បរទេស៖ ឧទ្ធម្ភាគចក្រយោធាមួយគ្រឿង កំពុងតែហោះហើរ នៅក្នុងថ្ងៃដែល លោក ចូ បៃដិន (Joe Bidden) ស្បថចូលកាន់តំណែងជាប្រធានាធិបតីទី៤៦របស់សហរដ្ឋអាមេរិក ស្រាប់តែជួបនឹងហេតុការណ៍អាក្រក់ បណ្ដាលឲ្យមនុស្ស៣នាក់បាត់បង់ជីវិត។
បើតាមសារព័ត៌មាន Localsyr បានផ្សាយថា ឧទ្ធម្ភាគចក្រយោធាមួយគ្រឿង បានជួបនឹងហេតុការណ៍ដ៏អាក្រក់ធ្លាក់ នៅក្នុងវាលស្រែរបស់កសិក នៅខាងលិចផ្លូវ Bloomfield ជិតផ្លូវរោងចក្រ Cheese ស្ថិតក្នុងទីក្រុង Mendon រដ្ឋញូវយ៉ក សហរដ្ឋអាមេរិក កាលពីថ្ងៃទី២០ ខែមករា ឆ្នាំ២០២១ (វេលានៅអាមេរិក)។ នៅក្នុងហេតុការណ៍នោះ បានបណ្ដាលឲ្យមន្រ្ដីយោធាចំនួន៣នាក់បាត់បង់ជីវិត។
ប៉ូលិសទីក្រុង Mendon បានបញ្ជាក់ថា ឧទ្ធម្ភាគចក្រខាងលើ បានធ្លាក់ នៅវេលាម៉ោង៦ និង៣២នាទីល្ងាច ថ្ងៃទី២០ ខែមករា (វេលានៅអាមេរិក) ដោយបានបណ្តាលឲ្យមន្រ្ដីយោធា៣នាក់ស្លាប់។
មន្ត្រីយោធារដ្ឋញូវយ៉ក បានបញ្ជាក់ថា ឧទ្ធម្ភាគចក្រជួបគ្រោះថ្នាក់ខាងលើ ជាប្រភេទ UH-60 ។ ឧទ្ធម្ភាគចក្រប្រភេទនេះ គឺប្រើសម្រាប់បម្រើការងារលើវិស័យសុខាភិបាលរបស់កងទ័ពអាមេរិក។ ករណីនេះ អាចបណ្ដាលមកពីឧទ្ធម្ភាគចក្រ ជួបនឹងបញ្ហាបច្ចេកទេស ទើបបណ្តាលឲ្យវាធ្លាក់បែបនេះ៕