ខេត្តតាកែវ៖ រហូតមកដល់ពេលនេះ ជរងគ្រោះ ដោយសារអំពើហិង្សា បានស្លាប់ កាលពីថ្ងៃទី២១ ខែមករា ឆ្នាំ២០២១ ប៉ុន្ដែមន្ត្រីនគរបាលយុត្តិធម៌ និងតំណាងអយ្យការ នៅតែមិនទាន់មានចំណាត់ការលើលោក លោក គឹម សារិទ្ធ នាយរងអធិការកិច្ចចតុមុខ និងគូកន ដែលជាប់សង័្សយជាជនបង្ក ហើយពួកគេនៅតែមានសេរីភាពនៅឡើយ ទើបមហាជនរិះគន់ថា នេះពិតជាអយុត្ដិធម៌ខ្លាំងណាស់។
ជនរងគ្រោះ ឈ្មោះ ភឹម វី រស់នៅភូមិព្រៃផ្គាំ ឃុំព្រៃផ្គាំ ស្រុកអង្គរបុរី ខេត្តតាកែវ បានរងនូវអំពីហិង្សាពីលោក គឹម សារិទ្ធ នាយរងអធិការកិច្ចចតុមុខ និងបក្ខពួករបស់គាត់។ ប៉ុន្ដែជនរងគ្រោះ បានស្លាប់ កាលពីថ្ងៃទី២១ ខែមករា ឆ្នាំ២០២១។
អ្នកស្រី យឹម ជ្រឿន ភរិយារបស់សពជនរងគ្រោះ (ភីម វី) បានប្រាប់អ្នកសារព័ត៌មានថា ប្តីរបស់គាត់បានស្លាប់ ដោយសារការទទួលរងនូវអំពើហិង្សាពីលោក គឹម សារិទ្ធ នាយរងអធិការកិច្ចចតុមុខ។ ប៉ុន្ដែរហូតមកទល់នឹងពេលនេះ គាត់មិនទាន់ទទួលបានសំណងអ្វីសូម្បីមួយរៀល ។ សព្វថ្ងៃនេះ គាត់កំពុងតែទន្ទឹងរង់ចាំនូវយុត្តិធម៌ពីស្ថាប័នមានសមត្ថកិច្ច ជាពិសេស ពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ។
ដោយឡែក លោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ បានប្រាប់អ្នកសារព័ត៌មាន កាលពីល្ងាច ថ្ងៃទី២១ ខែមករា ឆ្នាំ២០២១ ថា លោកបានបញ្ជាឲ្យនគរបាលព្រហ្មទណ្ឌកម្រិតធ្ងន់ ស្រាវជ្រាវលើករណីនេះហើយ។
ទោះជាយ៉ាងណាក្ដី ក្រុមគ្រួសាររបស់ជនរងគ្រោះ នៅតែសង្ឃឹមថា តំណាងអយ្យការ នឹងចាត់ការ ក្នុងរឿងនេះ ហើយស្ថាប័នតុលាការនឹងផ្ដល់យុត្តិធម៌ជូនជនរងគ្រោះជាក់ជាមិនខាន។
សូមជម្រាបថា ហេតុការណ៍អំពើហិង្សានេះ បានកើតឡើង កាលពីយប់ ថ្ងៃទី៦ ខែមករា ឆ្នាំ២០២១នៅចំណុចកោះអញ្ចាញ ស្ថិតក្នុងឃុំទ្រា ស្រុកសំរោង ខេត្តតាកែវ។ បើទោះជាអំពើហិង្សានោះ ត្រូវបានគេចោទប្រកាន់ថា បានប្រព្រឹត្តឡើង ដោយលោក គឹម សារិទ្ធ ក្ដី ប៉ុន្ដែជនបង្កនៅតែព្យាយាមបដិសេធ ចំពោះសកម្មភាពដែលខ្លួនប្រព្រឹត្ត។ ជាមួយគ្នានេះដែរ កាលពីពេលថ្មីៗនេះ លោក គឹម សារិទ្ធ បានបកស្រាយថា លោកមិនបានប្រើអំពើហិង្សាទៅលើជនរងគ្រោះនោះទេ ប៉ុន្ដែករណីខាងលើ ជាឧបទ្ទហេតុ នៃទូកបុកគ្នាតែប៉ុណ្ណោះ ៕