ខេត្តកណ្ដាល៖ បុរសកំណាចម្នាក់ឃើញក្មេងស្រីជិះកង់ត្រឡប់ចេញពីសាលារៀត យកកាំបិតផ្គាក់គប់ទៅរកនាង ហើយស្រែកគំរាមដុតផ្ទះរបស់នាងថែមទៀត ធ្វើឲ្យក្មេងស្រីនោះភ័យខ្លាច ហើយប្រាប់ឪពុកម្ដាយឱ្យប្តឹងសមត្ថកិច្ចចុះទៅឃាត់ខ្លួន។ ករណីអំពើហិង្សានេះ បានកើតឡើង កាលពីវេលាម៉ោង១រសៀល ថ្ងៃទី២១ ខែមករា ឆ្នាំ២០២១ នៅក្នុងភូមិអូររំចេក ឃុំស្វាយប្រទាល ស្រុកស្អាង ខេត្តកណ្ដាល។
មន្ត្រីនគរបាលស្រុកស្អាង បានឱ្យដឹងថា ជនបង្ក ឈ្មោះ ស៊ន រតនា (ហៅទន់) អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ មានលំនៅក្នុងភូមិអូររំចេក ឃុំស្វាយប្រទាល ស្រុកស្អាង ខេត្តកណ្ដាល។ ក្រៅពីឃាត់ខ្លួនជនសង័្សយនោះ សមត្ថកិច្ចក៏ដកហូតបានកាំបិតផ្គាក់ ១។ រីឯក្មេងស្រីរងគ្រោះ ឈ្មោះ បូរិន ស្រីលីន អាយុ១៥ឆ្នាំ ជនជាតិខ្មែរ មុខរបរសិស្ស មានលំនៅក្នុងភូមិអូររំចេក ឃុំស្វាយប្រទាល ស្រុកស្អាង ខេត្តកណ្ដាល។
ប្រភពព័ត៌មានពីកន្លែងកើតហេតុ បានឲ្យដឹងថា កាលពីវេលាម៉ោង១១ព្រឹក ថ្ងៃកើតហេតុ ជនបង្កបានផឹកស៊ី រហូតស្រវឹងជោកជាំ ហើយបានយកកាំបិតផ្គាក់ទៅកាប់គ្រែ និងទូរទស្សន៍របស់ម្ដាយខ្លួន ហើយស្រែកសម្លុត និងគំរាមម្ដាយរបស់ខ្លួន រហូតធ្វើឱ្យគាត់ភ័យខ្លាចយ៉ាងខ្លាំង។ បន្ទាប់ពីមានសេចក្ដីរាយការណ៍បែបនេះ សមត្ថកិច្ចបានចុះទៅឃាត់ខ្លួនជនសង័្សយ នាំទៅកាន់ប៉ុស្ដិ៍នគរបាលរដ្ឋបាល។ ប៉ុន្ដែស្រ្ដីជាម្ដាយ គ្រាន់តែសំណូមពរឲ្យសមត្ថកិច្ចអប់រំ និងណែនាំដល់ជនសង័្សយ ហើយឲ្យគេធ្វើកិច្ចសន្យាបញ្ឈប់បង្កហិង្សា នៅត្រឹមប៉ុស្តិ៍នគរបាលរដ្ឋបាល។
ប្រភពព័ត៌មានដដែល បានបន្ដថា ក្រោយពេលអប់រំ និងឲ្យធ្វើកិច្ចសន្យារួចហើយ សមត្ថកិច្ចបានអនុញ្ញាតឲ្យជនសង័្សយត្រឡប់ទៅផ្ទះវិញ។ ប៉ុន្ដែជននេះនៅតែមិនរាងចាល ហើយបន្តផឹកស៊ីស្រែកឡូឡា និងចាក់ធុងបាស់ឮៗ បង្កការរំខានដល់អ្នកជិតខាងបន្ថែមទៀត។ លុះមកដល់វេលាម៉ោង១សៀល ថ្ងៃកើតហេតុ ក្មេងស្រីរងគ្រោះបានត្រឡប់មកពីសាលារៀនវិញ ហើយជិះកង់កាត់មុខជនសង័្សយ ធ្វើឲ្យគេនឹកឃើញរឿងទំនាស់គ្នាជាមួយនឹងឪពុកម្ដាយរបស់នាង ក៏ផ្ទុះកំហឹងឡើង។
ប្រភពព័ត៌មានដដែល បានបន្ដថា ឃើញបែបនេះ ជនបង្កបានស្ទុះទៅទាញកាំបិតផ្គាក់គប់សំដៅទៅលើក្មេងស្រីរងគ្រោះ។ រីឯកាំបិតនោះបានហោះទៅខុសគោលដៅ ទើបមិនបានបង្កឲ្យនាងរងរបួស។ ប៉ុន្ដែគ្រាន់តែធ្វើឲ្យក្មេងស្រីរងគ្រោះ មានការភិតភ័យតែប៉ុណ្ណោះ។ បន្ទាប់មក ជនបង្កបានស្រែកគំរាមដុតផ្ទះរបស់ក្មេងស្រីរងគ្រោះ ធ្វើឲ្យនាងកាន់តែភ័យ ហើយរត់ប្រាប់ឪពុករបស់នាង។
ក្រោយពេលឃើញសកម្មភាពរបស់ជនសង័្សយ បង្កនូវអំពើហិង្សាបែបនេះ អាណាព្យាបាលរបស់ក្មេងស្រីរងគ្រោះបានទៅដាក់ពាក្យបណ្ដឹង នៅប៉ុស្ដិ៍នគរបាលរដ្ឋបាលស្វាយប្រទាល។ បន្ទាប់ពីមានពាក្យបណ្ដឹង នៅក្នុងដៃរួចហើយ សមត្ថកិច្ចបានចុះទៅឃាត់ខ្លួនជនសង័្សយ និងដកហូតកាំបិតផ្គាក់ ហើយនាំខ្លួនបញ្ជូនទៅកាន់អធិការដ្ឋាននគរបាលស្រុក ដើម្បីកសាងសំណុំរឿងចាត់ការតាមច្បាប់៕