បរទេស៖ ក្រុមហ៊ុនអភិវឌ្ឍវ៉ាក់សាំងបង្ការកូវីដដ៏ល្បីល្បាញរបស់អាមេរិក ដែលចាក់តែមួយដូសនូវវ៉ាក់សាំងបង្ការកូវីដ១៩ តែពេលនេះបានបំផ្លាញវ៉ាក់សាំងនោះ រហូតដល់១៥លានដូស។
សារព័ត៌មានរបស់រុស្ស៊ី RT បានផ្សាយ កាលពីថ្ងៃទី៣១ ខែមីនា ឆ្នាំ២០២១ ថា ក្រុមហ៊ុន Johnson & Jonhson ដែលអភិវឌ្ឍវ៉ាក់សាំងបង្ការកូវីដ១៩ ដោយចាក់តែមួយដូសនោះ បានខូចខាតវ៉ាក់សាំងបង្ការកូវីដ១៩ ចំនួន១៥លានដូស នៅក្នុងរោងចក្រ Baltimore ដោយសារការលាយសារធាតុផ្សំវ៉ាក់សាំងរបស់ក្រុមហ៊ុនផ្សេង។ ដូច្នេះក្រុមហ៊ុននេះ នឹងពន្យារពេលការចែកចាយ និងដឹកជញ្ជូន នៅក្នុងសហរដ្ឋអាមេរិក។
ក្រុមហ៊ុនផលិតវ៉ាក់សាំង Johnson & Johnson បានជួលក្រុមហ៊ុន Emergent BioSolutions ផលិតធាតុផ្សំវ៉ាក់សាំងបង្ការកូវីដ-១៩ នៅក្នុងរោងចក្រ Baltimore ។ ប៉ុន្តែបុគ្គលិក នៅក្នុងរោងចក្រ បានលាយច្រឡំនូវធាតុផ្សំវ៉ាក់សាំងរបស់ក្រុមហ៊ុនផ្សេង ព្រោះនៅក្នុងរោងចក្រនេះបានផលិតវ៉ាក់សាំង ចំនួន២ប្រភេទផ្សេងគ្នា។ ដូច្នេះវ៉ាក់សាំងដែលបានផលិត ចំនួន១៥លានដូស ត្រូវតែបំផ្លាញចោលទាំងអស់ ទើបនាំឲ្យរាំងស្ទះដល់ការប្រគល់វ៉ាក់សាំង Johnson & Johnson នេះ។
ដោយសារតែករណីនេះ ទើបនាយកដ្ឋានគ្រប់គ្រងចំណីអាហារ និងឱសថ FDA អាមេរិក បានសម្រេចផ្អាកការផ្តល់លិខិតអនុញ្ញាតដល់ក្រុមហ៊ុន Emergent BioSolutions ដើម្បីផលិតវ៉ាក់សាំង Johnson & Johnson ។ ប៉ុន្ដែទោះជាយ៉ាងណា ក្រុមហ៊ុន Johnson&Johnson នៅតែធ្វើការជាមួយក្រុមហ៊ុនEmergent BioSolutions និង FDA របស់អាមេរិក ដើម្បីដំណើរការវ៉ាក់សាំងនេះឡើងវិញ។
រហូតមកដល់ពេលនេះ សេតវិមានរបស់ប្រធានាធិបតីសហរដ្ឋអាមេរិក នៅមិនទាន់ប្រតិកម្ម អ្វីជុំវិញបញ្ហានេះនៅឡើយ។ វ៉ាក់សាំងបង្ការកូវីដ១៩របស់ក្រុមហ៊ុន Johnson & Johnson ត្រូវចាត់ទុក ជាអាវុធដ៏សំខាន់របស់រដ្ឋាភិបាល លោក ចូ បៃឌិន សម្រាប់ធ្វើសង្គ្រាមប្រយុទ្ធប្រឆាំងនឹងជំងឺកូវីដ-១៩ ដែលកំពុងតែរាតត្បាត នៅក្នុងសហរដ្ឋអាមេរិក និងពិភពលោក។ វ៉ាក់សាំងបង្ការកូវីដ១៩របស់ក្រុមហ៊ុន Johnson & Johnson មានលក្ខណៈពិសេសជាង ត្រង់ចាក់តែ១ដូសប៉ុណ្ណោះទៅលើមនុស្សម្នាក់ ខណៈវ៉ាក់សាំងផ្សេងចាក់ចំនួន២ដូស៕