ខេត្តស្វាយរៀង៖ សង្ឃវ័យក្មេង១អង្គ ត្រូវសមត្ថកិច្ចឃាត់ខ្លួនប្រគល់ឲ្យមន្រ្ដីសង្ឃចាប់ផ្សឹក កាលពីរសៀល ថ្ងៃទី១១ ខែមករា ឆ្នាំ២០២១ នៅក្នុងវត្តព្រៃខ្លូត (វត្ដច្រេស) ស្ថិតក្នុងភូមិត្រពាំង ដៀលើ ឃុំច្រេស ស្រុកចន្ទ្រា មុនពេលយកទៅចាត់ការតាមផ្លូវច្បាប់ ពីបទចាប់រំលោភក្មេងស្រីក្នុងវត្ត។
សង្ឃទ្រុស្ដសីល មានព្រះនាម អ៊ន ឆៃរ៉ាក់ ព្រះជន្ម២១ឆ្នាំ ជនជាតិខ្មែរ មានទីលំនៅក្នុងភូមិទួលពង្រ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្ន បានមកសំងំគង់នៅក្នុងវត្តព្រៃខ្លូត ហៅវត្តច្រេស ស្ថិតក្នុងភូមិត្រពាំងដៀលើ ឃុំច្រេស ស្រុកចន្រ្ទា ខេត្តស្វាយរៀង។
សមត្ថកិច្ច បញ្ជាក់ថា ការចាប់ផ្សឹកសង្ឃកំហូចខាងលើនេះ ធ្វើឡើងតាមដីកាលេខ៤៥៣៥ ចេញដោយលោកឡុង ស៊ីថា តំណាង អយ្យការសាលាដំបូង ខេត្តកំពង់ឆ្នាំង ពាក់ពន្ធ័នឹងករណីរំលោភសេពសន្ថវៈមានស្ថានទម្ងន់ទោស ដែលប្រព្រឹត្តនៅក្នុងវត្តសិរីសុវណ្ណ ហៅវត្តថ្មី ស្ថិតក្នុងភូមិអូរតានេស ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។
សមត្ថកិច្ច បញ្ជាក់ថា ក្រោយពេលចាប់ផ្សឹករួច សមត្ថកិច្ចបានជនចោទខាងលើទៅកាន់ការិយាល័យប្រឆាំងការជួញដូរមនុស្ស និងការពារអនីតិជនស្នងការដ្ឋាននគរបាលខេត្តកំពង់ឆ្នាំង ជាម្ចាស់សំណុំរឿង ដើម្បីចាត់ការ តាមច្បាប់៕
