បរទេស៖ មន្រ្ដីសុខាភិបាលឥណ្ឌាម្នាក់ បានស្លាប់ កាលពីវេលាម៉ោង៥ និង៣០នាទីព្រឹកព្រលឹម ថ្ងៃទី២០ ខែមករា ឆ្នាំ២០២១ ក្រោយពេលការចាក់វ៉ាក់សាំងបង្ការកូវីដ-១៩ អស់រយៈពេលជាច្រើនម៉ោងនោះមក។
បើតាមសារព័ត៌មាន India Today បានចេញផ្សាយ កាលពីវេលាម៉ោង៧ និង៥១នាទីយប់ ថ្ងៃទី២០ ខែមករា ឆ្នាំ២០២១ ថា មន្រ្ដីសុខាភិបាលរូបនេះ មានអាយុ៤២ឆ្នាំ បានស្លាប់ ក្រោយពេល ចាក់វ៉ាក់សាំងបង្ការជំងឺកូវីដ-១៩ អស់រយៈពេលជាច្រើនកន្លងមក។ មន្រ្ដីរូបនេះបានចាក់វ៉ាក់សាំង នៅវេលាម៉ោង១១ និង៣០នាទីព្រឹក ថ្ងៃទី១៩ ខែមករា ឆ្នាំ២០២១ នៅក្នុង Kuntala PHC ស្រុក Nirmal រដ្ឋ Telangana ប្រទេសឥណ្ឌា។ ក្រោយមក គាត់បានស្លាប់ នៅវេលាម៉ោង៥ និង៣០នាទីព្រឹក ថ្ងៃទី២០ ខែមករា ខណៈបញ្ជូនទៅកាន់មន្ទីរពេទ្យស្រុក។
ប្រភពព័ត៌មានដដែល បានបន្ដថា ក្រោយពេលចាក់វ៉ាក់សាំងនោះមក មន្រ្ដីសុខាភិបាលរូបនោះ បានចាប់ផ្ដើមឈឺដើមទ្រូង នៅវេលាម៉ោង២ និង៣០នាទីរំលងអធ្រាត្រ ឈានចូល ថ្ងៃទី២០ ខែមករា ឆ្នាំ២០២១។ ប៉ុន្ដែក្រោយមក គេបានបញ្ជូនគាត់ទៅមន្ទីរពេទ្យ ជាកន្លែងដែលគាត់បានស្លាប់។
ដោយឡែកគណៈកម្មាធិការស្រុក AEFI (Adverse event following immunization Committee) បានឲ្យដឹងថា បើតាមការពិនិត្យជាបឋម ករណីស្លាប់របស់មន្រ្ដីសុខាភិបាលខាងលើនេះ មិនមានការពាក់ព័ន្ធនឹងការចាក់វ៉ាក់សាំងនោះឡើយ។
ទោះជាយ៉ាងណា ក្រុមវេជ្ជបណ្ឌិតនៅតែបន្ដស្រាវជ្រាវលើករណីនេះបន្ថែមទៀត។ រីឯគណៈកម្មាធិការ AEFI ថ្នាក់ស្រុក កំពុងតែពិនិត្យលើបញ្ហានេះ ហើយនឹងដាក់របាយការណ៍របស់ខ្លួនជូនទៅគណៈកម្មាធិការ AEFI ថ្នាក់រដ្ឋ។ ចំណែកឯគណៈកម្មាធិការ AEFI ថ្នាក់រដ្ឋ នឹងពិនិត្យមើលលើសេចក្ដីរាយការណ៍របស់ខ្លួន មុននឹងដាក់ជូនគណៈកម្មាធិការកណ្ដាល AEFI ត្រួតពិនិត្យ៕
