បរទេស៖ ក្រោយពេលអង្គការសហប្រជាជាតិ បានព្រមានពីការបង្ហូរឈាម នៅក្នុងប្រទេសមីយ៉ាន់ម៉ា ក្រោយការបង្ក្រាបយ៉ាងព្រៃផ្សៃទៅលើប្រជាពលរដ្ឋ បណ្ដាលឲ្យមនុស្សជាង៥០០នាក់ស្លាប់នោះមក ក្រុមមេដឹកនាំរដ្ឋប្រហារយោធានៃប្រទេសនេះ បានប្រកាសពីបទឈប់បាញ់គ្នា ជាឯកតោភាគី។
សារព័ត៌មាន CNN របស់អាមេរិក បានផ្សាយ នៅថ្ងៃទី១ ខែមេសា ឆ្នាំ២០២១ ថា ក្រោយពេលក្រុមប្រឹក្សាសន្ដិសុខរបស់អង្គការសហប្រជាជាតិ កាលពីថ្ងៃទី៣១ ខែមីនា បានពិភាក្សាអំពីការធ្វើរដ្ឋប្រហារយោធា នៅក្នុងប្រទេសមីយ៉ាន់ម៉ា ឬភូមា បានធ្វើឲ្យរបបរយោធានេះ ប្រកាសពីបទឈប់បាញ់គ្នាជាមួយនឹងកងកម្លាំងបះបោរ នៅក្នុងប្រទេស ជាឯកតោភាគី។ ទោះជាយ៉ាងណា របបយោធាមីយ៉ាន់ម៉ា បានបញ្ជាក់ថា ខ្លួននឹងបន្ដឆ្លើយតប ចំពោះសកម្មភាពនានា ដែលរំខានដល់សន្ដិសុខ និងការគ្រប់គ្រងរបស់រដ្ឋាភិបាល។
បទឈប់បាញ់គ្នានេះ បានសំដៅទៅលើសកម្មភាពនានា ប្រឆាំងនឹងក្រុមចលនាប្រដាប់អាវុធរបស់ជនជាតិភាគតិចជាច្រើនក្រុម ដែលកំពុងតែប្រយុទ្ធកាន់តែខ្លាំងក្លាឡើង ចាប់តាំងពីពួកយោធាបានរឹបអូសអំណាចពីរដ្ឋាភិបាលស៊ីវិល នៅក្នុងអំពើរដ្ឋប្រហារ កាលពីថ្ងៃទី១ ខែកុម្ភៈ ឆ្នាំ២០២១។ នៅក្នុងសេចក្ដីថ្លែងការណ៍មួយ ចាក់ផ្សាយតាមទូរទស្សន៍ MRTV របស់រដ្ឋមីយ៉ាន់ម៉ា ពួកយោធាបានអំពាវនាវដល់ក្រុមចលនាប្រដាប់អាវុធជនជាតិភាគតិចនានា ត្រូវតែរក្សានូវសន្ដិភាព។ ពួកយោធា បានបញ្ជាក់ថា កងទ័ពនឹងពន្យារពេលប្រតិបត្ដិការរបស់ខ្លួនជាឯកតោភាគី ចាប់ពីថ្ងៃទី១-៣០ ខែមេសា ឆ្នាំ២០២១។
ក្រុមបាតុកករគាំទ្រលទ្ធិប្រជាធិបតេយ្យ បានចេញមកតាមដងផ្លូវ ធ្វើបាតុកម្មប្រឆាំងនឹងការចាប់ឃុំខ្លួនមេដឹកនាំជាប់ឆ្នោតលោកស្រី អ៊ុង សានស៊ូជី (Aung San Suu Kyi) និងមន្រ្ដីសំខាន់ៗរបស់រដ្ឋាភិបាលស៊ីវិល អស់រយៈពេល២ខែកន្លងមកហើយ។ ជាការឆ្លើយតបរបស់កងសន្ដិសុខ នៃរបបយោធាមីយ៉ាន់ បានវាយដំ ចាប់ឃុំខ្លួនជនស៊ីវិលតាមទំនើងចិត្ត ហើយរហូតឈានដល់ការបាញ់សម្លាប់យ៉ាងរង្គាលថែមទៀតផង។ កាលពីថ្ងៃសៅរ៍ ទី២៧ ខែមីនា ឆ្នាំ២០២១ កន្លងទៅនេះ គឺជាការបង្ក្រាបយ៉ាងបង្ហូរឈាម បណ្ដាលឲ្យមនុស្សយ៉ាងតិច ១១៤នាក់ ត្រូវបានកងសន្ដិសុខបាញ់សម្លាប់។
