២១ ថា ប្រជាពលរដ្ឋពេញវ័យទាំងអស់ រស់នៅលើទឹកដីសហរដ្ឋអាមេរិក នឹងមានសិទ្ធិចាក់វ៉ាក់សាំងបង្ការកូវីដ១៩ ក្នុងរយៈពេល២សប្ដាហ៍ ដែលពីមុន បានកំណត់ការបើកចំហ នៅថ្ងៃទី១៩ ខែឧសភា។ ក្រៅពីនេះ លោកប្រធានាធិបតី សង្ឃឹមថា វ៉ាក់សាំងបង្ការកូវីដ ១៩អាចនឹងនៅសល់ ដើម្បីជួយដល់ប្រទេសក្រីក្រ ដែលគ្មានលទ្ធភាពទិញវ៉ាក់សាំង នៅមុនដំណាច់រដូវក្តៅខាងមុខនេះ។
លោក ចូ បៃដិន ប្រធានាធិបតីសហរដ្ឋអាមេរិក បានប្រកាសថា មនុស្សគ្រប់គ្នា មានអាយុចាប់ពី១៨ឆ្នាំ ឬច្រើនជាងនេះ មានសិទ្ធិទទួលការចាក់វ៉ាក់សាំងបង្ការកូវីដ១៩គ្រប់គ្នា ហើយក៏មិនមានច្បាប់អ្វីច្របូកច្របល់ និងមិនមានការរឹតបន្ដឹងអ្វីទៀតដែរ។ លោកប្រធានាធិបតី បានប្រកាសបែបនេះ ចំពេលមានរលកទី៤ នៃកូវីដ១៩ កំពុងកើនឡើង នៅក្នុងប្រទេសមហាអំណាចមួយនេះ ដោយមានអ្នកឆ្លងច្រើន ក្នុងចំណោមយុវវ័យ។
ទោះជាយ៉ាងណា លោកប្រធានាធិបតី បៃដិន បានព្រមានថា៖ «យើងមិនទាន់ដល់ទីបញ្ចប់នៅឡើយ។ យើងនៅតែមានការងារជាច្រើនត្រូវធ្វើ។ យើងកំពុងស្ថិតក្នុងកិច្ចការពារ ឲ្យគេចផុតពីគ្រោះថ្នាក់ នៃវីរុសនេះ»។
សេតវិមាន បានឲ្យដឹងថា រហូតមកដល់ពេលនេះ រដ្ឋបាលអាមេរិក បានចាក់វ៉ាក់សាំងបង្ការកូវីដ១៩ ជូនដល់ប្រជាពលរដ្ឋ បានជាង១៥០លានដូស ដែលស្មើនឹងជិត១ភាគបី នៃពលរដ្ឋអាមេរិកាំងទាំងអស់ ហើយពលរដ្ឋពេញវ័យ ប្រហែល៤០ភាគរយ យ៉ាងហោចណាស់ ក៏ចាក់វ៉ាក់សាំងបាន១ដូស និងជិត១ភាគ៥ នៃពលរដ្ឋសរុប បានចាក់វ៉ាក់សាំងរួចរាល់ហើយ។
រដ្ឋបាលចំណីអាហារ (FDA) របស់អាមេរិក បានអនុម័តឲ្យប្រើប្រាស់វ៉ាក់សាំងបង្ការកូវីដ១៩ ចំនួន៣ប្រភេទ រួមមាន វ៉ាក់សាំងរបស់ក្រុមហ៊ុន Pfizer (ទទួលស្គាល់ដោយអង្គការសុខភាពពិភពលោក), វ៉ាក់សាំងរបស់ក្រុមហ៊ុន Moderna និងវ៉ាក់សាំងរបស់ក្រុមហ៊ុន Johnson &Johnson (ទទួលស្គាល់ ដោយអង្គការសុខភាពពិភពលោក ហើយវ៉ាក់សាំងនេះចាក់តែមួយដូស សម្រាប់មនុស្សម្នាក់)។ ដោយឡែក វ៉ាក់សាំងរបស់ក្រុមហ៊ុន Novavax របស់សហរដ្ឋអាមេរិកមួយទៀត នៅមិនទាន់បានទទួលស្គាល់ ដោយ FDA នៅឡើយ។
បើតាមគេហទំព័រ Worldometer បានផ្សាយ កាលពីវេលាម៉ោង៨ព្រឹក ថ្ងៃទី៨ ខែមេសា ឆ្នាំ២០២១ ថា សហរដ្ឋអាមេរិក មានអ្នកឆ្លងកូវីដ១៩ សរុបជាង ៣១,៥លាននាក់ ស្លាប់ជាង៥៧០ ០០០នាក់ និងមានអ្នកជាសះស្បើយ ជាង២៤,១លាននាក់៕
