រាជធានីភ្នំពេញ៖ ប្រជាពលរដ្ឋមួយគ្រួសារ ត្រូវបានគេរាយការណ៍ច្រឡំថា កូនប្រុសរបស់ខ្លួនជួបគ្រោះថ្នាក់ចរាចរណ៍ស្លាប់ ក៏ទៅដឹកសាកសព ទាំងមិនបានពិនិត្យមើលឲ្យល្អិតល្អន់ លុះពេលកំពុងតែធ្វើបុណ្យសព ស្រាប់តែប្រទះឃើញកូនរបស់ខ្លួនដើរត្រឡប់មកផ្ទះវិញ ធ្វើឲ្យភ្ញាក់ផ្អើល ស្មានថាខ្មោចលង។ ហេតុការណ៍នេះ បានកើតឡើង កាលពីវេលាម៉ោង៤ទៀបភ្លឺ ឈានចូលថ្ងៃទី២២ ខែមករា ឆ្នាំ២០២១ ស្ថិតក្នុងខណ្ឌដង្កោ។
ប្រភពព័ត៌មាន បានឲ្យដឹងថា មុនពេលកើតហេតុ គេបានឃើញបុរសម្នាក់មិនស្គាល់អត្តសញ្ញាណទំនងជាមានសតិមិនគ្រប់ ស្លៀកកន្សែងពោះគោ ដើរឆ្លងផ្លូវលេខ៣៧១ ក្នុងទិសដៅពីជើងទៅត្បូង។ លុះពេលគាត់ដើរឆ្លងផ្លូវបានបន្តិច ស្រាប់តែរថយន្តសណ្តោងទូកុងតឺន័រមួយគ្រឿង ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3B-3934 បើកយ៉ាងលឿន តាមបណ្ដោយផ្លូវលេខ៣៧១ ក្នុងទិសដៅពីកើតទៅលិច ជ្រុលទៅបុក និងកិនជនរងគ្រោះ អូសចូលក្រោមរថយន្ត ចម្ងាយជិត៥០ម៉ែត្រ បណ្ដាលឲ្យបែកក្បាល ធ្លាយខួរ ដាច់សាច់ជាបំណែកៗ បាត់បង់ជីវិតយ៉ាងអាណោចអាធ័ម មើលមុខលែងស្គាល់។ ឃើញហេតុការណ៍ដ៏រន្ធត់បែបនេះ អ្នកបើកបរបានឈប់រថយន្ដ ហើយរត់គេចខ្លួនបាត់ស្រមោល ដោយបន្សល់ទុករថយន្តកុងតឺន័រចោល ធ្វើឲ្យកកស្ទះចរាចរណ៍រាប់ម៉ោង នៅទីនោះ។
ប្រភពព័ត៌មានដដែល បានបន្ដថា ក្រោយពេលកើតហេតុ សមត្ថកិច្ចបានទាក់ទងទៅសាច់ញាតិរបស់ជនរងគ្រោះ។ រីឯការទាក់ទងនោះ បានច្រឡំមនុស្ស ហើយអ្នកទៅទទួលនោះ ក៏មិនមែនជាសាច់ញាតិរបស់ជនរងគ្រោះដែរ ហើយអ្នកដែលសមត្ថកិច្ចទាក់ទងទៅនោះ ក៏បានមកទទួល ទាំងមិនបានពិនិត្យមើលឲ្យដឹងច្បាស់លាស់ថា សាកសពនោះជាកូនរបស់ខ្លួនឬយ៉ាងគិតតែដឹកសពទៅធ្វើបុណ្យ ព្រោះដឹងតែថា កូនប្រុសរបស់ខ្លួនបានបាត់ពីផ្ទះ។
ប្រភពព័ត៌មានដដែល បានបន្ដថា បន្ទាប់មក ពួកគាត់បានដឹកសាកសពនាំទៅតម្កល់ទុកធ្វើបុណ្យ នៅក្នុងវត្តឫស្សីសាញ់ ស្ថិតក្នុងខណ្ឌដង្កោ។ លុះមកដល់វេលាម៉ោង៤ទៀបភ្លឺ ឈានចូលថ្ងៃទី២២ ខែមករា ស្រាប់តែបុរសម្នាក់ដែលសមត្ថកិច្ចអះអាងថា បានបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍នោះ បានដើរត្រឡប់មកផ្ទះវិញ ធ្វើឲ្យសាច់ញាតិភ្ញាក់ផ្អើល នឹកស្មានតែខ្មោចលង។ ប៉ុន្ដែតាមការពិត គាត់នៅរស់សោះ។ ដោយឡែកជនរងគ្រោះដែលបាត់បង់ជីវិតខាងលើនេះ ក៏ទំនងជាជនមានសតិមិនគ្រប់។
ទោះជាយ៉ាងណា អ្នកដែលរៀបចំធ្វើបុណ្យច្រឡំសពនោះ ក៏នៅតែបន្តធ្វើបុណ្យ នៅវត្តឫស្សីសាញ់ សម្រាប់បង្គ្រប់កិច្ចមួយព្រឹកទៀត ឲ្យចប់ចុងជាប់ដើម ដើម្បីឧទ្ទិសកុសលដល់ជនរងគ្រោះ និងញាតកាទាំង៧សន្ដានរបស់ពួកគាត់ផងដែរ។
ក្រោយពេលកើតហេតុ រថយន្តកុងតឺន័រ ត្រូវបានសមត្ថកិច្ចជំនាញចរាចរណ៍រាជធានី វាស់វែងរួចហើយយកទៅរក្សាទុក នៅការិយាល័យនគរបាលចរាចរណ៍ជើងគោក នៃស្នងការដ្ឋានរាជធានីភ្នំពេញ ដើម្បីរង់ចាំដោះស្រាយគ្នា នៅពេលក្រោយ៕