រាជធានីភ្នំពេញ៖ ក្រសួងសុខាភិបាល បានប្រកាសថា បើគិតចាប់តាំងពីថ្ងៃទី១០-១៩ ខែកុម្ភៈ ឆ្នាំ២០២១ ចំនួនអ្នកស្ម័គ្រចិត្តមកទទួលការចាក់វ៉ាក់សាំងកូវីដ-១៩ (Sinopharm Beijing Institute of Biological Products) មានចំនួនម៉ឺននាក់។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា បានបញ្ជាក់ថា បើគិតត្រឹមយៈពេលខាងលើនេះ មានអ្នកស្ម័គ្រចិត្តមកទទួលការចាក់ មានចំនួនជាង ៥៧ ០០នាក់។ ក្នុងចំណោមអ្នកស្ម័គ្រចិត្តទាំងនោះ រួមមាន ៖
១-សរុបអ្នកមកចាក់វ៉ាក់សាំងកូវីដ-១៩ ៖ ៥ ៧៤១នាក់ (ស្រី ២ ២៣៩នាក់) ។
២-អ្នកបានចាក់វ៉ាក់សាំងរួច៖ ៤ ៦០៩នាក់ (ស្រី ១ ៦០៣នាក់)។
៣-អ្នកដែលគ្រូពេទ្យមិនអនុញ្ញាតឲ្យចាក់៖ ១ ១៣២នាក់ (ស្រី ៦៣៦នាក់)។
ដោយឡែក ក្រសួងការពារជាតិវិញ បានបញ្ជាក់ដែរថា បើគិតចាប់ពីថ្ងៃទី១០ រហូតដល់ថ្ងៃទី១៩ ខែកុម្ភៈ ឆ្នាំ២០២១ ក្រសួងការពារជាតិកម្ពុជាបានចាក់វ៉ាក់សាំងស៊ីណូហ្វាម (Sinopharm) របស់ចិន សម្រាប់បង្ការជំងឺកូវីដ-១៩ ជូនកងកម្លាំងកើនដល់១៧ ០៥២នាក់ ហើយក្នុងនោះមាននារី ១ ២១៤នាក់។
សូមជម្រាបថា ជំនួយវ៉ាក់សាំងបង្ការកូវីដ (ស៊ីណូហ្វាម) របស់មិត្តចិន ជាជំហានដំបូង មានចំនួន៦សែនដូស ក្នុងចំណោម១លានដូស ដែលផ្តល់ជូនតាមសំណើរបស់ក្រសួងការពារជាតិ ហើយត្រូវបានដឹកមកដល់ប្រទេសកម្ពុជា កាលពីថ្ងៃទី៧ ខែកុម្ភៈ ឆ្នាំ២០២១ កន្លងទៅនេះ។ ដោយឡែក៤សែនដូសទៀត នឹងមកដល់កម្ពុជា ជាបន្តបន្ទាប់៕