ចាប់តាំងពីថ្ងៃសៅរ៍ ទី២៧ ខែមីនា ឆ្នាំ២០២១ ពួកយោធាបានបើកការវាយប្រហារ តាមអាកាសទៅលើរដ្ឋការ៉េន (Karen) ដោយបានបង្ខំឲ្យមនុស្សរាប់ម៉ឹននាក់ រត់ភៀសខ្លួន ចូលទៅក្នុងព្រៃ និងប្រទេសជិតខាង។ ភូមិជាច្រើនត្រូវបានកំណត់គោលដៅ គ្រប់គ្រង ដោយសហភាពជាតិការ៉េន ហៅកាន់ KNU ហើយក៏ជាក្រុមចលនាប្រដាប់អាវុធ ដែលបានកាន់កាប់ដែនដីដ៏ធំមួយ នៅតំបន់ព្រំដែន។ KNU ជាក្រុមចលនាប្រដាប់អាវុធមួយ ក្នុងចំណោមចលនាដទៃទៀត បានចេញមុខគាំទ្រដល់ក្រុមបាតុករ ហើយថ្កោលទោសយ៉ាងខ្លាំងដល់ការធ្វើរដ្ឋប្រហារយោធានេះ។
ដោយឡែក លោកស្រី Christine Schraner Burgner ប្រេសិតពិសេសរបស់អង្គការសហប្រជាជាតិ ប្រចាំនៅប្រទេសភូមា កាលពីថ្ងៃទី៣១ ខែមីនា ឆ្នាំ២០២១ បានព្រមានដល់ក្រុមប្រឹក្សាសន្ដិសុខរបស់អង្គការសហប្រជាជាតិ ថា «ការបង្ហូរឈាមបានមកដល់ហើយ និងជំរុញឲ្យសហគមន៍អន្ដរជាតិ ត្រូវតែក្រោកឡើង។ ពលរដ្ឋភូមាជាង៥២០នាក់ ត្រូវបានគេសម្លាប់ ចាប់តាំងពីការធ្វើរដ្ឋប្រហារ នៅថ្ងៃទី១ ខែកុម្ភៈ ឆ្នាំ២០២១។
លោកស្រី បានប្រាប់ដល់សមាជិកក្រុមប្រឹក្សាសន្ដិសុខរបស់អង្គការសហប្រជាជាតិ នៅក្នុងជំនួបផ្ទាល់ខ្លួនថា «សូមក្រឡេកមើលទៅដប់ឆ្នាំក្រោយ បន្ទាប់ពីពេលនេះ តើប្រវត្តិសាស្រ្តនឹងវិនិច្ឆ័យលើភាពអសកម្មនេះបែបណា?
លោក Kyaw Moe Tun តំណាងអចិន្រៃ្ដយ៍របស់ប្រទេសភូមា ប្រចាំនៅអង្គការសហប្រជាជាតិ បានគូសបញ្ជាក់ពីការព្រួយបារម្ភ ចំពោះសុវត្ថិភាពរបស់ជនស៊ីវិល នៅក្នុងលិខិតមួយ ផ្ញើជូនលោក António Guterres អគ្គលេខាធិការអង្គការសហប្រជាជាតិ អំពាវនាវឲ្យមានសកម្មភាពជាក់ស្ដែង ដោយមិនមានការពន្យារពេល ដើម្បីស្ដារភាពជាអ្នកដឹកនាំលទ្ធិប្រជាធិបតេយ្យឡើងវិញ។
លោក Kyaw Moe Tun បានបញ្ជាក់ នៅក្នុងលិខិតនោះថា ពលរដ្ឋភូមាមានអារម្មណ៍អស់សង្ឃឹម ហើយកំពុងស្វះស្វែងរកការជួយជាបន្ទាន់ ពីសហគមន៍អន្ដរជាតិ ដើម្បីសង្គ្រោះអាយុជីវិតរបស់ប្រជាពលរដ្ឋស្លូតត្រង់។
ទោះជាយ៉ាងណា រហូតមកដល់ពេលនេះ អង្គការសហប្រជាជាតិ សហរដ្ឋអាមេរិក សហភាពអឺរ៉ុប និងសហគមន៍អន្ដរជាតិ រួមមាន ជប៉ុន អូស្រ្ដាលី ម៉ាឡេស៊ី សិង្ហបុរី និងឥណ្ឌូនេស៊ី ជាដើម កំពុងតែស្វះស្វែងគ្រប់មធ្យោបាយ ដើម្បីជួយដល់ប្រជាពលរដ្ឋភូមា៕
