បរទេស៖ បណ្ដាប្រទេសជាសមាជិករបស់អាស៊ាន កំពុងតែស្វះស្វែង រកទិញវ៉ាក់សាំងបង្ការកូវីដពីបណ្ដាប្រទេសផលិតវ៉ាក់សាំង ហើយកាលពីវេលាម៉ោង១០ព្រឹក ថ្ងៃទី២៤ ខែកុម្ភៈ ឆ្នាំ២០២១ វៀតណាម ដែលជាប្រទេសកុម្មុយនីស្ដ នៅក្នុងតំបន់ បានហក់ទៅចាប់យកវ៉ាក់សាំងរបស់ប្រទេសលោកសេរី ផ្ទុយពីប្រទេសថៃ បែរជាបញ្ជាទិញវ៉ាក់សាំងពីចិនជាប្រទេសកុម្មុយនីស្ដទៅវិញ។
បើតាមបណ្ដាញផ្សព្វផ្សាយរបស់បរទេស បានឲ្យដឹងថា កាលពីវេលាខាងលើនេះ ក្រុមហ៊ុន AstraZeneca របស់ចក្រភពអង់គ្លេស បានបញ្ជូនវ៉ាក់សាំងបង្ការកូវីដ ជាជំហានដំបូង ចំនួន១១៧ពាន់ដូស បានមកដល់អាកាសយានដ្ឋានតឹងស៊ឺងញឹក ទីក្រុងហូជីមិញ ប្រទេសវៀតណាម។ បើតាមគម្រោង ក្រុមហ៊ុន AstraZeneca នឹងបញ្ជូនវ៉ាក់សាំងបង្ការកូវីដរបស់ខ្លួន មកឲ្យវៀតណាម ចំនួន៣០លានដូស តាមកិច្ចព្រមព្រៀង រវាងរដ្ឋាភិបាលវៀតណាម និងក្រុមហ៊ុនមួយនេះ កាលពីដើមឆ្នាំ២០២១។ ប៉ុន្ដែវ៉ាក់សាំងនេះនឹងបញ្ជូនមកជាច្រើនលើក តាមដំណាក់កាល។
បើតាមសារព័ត៌មានបាងកកប៉ុស្តិ៍ បានផ្សាយថា យន្តហោះរបស់អាកាសចរណ៍ Thai Airwaysបានវ៉ាក់សាំងបង្ការកូវីដ-១៩ Sinovac របស់ចិន ចំនួន២សែនដូស ចេញពីរដ្ឋធានីប៉េកាំង ប្រទេសចិន ហើយនិងចុះចត នៅក្នុងអាកាសយានដ្ឋានអន្តរជាតិ សុវណ្ណភូមិ ស្ថិតនៅភាគខាងកើត ទីក្រុងបាងកក នៅវេលាម៉ោង១០ និង៥នាទីព្រឹក ថ្ងៃទី២៤ ខែកុម្ភៈ។
លោក ប្រាយុទ្ធ ចាន់អូចា នាយករដ្ឋមន្ត្រីថៃ បានថ្លែងថា «ថ្ងៃនេះជាថ្ងៃនៃប្រវត្តិសាស្ត្រ ដែលយើងត្រូវទទួលបានវ៉ាក់សាំងក្នុងចំនួនដ៏ច្រើន…។ រដ្ឋាភិបាលបាន និងកំពុងតែព្យាយាមឲ្យអស់ពីសមត្ថភាព ដើម្បីទទួលបានវ៉ាក់សាំងទៅតាមកាលកំណត់។ បើគ្មានបញ្ហាកើតឡើងជាយថាហេតុណាមួយទេនោះ វ៉ាក់សាំងជាច្រើនបន្ថែមទៀត នឹងមកដល់ប្រទេសថៃទៅតាមផែនការ។
រដ្ឋាភិបាលថៃ បានបញ្ជាទិញវ៉ាក់សាំងបង្ការកូវីដ ពីក្រុមហ៊ុនចិន Sinovac សរុប២លានដូសក្នុងតម្លៃ៤០លានដុល្លារអាមេរិក។ រីឯវ៉ាក់សាំង ចំនួន ២០០ ០០០ដូសនេះ នឹងត្រូវយកទៅរក្សាទុកក្នុងឃ្លាំងយ៉ាងត្រឹមត្រូវ រហូតដល់ថ្ងៃសុក្រសប្តាហ៍នេះ ទើបចាត់ចែងទៅតាមគម្រោង។ ថៃនឹងចាប់ផ្តើមយុទ្ធនាការចាក់វ៉ាក់សាំង ជាលើកដំបូង នៅថ្ងៃចន្ទសប្តាហ៍ក្រោយ។
ទោះជាយ៉ាងណា ប្រទេសថៃមិនបានទុកចិត្តទៅលើវ៉ាក់សាំងបង្ការកូវីដ១៩ មានប្រភពតែមួយនោះទេ។ ក្រៅពីវ៉ាក់សាំងរបស់ចិនខាងលើនេះ ថៃក៏បានបញ្ជាទិញវ៉ាក់សាំងរបស់ក្រុមហ៊ុន AstraZeneca (អង់គ្លេស) រហូតដល់ជាង២១លានដូស។ ប៉ុន្ដែវ៉ាក់សាំងរបស់ AstraZeneca នេះ នឹងត្រូវផលិត នៅក្នុងប្រទេសថៃ។
កន្លងមក ថៃបានអះអាងថា ថៃនឹងផលិតវ៉ាក់សាំងបង្ការកូវីដរបស់ខ្លួន ហើយការចាប់ផ្ដើមធ្វើតេស្ដវ៉ាក់សាំងនោះជាលើកដំបូង នៅថ្ងៃទី១ ខែមីនា ឆ្នាំ២០២១ខាងមុខនេះ។ ប្រសិនបើជោគជ័យទាំង៣ដំណាក់កាល ថៃនឹងផលិតវ៉ាក់សាំង រហូតដល់ទៅជិត៣០លានដូស៕
