រាជធានីភ្នំពេញ៖ ក្រោយពេលអ្នកមានគុណបានទទួលមរណភាពភ្លាម តារាសម្ដែង វីជេអាឡាស្កូ បានបង្ហោះសារដ៏ក្រៀមក្រំមួយរៀបរាប់ គួរឲ្យនឹកអាណិតជាទីបំផុត ប៉ុន្ដែទោះជាយ៉ាងណា ការជួប និងព្រាត់ប្រាសគ្នាបែបនេះ មិនមានអ្នកណាម្នាក់អាចគេចផុតឡើយ ព្រោះវាជាច្បាប់ធម្មជាតិ សម្រាប់មនុស្សសត្វគ្រប់រូប តែងតែកើត និងស្លាប់ទៅវិញជាធម្មតា។
វីជេ អាឡាស្កូ បានបង្ហោះសារដ៏ក្រៀមក្រំគួរឲ្យអាណិតអំពីមរណភាពរបស់ម្តាយជាទីគោរពស្រលាញ់របស់លោក ដែលបានទទួលមរណភាព កាលពីរាត្រី ថ្ងៃទី២៣ ខែកុម្ភៈឆ្នាំ២០២១ក្នុងវ័យ៦៨ឆ្នាំ ដោយសាររោគាពាធ។ ដំណឹងនេះបានបង្កើតឲ្យអ្នកជិតស្និទ្ធនឹងតារាសម្តែង និងជាពិធីកររូបនេះ មានការភ្ញាក់ផ្អើល ហើយបាននាំគ្នាចូលរួមរំលែកទុក្ខដ៏ក្រៀមក្រំមួយនេះផងដែរ។
វីជេ អាឡាស្កូ បានរៀបរាប់ នៅក្នុងសារប្រកបដោយការ និងសោកសង្រេងថា «យើងបែកគ្នារហូតហើយ ណាម៉ែណា! កូនលែងមានអ្នកម្ដាយហៅ លែងមានអ្នកធ្វើម្ហូបឆ្ងាញ់ៗឲ្យ លែងមានអ្វីគ្រង់យ៉ាង រវាងកូនៗ និងអ្នកម្តាយ។ កូនសែនអាល័យខ្លាំងណាស់ណាអ្នកម៉ែ»។
វីជេ អាឡាស្កូ បានរៀបរាប់បន្ដថា «រាល់អនុស្សាវរីយ៍ ជាង៣០ឆ្នាំកន្លងមកនេះ ត្រូវបានបញ្ចប់នៅថ្ងៃនេះ។ អ្នកម្តាយរបស់ខ្ញុំញញឹមស្រស់ណាស់ ម្តាយរបស់ខ្ញុំរឹងមាំខ្លាំងណាស់ ចិញ្ចឹមកូន៤នាក់ ដោយគ្មានលក្ខខណ្ឌ។ អ្នកម្ដាយលះបង់ច្រើនពេកណាស់ហើយ ម្តេចក៏អ្នកម្ដាយមិននៅចាំកូនៗ តបស្នងសងគុណសិន។
សារខាងលើរបស់វីជេ អាឡាស្កូ បានធ្វើឲ្យអ្នករួមអាជីព និងអ្នកសិល្បៈដទៃទៀត ក៏ដូចជា អ្នកគាំទ្ររបស់លោក បានការរំជួលចិត្តយ៉ាងខ្លាំង។ ប៉ុន្ដែទោះជាយ៉ាងណា មិនមានអ្នកណាម្នាក់អាចរត់គេចផុតពីច្បាប់ធម្មជាតិ (កើត ចាស់ ឈឺ ស្លាប់) នេះបានឡើយ ព្រោះមនុស្សសត្វទាំងអស់ គឺស្ថិតនៅក្នុងរូបំ ទុក្ខ អនិច្ចំ និងអនត្ដានេះឯង។
តារាសម្តែងរូបនេះ បានបញ្ជាក់ថា សពរបស់ម្តាយរបស់លោក ឈ្មោះ ធុច សុខុម នឹងត្រូវដង្ហែចេញពីផ្ទះ នៅខាងជើងផ្សារលើ ឆ្ពោះទៅកាន់ឈាបនដ្ឋានវត្តធម្មរតនៈសាគរ ហៅ «វត្តកំពង់ឧសលើ» នៅរសៀល ថ្ងៃទី២៤ ខែកុម្ភៈឆ្នាំ២០២១។ រីឯពិធីបូជាសពនឹងត្រូវធ្វើឡើង នៅវេលាម៉ោង៦ និង៣០នាទីយប់ ថ្ងៃដដែលនេះ។
ដោយឡែក កម្មវិធីបុណ្យសពនឹងបញ្ចប់ នៅវេលាថ្ងៃត្រង់ ថ្ងៃទី២៥ ខែកុម្ភៈឆ្នាំ២០២១។ ជាមួយគ្នានេះ ក្នុងនាមលោកជាតំណាងឲ្យគ្រួសាររបស់សពសូមអញ្ជើញញាតិមិត្ត ជិតឆ្ងាយចូលរួមជាភ្ញៀវកិត្ដិយស នៅក្នុងកម្មវិធីបុណ្យខាងលើផងដោយក្ដីអនុគ្រោះ៕
