រាជធានីភ្នំពេញ៖ ក្រោយពេលតារាចម្រៀងជាច្រើនរូបរបស់ហង្សមាស បានធ្វើតេស្ដ រកឃើញឆ្លងកូវីដ១៩ ជាបន្ដបន្ទាប់នោះមក ធ្វើឲ្យគេគិតថា ឱក សុគន្ធកញ្ញា ពិតជាឆ្លងកូវីដ១៩។ ប៉ុន្ដែនៅពេលនេះ លទ្ធផលធ្វើតេស្ដ បានបង្ហាញថា នាងមិនបានឆ្លងកូវីដ១៩នោះទេ ហើយនេះក៏ជាដំណឹងដ៏គួរឲ្យរីករាយមួយ សម្រាប់អ្នកគាំទ្ររបស់តារាចម្រៀងរូបនេះ។
កាលពីប៉ុន្មានថ្ងៃមុនេះ តារាចម្រៀងល្បីល្បីៗរបស់ផលិតកម្មហង្សមាស ជាច្រើននាក់ រួមមាន លោក ណុប ប៉ាយ៉ារិទ្ធ, តារាស្រី សុគន្ធ និសា និងកញ្ញា វី ឌីណែត កូនស្រីរបស់តារាចម្រៀងជើងចាស់ លោក ហូ ឡាវី ត្រូវបានធ្វើតេស្ដ រកឃើញវិជ្ជមាន នៃកូវីដ១៩ ជាបន្ដបន្ទាប់។ ករណីនេះ ធ្វើឲ្យតារាស្រី ឱក សុគន្ធកញ្ញា ក៏ដូចជា អ្នកគាំទ្ររបស់នាង រង់ចាំយ៉ាងអន្ទះសា អំពីលទ្ធផល នៃការធ្វើតេស្ដ ស្វែងរកមេរោគដ៏កំណាចនេះ។ ប៉ុន្តែរហូតមកដល់ពេលនេះ លទ្ធផលបានបង្ហាញថា នាងមានអវិជ្ជមាន នៃវីរុសកូរ៉ូណា ហៅកាត់ «កូវីដ១៩»។
តារាចម្រៀងស្រីដ៏ល្បីល្បាញ ឱក សុគន្ធកញ្ញា បានបង្ហោះសារ នៅក្នុងគណនីបណ្ដាញសង្គមហ្វេសប៊ុកផ្ទាល់ខ្លួនរបស់នាង នៅថ្ងៃនេះថា « ជម្រាបសួរ និងសូមអរគុណជាថ្មីម្តងទៀត ចំពោះការជូនពរពីបងប្អូន។ សម្រាប់នាងខ្ញុំ និងក្រុមគ្រួសារ ព្រមទាំងបុត្រ បានចូលរួមធ្វើតេស្ត លើកទី១ ដើម្បីស្វែងរកមេរោគជំងឺកូវីដ១៩។ ប៉ុន្ដែនៅពេលនេះ នាងខ្ញុំបានទទួលលទ្ធផលរួចហើយ គឺ អវិជ្ជមាន (Negative) នៃកូវីដ១៩។
ឱក សុគន្ធកញ្ញា បានបញ្ជាក់ទៀតថា បើទោះជាយ៉ាងនេះក្ដី នៅក្នុងអំឡុងពេលនេះ នាងខ្ញុំ និងក្រុមគ្រួសារ ក៏កំពុងធ្វើចត្តាឡីស័ក រយៈពេល១៤ថ្ងៃ ហើយបន្តតាមដានសុខភាព ដើម្បីធ្វើតេស្តជាលើកទី២ តាមការណែនាំរបស់ក្រសួងសុខាភិបាល បន្ដទៀត។ នាងបានសម្ដែងអំណរគុណចំពោះអ្នកស្រលាញ់ គាំទ្រនាងទាំងអស់គ្នា ដែលបានបារម្ភ និងសួរសុខទុក្ខជាច្រើនដែលនាងខ្ញុំមិនបានឆ្លើយតបទាំងអស់គ្នា។
ជាមួយគ្នានេះដែរ ឱក សុគន្ធកញ្ញា បានផ្ញើសារជូនពរដល់មិត្តភក្ដិ បងប្អូន ដែលកំពុងសម្រាកព្យាបាល សូមឲ្យទទួលបានសុខភាពល្អ រឹងមាំឡើងវិញ ក្នុងពេលដ៏ឆាប់ៗនេះ និងសូមបងប្អូនទាំងអស់គ្នា រក្សាជំហរជម្នះឲ្យបាន ហើយហង្សមាសត្រូវតែរឹងមាំ។ សូមប្រុងប្រយ័ត្ននឹងបន្តការពារ ថែទាំសុខភាព ឲ្យកាន់តែខ្លាំងបន្ថែមទៀត ចំពោះកូវីដ១៩នេះ « ៣កុំ ៣កាពារ»៕
