ខេត្តកំពត៖ ជនជាតិចិនម្នាក់ បានដើរអុកឡុក និងបង្កការភ័យខ្លាចដល់អ្នកដំណើរ ហើយថែមទាំងដើរវាយបំផ្លិចបំផ្លាញទ្រព្យសម្បត្តិសាធារណៈ ធ្វើឲ្យភ្ញាក់ផ្អើលដល់ប្រជាពលរដ្ឋ រស់នៅក្នុងមូលដ្ឋាន រាយការណ៍ទៅសមត្ថកិច្ច នាំគ្នាស្វែងរកចាប់ខ្លួន។
មន្ត្រីការិយាល័យនគរបាលអន្តោប្រវេសន៍ នៃស្នងការដ្ឋានខេត្តកំពត បានឲ្យថា សមត្ថកិច្ចបានទទូលសេចក្ដីរាយការណ៍ពីប្រជាពលរដ្ឋអំពីសកម្មភាពរបស់បុរសចិនម្នាក់ បង្កការអុកឡុក វាយបំផ្លាញទ្រព្យសម្បត្ដិសាធារណៈ។ បើតាមរូបថតដែលប្រជាពលរដ្ឋផ្ញើមកនោះ គឺ បុរសជាជនជាតិចិនម្នាក់នោះ កន្លងមក សមត្ថកិច្ចធ្លាប់ហៅមកសួរនាំ និងអប់រំម្តងរួចមកហើយ។ បើតាមការពិតមើល បុរសជនជាតិចិនម្នាក់នោះ មានសតិមិនប្រក្រតី។
សមត្ថកិច្ចដដែល បានបន្ដថា ក្រោយពេលអប់រំរួច សមត្ថកិច្ចក៏បានដោះលែងជនជាតិចិនម្នាក់នោះវិញ ហើយក៏មិនបានដឹងថាដើរទៅណាបាត់ដែរ។ ប៉ុន្ដែស្រាប់តែពេលនេះ ប្រជាពលរដ្ឋបានរាយការណ៍មកថា ឃើញមកគេធ្វើសកម្មភាពដូចមុនទៀត។ លុះពេលសមត្ថកិច្ចចុះទៅដល់កន្លែងកើតហេតុ ជននោះបានទៅបាត់ ហើយនៅពេលនេះសមត្ថកិច្ចកំពុងតាមស្វែងរក ដើម្បីចាប់បញ្ជូនមកកាន់នាយកដ្ឋានចាត់ការបន្ត។
ជាមួយគ្នានេះមន្រ្ដីការិយាល័យនគរបាលអន្ដោប្រវេសន៍ខេត្ត បានអំពាវនាវដល់ប្រជាពលរដ្ឋទាំងអស់ ប្រសិនបើប្រទះឃើញជនម្នាក់នោះ នៅកន្លែងណា សូមប្រញាប់រាយការណ៍ ជូនសមត្ថកិច្ចដែលនៅក្បែរ ឱ្យបានលឿនបំផុត ដើម្បីចុះទៅចាប់ខ្លួនគេ នាំមកចាត់ការតាមនីតិវិធី៕
