រាជធានីភ្នំពេញ៖ អាជ្ញាធររាជធានីភ្នំពេញ បានថ្លែងថា រុស្ស៊ីនឹងបញ្ជូនវ៉ាក់សាំងបង្ការកូវីដ-១៩ ចំនួន១០លានដូស មកឲ្យកម្ពុជា នាពេលខាងមុខនេះ។
លោកឃួង ស្រេង អភិបាលរាជធានីភ្នំពេញ បានឲ្យដឹងថា នៅក្នុងជំនួប រវាងលោក និង លោក អាណាតូលី បូរ៉ូវីគ (H.E. Anatoly BOROVIK ) ឯកអគ្គរដ្ឋទូតវិសាមញ្ញ និងពេញសមត្ថភាពថ្មីរបស់សហព័ន្ធន៍រុស្ស៊ី ប្រចាំនៅព្រះរាជាណាចក្រកម្ពុជា កាលពីរសៀល ថ្ងៃទី២០ ខែមករា ឆ្នាំ២០២១ នៅសាលារាជធានីភ្នំពេញ នោះ ឯកអគ្គរដ្ឋទូតរុស្ស៊ី បានលើកឡើងថា រុស្ស៊ីបានមានទំនាក់ទំនងការទូតល្អជាមួយនឹងកម្ពុជា អស់រយៈពេល៦៥ឆ្នាំហើយ។
ឯកអគ្គរដ្ឋទូតរុស្ស៊ី បានបញ្ជាក់ថា បញ្ហាស្ថានភាពជំងឺកូវីដ–១៩ នាពេលបច្ចុប្បន្ននេះ បានធ្វើឲ្យប៉ះពាល់ដល់បណ្ដាប្រទេសនានា នៅលើពិភពលោក រួមទាំងកម្ពុជា និងរុស្ស៊ីផងដែរ។ ប៉ុន្ដែរុស្ស៊ីបានអភិវឌ្ឍវ៉ាក់សាំង (Sputnik V) សម្រាប់ចាក់ការពារជំងឺដ៏កាចសាហាវនេះ។
ឯកអគ្គរដ្ឋទូតរុស្ស៊ី បានបន្ថែមថា ដោយសារទំនាក់ទំនងការទូតល្អនឹងគ្នានោះ អាជ្ញាធររុស្ស៊ី គ្រោងនឹងបញ្ជូនវ៉ាក់សាំងនេះ មកឲ្យប្រទេសកម្ពុជា នាពេលខាងមុខនេះ។ ប៉ុន្ដែយើងត្រូវពិភាក្សាគ្នាជាមួយក្រសួងសុខាភិបាលកម្ពុជា ដើម្បីបញ្ជូនវ៉ាក់សាំង (Sputnik V) បង្ការកូវីដ-១៩នេះមកឲ្យកម្ពុជា។
ជាមួយគ្នានេះដែរ លោក ឃួង ស្រេង អភិបាលរាជធានីភ្នំពេញ បានថ្លែងការអរគុណ ចំពោះរុស្ស៊ី ដែលគ្រោងនឹងបញ្ជូនវ៉ាក់សាំង Sputnik V មកឲ្យកម្ពុជា នាពេលខាងមុខនេះ។ នេះជាសន្តានចិត្តដ៏ប្រសើរបំផុតរបស់រុស្ស៊ី សម្រាប់ប្រទេសកម្ពុជា។ ដោយឡែកសម្រាប់ការវិនិយោគទុនវិញ រដ្ឋបាលរាជធានីភ្នំពេញ នឹងបង្កលក្ខណៈងាយស្រួលគ្រប់យ៉ាង សម្រាប់វិនិយោគិនរបស់ប្រទេសរុស្ស៊ី ដែលចង់មកបណ្ដាក់ទុនរកស៊ី នៅក្នុងប្រទេសកម្ពុជា ជាពិសេស នៅក្នុងរាជធានីភ្នំពេញ។
សូមជម្រាបថាថ ប្រទេសរុស្ស៊ី បានអភិវឌ្ឍវ៉ាក់សាំងបង្ករកូវីដ-១៩ (Sputnik-V) មុនគេ នៅលើពិភលោក។ រហូតមកដល់ពេលនេះ ប្រទេសនេះបានចាក់វ៉ាក់សាំង Sputnik V ជូនប្រជាពលរដ្ឋ រួមទាំង លោក វ៉្លាឌីមៀរ ពូទីន ប្រធានាធិបតីរុស្សី ផងដែរ។ ការចាក់វ៉ាក់សាំង Sputnik V នេះ មានប្រសិទ្ធភាព ៩២ ភាគរយ ហើយវាអាចរក្សាទុក នៅក្នុងសីតុណ្ហភាពទូទឹកកកធម្មតាបាន និងមានតម្លៃ ប្រហែល១០ដុល្លារអាមេរិក ក្នុង១ដូស៕
