ខេត្តប៉ៃលិន៖ គ្រូពេទ្យម្នាក់បានសរសេរ រៀបរាប់ពីការលំបាក តែ ប៉ុន្មានបន្ទាត់ នៅលើគណនីហ្វេសប៊ុក ត្រូវលោកស្រី បាន ស្រីមុំ អភិបាលខេត្តប៉ៃលិន បណ្ដេញចេញពីការងារ ហើយត្រូវបានមហាជនលើកឡើងថា នេះជារឿងអយុត្ដិធម៌ សម្រាប់គាត់។
លោក ខឹម មុនីកុសល មន្ត្រីការិយាល័យបង្ការ និងគ្រប់គ្រងជំងឺ នៃមន្ទីរសុខាភិបាលខេត្តប៉ៃលិន បានបង្ហោះសារ នៅលើគណនីបណ្ដាញសង្គមហ្វេសប៊ុក «Khem Monykosal» ៖ «បញ្ហាពេទ្យប្រចាំការ នៅមន្ទីរបក្សខេត្តប៉ៃលិន មិនគួរនឹងទទួល»។
គណនីហ្វេសប៊ុក Khem Monykosal បានសរសេរបន្ដថា «មន្ត្រីពេទ្យជាបុគ្គលិកស្រី ត្រូវបានបងប្អូនយើង ដែលកំពុងធ្វើចត្តាឡីស័ក យកកញ្ចប់បាយមកគប់ចំមុខ។ ពេទ្យប្រចាំការ នៅតាមមណ្ឌលចត្តាឡីស័ក ធ្វើការសឹងតែមួយរយជំពូកទៅហើយ។ ប៉ុន្ដែពួកគាត់នៅតែទទួលការប្រមាថបែបនេះទៀត។ បាយមិនឆ្ងាញ់ បាយផ្អូម បាយឆៅ…។ល។… មិនមែន ពេទ្យគួរទទួលខុសត្រូវផ្តាច់មុខអ៊ីចឹងទេ។ ការងារចែកបាយ មិនគួរមានតែពេទ្យ ជាអ្នករាប់រងតែឯងនោះដែរ។ មន្ត្រីមកពីមន្ទីរពាក់ព័ន្ធ គួរតែចូលរួមចំណែកជួយ មិនមែនមកអង្គុយលេង Face Book ក្នុងតង់ និងថតរូបបង្អួតគេនោះដែរ»។
ក្រោយពេលមានការបង្ហោះសារខាងលើនេះមក ស្រាប់តែនៅថ្ងៃទី១៩ ខែមីនា ឆ្នាំ២០២១ លោកស្រី បាន ស្រីមុំ អភិបាលខេត្តប៉ៃលិន បានចេញលិខិត សម្រេចបណ្តេញលោក ខឹម មុនីកុសល ចេញពីក្របខ័ណ្ឌមន្ត្រីសុខាភិបាលជាន់ខ្ពស់ ហើយត្រូវបានលោកស្រីអភិបាលខេត្ត លើកហេតុផលថា «ប្រព្រឹត្តកំហុស និងការឆ្គាំឆ្គង នៅក្នុងវិជ្ជាជីវៈ»។
ដោយឡែកអ្នកលេងបណ្ដាសង្គមវិញ បានលើកឡើងទាំងហួសចិត្តថា គ្រាន់តែគាត់បង្ហោះសារ នៅលើគណនីហ្វេសប៊ុករបស់គាត់តែប៉ុណ្ណឹង ហើយត្រូវបានលោកស្រីចៅហ្វាយខេត្តប៉ៃលិន សម្រេចបណ្ដេញចេញពីក្របខ័ណ្ឌមន្ត្រីពេទ្យមែននោះ គឺជារឿងគួរឲ្យអស់សំណើចបំផុត។ ផ្ទុយទៅវិញ ប្រសិនបើករណីបែបនេះកើតឡើងមាន វាជារឿងអយុត្ដិធម៌បំផុត សម្រាប់គាត់ជាគ្រូពេទ្យ ដែលខិតខំគ្រប់បែបយ៉ាង សម្រាប់ការព្យាបាលអ្នកជំងឺ ហើយករណីបែបនេះ ក៏មិនគួរនឹងកើតមានឡើងនោះដែរ។
ជាមួយគ្នានេះដែរ ក្រុមអ្នកលេងបណ្ដាញសង្គម បានបង្ហាញហេតុផលតថា អ្វីដែលល្អបំផុត លោកស្រីចៅហ្វាយខេត្តប៉ៃលិន គួរតែមានដំណោះស្រាយផ្សេង ទើបល្អជាងនេះ។ ពោលគឺត្រូវកោះប្រជុំ នៅមណ្ឌលចត្តាឡីស័ក ហើយស្វែងរកបញ្ហាទាំងនោះមកដោះស្រាយ ដើម្បីរកផ្លូវល្អ និងយុត្ដិធម៌ សម្រាប់គាត់។
