បរទេស៖ រហូតមកដល់ពេលនេះ មានបណ្ដាញផ្សព្វផ្សាយ នៅលើពិភពលោក បានផ្សាយថា ប្រទេសន័រវ៉េស មានអ្នកស្លាប់ ក្រោយចាក់វ៉ាក់សាំងកូវីដ-១៩ បន្ដកើនឡើងដល់២៣នាក់ ខណៈបារាំង មាន៥នាក់ និងឥណ្ឌាម្នាក់ ប៉ុន្ដែគេនៅមិនទាន់ដឹងថា ករណីទាំងនោះ មានការពាក់ព័ន្ធនឹងការចាក់វ៉ាក់សាំងបង្ការកូវីដ-១៩ ឬយ៉ាងណា នៅឡើយទេ។
បើតាមបណ្ដាញផ្សព្វផ្សាយបរទេស បានឱ្យដឹងថា អ្នកស្លាប់នៅក្នុងប្រទេសបារាំង គឺមានអាយុចាប់ពី៧៥ឆ្នាំឡើង រស់នៅក្នុងផ្ទះ ហើយពួកគាត់មិនមែនរស់នៅក្នុងមណ្ឌលចាស់ជរានោះឡើយ និងមានជំងឺប្រចាំកាយជាច្រើនមុខថែមទៀតផង។ រីឯក្រុមមន្រ្ដីជំនាញបារាំង កំពុងតែស្រាវជ្រាវ លើករណីអ្នកស្លាប់ទាំងនោះ ថាតើមនុស្សចាស់ទាំង៥នាក់នោះ ស្លាប់ដោយសារការចាក់វ៉ាក់សាំងបង្ការកូវីដ-១៩ឬយ៉ាងណា?
ប្រភពព័ត៌មានដដែលបានបន្ដថា ក្រៅពីមានមនុស្ស៥នាក់ស្លាប់ ក៏នៅមានករណីប្រតិកម្មតិចតួច រហូតដល់ទៅ១៣៩នាក់ ក្រោយការចាក់វ៉ាក់សាំងបង្ការកូវីដ-១៩នេះ។ ដោយឡែកមាន៣ករណីផ្សេងទៀតបានស្លាប់ ហើយត្រូវបានផ្តល់ព័ត៌មានដល់កម្លាំងប៉ូលិស គឺម្នាក់ នៅ Nancy ម្នាក់ នៅទីក្រុង Tours និងម្នាក់ទៀត នៅ Montpellier ប្រទេសបារាំង។
ដោយឡែកនៅប្រទេសន័រវ៉េសឯណោះវិញ មន្ត្រីសុខាភិបាល បានប្រកាសថា ចំនួនអ្នកស្លាប់បានកើនឡើងដល់ទៅ ២៣នាក់ ក្រោយការចាក់វ៉ាក់សាំង បានរយៈពេល១០ថ្ងៃ។ ចំណែកវ៉ាក់សាំងដែលប្រទេសន័រវ៉េស ទិញយកមកចាក់ជូនពលរដ្ឋនោះ ផលិតដោយក្រុមហ៊ុនPfizer របស់អាមេរិក និង BioNTech របស់អាល្លឺម៉ង់។ រីឯមន្រ្ដីជំនាញសុខាភិបាលរបស់ប្រទេសនេះ ក៏កំពុងតែពិនិត្យមើលលើករណីនេះផងដែរ ថាតើវាមានការពាក់ព័ន្ធនឹងវ៉ាក់សាំងដែរទេ។
ជាមួយគ្នានេះដែរ នៅក្នុងប្រទេសឥណ្ឌា ក៏មានករណីមន្រ្ដីសុខាភិបាលម្នាក់ បានស្លាប់ក្រោយការចាក់វ៉ាក់សាំងបង្កាកូវីដ-១៩ បានរយៈពេល១៨ម៉ោង។ នេះបើតាមសារព័ត៌មាន India Today ចេញផ្សាយ កាលពីយប់ ថ្ងៃទី២០ ខែមករា ឆ្នាំ២០២១។
ក្នុងចំណោមអ្នកស្លាប់ទាំងនោះ មានចំនួន១៣នាក់ ត្រូវបានវះត្រួតពិនិត្យមូលហេតុពិតប្រាកដនៃការស្លាប់ទាំងនោះ។ លទ្ធផលបានបង្ហាញថា វាមានប្រតិកម្មតិចតួច ពាក់ព័ន្ធនឹងការចាក់វ៉ាក់សាំងកូវីដ-១៩ ហើយបូកផ្សំជាមួយជំងឺប្រចាំកាយផង ទើបធ្វើឲ្យមានប្រតិកម្ម កាន់តែខ្លាំងរហូតដល់ស្លាប់បែបនេះ។
ទោះជាយ៉ាងណា មជ្ឈមណ្ឌលចាស់ជរាន័រវ៉េស បានស្នើឲ្យមន្រ្ដីជំនាញសុខាភិបាល ត្រូវត្រួតពិនិត្យឲ្យបានល្អិតល្អន់ មុនពេលចាក់វ៉ាក់សាំងបង្ការកូវីដ-១៩ ជូនដល់មនុស្សចាស់ជរាទាំងនោះ៕
