រាជធានីភ្នំពេញៈ តារាចម្រៀង លោក បញ្ញា សិទ្ធ បានប្រកាសនៅលើបណ្តាញសង្គមផ្ទាល់ខ្លួនថា លោកមានវិជ្ជមាន នៃកូវីដ-១៩ ហើយលោកត្រូវបានក្រុមគ្រូពេទ្យយករថយន្ដមកដឹកលោក បញ្ជូនទៅកាន់មន្ទីរពេទ្យ ដើម្បីព្យាបាល កាលពីយប់ ថ្ងៃទី១៦ ខែមីនា ឆ្នាំ២០២១។
លោក បញ្ញា សិទ្ធ បានសរសេរសារនៅលើគណនីរបស់លោកថា «សួស្តីបងប្អូនទាំងអស់គ្នា! ខ្ញុំបាទ បញ្ញាសិទ្ធ ថ្ងៃនេះ នាវេលាម៉ោង១១យប់ ថ្ងៃទី១៦ ខែមីនា ឆ្នាំ២០២១ បានទទួលលទ្ធផលហើយ គឺមានវិជ្ជមាន នៃកូវីដ-១៩ សូមបងប្អូនទាំងអស់គ្នាថែរក្សាសុខភាពផង»។ ទោះជាយ៉ាងណា លោក បញ្ញា សិទ្ធ មិនបានបញ្ជាក់ថា លោកបានឆ្លងកូវីដ-១៩ ពីអ្នកណាមកនោះដែរ។
គិតត្រឹមព្រឹក ថ្ងៃទី១៧ ខែមីនា ឆ្នាំ២០២១ មានអ្នកសិល្បៈខ្មែរជាច្រើនរូប បានឆ្លងកូវីដ-១៩។ អ្នកទាំងនោះ រួមមាន លោក ទីតូ អ្នកដឹកនាំសម្តែង, ពិធីការិនី កែវ ចាន់និមល និងគ្រួសារ, លោក ណុប បាយ៉ារិទ្ធ, កញ្ញា វី ឌីណែត, តារាចម្រៀង អ្នកនាង សុគន្ធ និសា, លោក Eco Vak Song (សុង វណ្ណា) ជាផលិតករ និងជាអ្នកដឹកនាំម្នាក់របស់ហង្សមាស, លោក វ៉ែន វណ្ណា (លី ស៉ីនហួន) អ្នកនិពន្ធ និងដឹកនាំការថតចម្រៀង, តារាកំប្លែង សេង ចិន្តា (ស្រីអ៊ីត), លោក ចាន់ មករា អតីតអ្នកដឹកនាំសម្តែង, ក្រុមរាំរបស់ អ្នកនាងសុគន្ធ និសា និងលោក សាន សុវណ្ណឌីន គ្រូភ្លេងនៅហង្សមាស ហើយពេលនេះគឺតារាចម្រៀង លោក បញ្ញា សិទ្ធ៕