ក្រុមអ្នកលេងបណ្ដាញសង្គម បានបន្ថែមថា ជាការពិតណាស់ គ្រប់កន្លែងធ្វើការទាំងអស់ មិនថា នៅស្ថាប័នរដ្ឋ និងវិស័យឯកជននោះទេ គឺបុគ្គលិក២ពួក តែងមានលក្ខណសម្បត្ដិខុសគ្នា។ អ្នកមានសមត្ថភាព តាមជំនាញការងារ តែងតែមិនសូវចេះអែបអប។ រីឯបុគ្គលិកមួយប្រភេទទៀត ចូលចិត្តអែបអប ដោយយកការងាររបស់អ្នកដទៃ មកធ្វើជារាយការណ៍ប្រាប់មេយកបុងថា ជាការងាររបស់ខ្លួន។ ប៉ុន្ដែប្រសិនបើមេមួយចំនួនខ្វះការពិចារណា គិតថា អ្នក(អ្នកអែបអប)នេះល្អ។ រីឯអ្នកដឹងតែប្រឹងធ្វើការងារដោយស្មោះ អស់ពីកម្លាំងកាយចិត្ត ហើយមិនចេះអែបអប បែរទៅជាថា អ្នកនោះអត់បានការទៅវិញ។
អ្នកលេងបណ្ដាញសង្គម បានបន្ដថា បើមានអ្វីកើតឡើង គឺត្រូវបង្រួមបញ្ហា ហើយលើកយកបញ្ហាមកដាក់លើតុ ហើយនិយាយ ឬដោះស្រាយគ្នា ទើបវាលែងមានបញ្ហា និងលើកទឹកចិត្តដល់មន្ត្រីពេទ្យ រួមទាំងមន្ត្រីពាក់ព័ន្ធគ្រប់ផ្នែកឲ្យជួយគ្នា បូករួមទាំងអ្នកធ្វើចត្តាឡីស័កផង ក៏ត្រូវជួយគ្នាផងដែរ។
បើតាមការលើកឡើង នៅលើគណនីខាងលើ គឺក្រុមពេទ្យធ្វើការងារច្រើន លើសពីការងារពេទ្យ ព្រោះគ្រាន់តែចែកបាយទឹក ក៏ខាងស៊ីវិល ផ្នែករដ្ឋបាល និងមន្ត្រីធម្មតា អាចធ្វើការងារនេះបាន ហើយត្រូវមានការចូលរួមពីក្រុមអ្នកធ្វើចត្តាឡីស័ក ដោយដាក់តុ ហើយឲ្យពួកគាត់ ដើរទៅយកក៏បានដែរ។ រីឯការបណ្ដេញគ្រូពេទ្យជំនាញបែបនេះ គឺមិនមែនជាជម្រើសដ៏ត្រឹមត្រូវ នៅក្នុងអភិបាលកិច្ចដ៏ល្អនោះទេ។
ករណីនេះ គួរតែមានការបកស្រាយ និងដោះស្រាយតាមវិធានការដ៏ប្រសើរណាមួយ ជាជាងការសម្រេចបណ្តេញមន្ត្រីពេទ្យ ចេញពីក្របខ័ណ្ឌ។ បើសិននៅតែបន្ដធ្វើដូច្នេះមែននោះ តើគ្រូពេទ្យនៅមណ្ឌលចត្តាឡីស័ក ឬមន្ទីរបក្សខេត្តប៉ៃលិន ពិតទទួលរងនូវទង្វើអយុត្តិធម៌បំផុត។
ដោយឡែកគណនីហ្វេសប៊ុក Kimleng Ya បានបង្ហោះសារថា អាណិតលោកប្តីណាស់ គ្រាន់តែសារប៉ុណ្ណឹង ត្រូវគេបណ្តេញចេញពីការងារ។ អយុត្តិធម៌ណាស់!
ទោះជាយ៉ាងណា KBN មិនអាចមានប្រភព សម្រាប់ទាក់ទងសុំការបំភ្លឺពីលោកស្រី អភិបាលខេត្តប៉ៃលិន បានទេ នៅថ្ងៃនេះ។ KBN នឹងរង់ចាំផ្សាយ ពីរាល់ភាគីទាំងអស់ ដើម្បីឲ្យប្រជាពលរដ្ឋ បានដឹង៕
សូមអានសេចក្ដីសម្រេចទាំងស្រុង ដូចខាងក្រោម៖
