ខេត្តស្វាយរៀង៖ ស្ត្រីជាម្ដាយម្នាក់ដើរទៅទិញទឹកកក តែមិនដឹងថា កូនរត់តាមក្រោយ លុះត្រឡប់មកផ្ទះវិញ ឃើញកូនលង់ទឹកស្រះ ក៏ស្រែកឆោឡោ ផ្អើលដល់អ្នកភូមិ នាំគ្នាចុះស្រង់មកដាក់លើគោក តែអកុសល វាហួសពេលទៅហើយ។
ហេតុការណ៍នេះបានកើតឡើង កាលពីវេលាម៉ោង១១ព្រឹក ថ្ងៃទី២៥ ខែមករា ឆ្នាំ២០២១ ស្ថិតនៅភូមិត្រពាំងស្ដៅ ឃុំត្រពាំងស្ដៅ ស្រុករមាសហែក។
ក្មេងស្រីរងគ្រោះឈ្មោះរុន ស្រីណែត អាយុ៣ឆ្នាំ រស់នៅភូមិឃុំខាងលើ។
ស្ត្រីជាម្ដាយបានប្រាប់សមត្ថកិច្ចថា មុនពេលកើតហេតុ គាត់ប្រញាប់ទៅទិញទឹកកក ដោយមិនដឹងថា កូនរត់តាមពីក្រោយនោះទេ។ លុះពេលគាត់ត្រឡប់មកផ្ទះវិញ ឃើញកូនលង់ទឹកស្រះ ក៏ស្រែកឆោឡោ ផ្អើលដល់អ្នកភូមិនាំគ្នាចុះស្រង់មកដាក់លើគោក ធ្វើចលនាជួយសង្រ្គោះដែរ តែអកុសល វាហួសពេលទៅហើយ។
ក្រោយពេលកើតហេតុ សមត្ថកិច្ចនគរបាលស្រុក សហការជាមួយនគរបាលប៉ុស្តិ៍ ចុះមកពិនិត្យសព រួចហើយសន្និដ្ឋានថា កុមារីរងគ្រោះពិតជាស្លាប់ ដោយសារការលង់ទឹកស្រះប្រាកដមែន និងប្រគល់ឱ្យម្ដាយឪពុកយកទៅធ្វើបុណ្យ តាមប្រពៃណី៕