បរទេស៖ ប្រជាពលរដ្ឋតង់ហ្សានី បាននាំគ្នាទៅចូលរួមគោរពវិញ្ញាណក្ខន្ធរបស់លោក John Magufuli ប្រធានាធិបតី នៃប្រទេសនេះ ស្រាប់តែជួបនឹងហេតុការណ៍ដ៏អាក្រក់ ប្រជ្រៀតជាន់ជើងគ្នា ស្លាប់យ៉ាងហោចណាស់៤៥នាក់ស្លាប់ និងរងរបួសជិត៤០នាក់ នៅក្នុងពហុកីឡដ្ឋាន ទីក្រុង Dar es Salaam ប្រទេសតង់ហ្សានី (Tanzania) ។
សារព័ត៌មានក្នុងស្រុក បានផ្សាយ កាលពីថ្ងៃទី៣០ ខែមីនា ឆ្នាំ២០២១ ថា ប្រធានាធិបតីតង់ហ្សានី លោក John Magufuli បានស្លាប់ កាលពីថ្ងៃទី១៧ ខែមីនា ក្នុងវ័យ៦១ឆ្នាំ នៅមន្ទីរពេទ្យ Dar es Salaam ដោយសារជំងឺបេះដូង។ ប៉ុន្ដែក្រុមប្រឆាំងរបស់ប្រទេសនេះ បានលើកឡើងថា លោកប្រធានាធិបតី បានឆ្លងជំងឺកូវីដ-១៩ ហើយស្លាប់ដោយសារមេរោគដ៏កំណាចនេះ ។
ប្រភពព័ត៌មានដដែល បានបន្ដថា ក្រោយពេលលោកប្រធានាធិបតីស្លាប់ គឺនៅទូទាំងប្រទេសបានធ្វើពិធីកាន់ទុក្ខ អស់រយៈពេល១៤ថ្ងៃ ដោយបង្ហូតទង់ជាតិ ត្រឹមពាក់កណ្ដាល។ រហូតគម្រប់១៤ថ្ងៃហើយ សពរបស់លោកប្រធានាធិបតី ត្រូវបានដង្ហែទៅកាន់ពហុកីឡដ្ឋាន Uhuru ដើម្បីគោរពវិញ្ញណក្ខន្ធលោក និងបង្ហាញពីការគោរពស្រឡាញ់របស់ពលរដ្ឋ។ ប៉ុន្ដែដោយសារមានមនុស្សច្រើន បានទៅចូលរួម គួបផ្សំនឹងបុគ្គលមួយចំនួនខ្វះការអត់ធ្មត់ ហើយព្យាយាមប្រជ្រៀតចូលទៅកាន់ពហុកីឡដ្ឋាន តាមផ្លូវផ្សេង ដោយមិនចូលតាមទ្វារធំ ទើបបង្កឲ្យមានហេតុការណ៍ដ៏អាក្រក់ ជាន់គ្នាស្លាប់យ៉ាងតិច៤៥នាក់ និង៣៧នាក់ផ្សេងទៀតរងរបួស។
បើតាមច្បាប់រដ្ឋធម្មនុញ្ញ នៃប្រទេសតង់ហ្សានី គឺលោកស្រី Samia Suluhu Hassanអនុប្រធានាធិបតី ត្រូវដឹកនាំប្រទេសជំនួសអតីតប្រធានាធិបតី ដែលបានស្លាប់។ លោកស្រី Hassan នឹងបន្តដឹកនាំប្រទេស រហូតដល់បញ្ចប់អាណត្តិ៥ឆ្នាំ នៅឆ្នាំ២០២៥៕
