រាជធានីភ្នំពេញ៖ ក្រោយពីបែកធ្លាយរូបភាពបុរសម្នាក់ ដែលបណ្តាញសារព័ត៌មានបានចុះផ្សាយថាជាឃាតករបាញ់សម្លាប់នាយរងការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ ក្នុងហេតុការណ៍គ្រោះថ្នាក់ចរាចរណ៍នៅមុខ ព្រលានយន្តហោះអន្តរជាតិភ្នំពេញ បុរសជាម្ចាស់រូបភាពបានបញ្ជាក់ប្រាប់ សារព័ត៌មានក្នុងស្រុក តាមទូរសព្ទ័នាព្រឹកថ្ងៃទី៦ ខែមករា ឆ្នាំ២០២១ នេះថា រូបលោកមិនមែនជាឃាតុករដែលសមត្ថកិច្ចកំពុងតែតាមប្រម៉ាញ់នោះទេ ពោលគឺគាត់សព្វថ្ងៃគាត់កំពុងប្រកបការងារធ្វើស្រែចំការនៅ ស្រុកត្រពាំងប្រាសាទជាធម្មតា។
លោកថា រូបភាពដែលបណ្តាញសង្គមហ្វេសប៊ុគ និងសារព័ត៌មានភាគច្រើនបានផ្សព្វផ្សាយ គឺជារូបភាពតាំងពី៧ឆ្នាំមុនមកម្លេះ ។
រូបលោកមានឈ្មោះ លីម ឈាង សព្វថ្ងៃជាកសិកធ្វើស្រែចំការ រស់នៅភូមិទួលតាសេក ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ។
ជាមួយគ្នានេះដែរលោកក៏បានស្នើរសុំអោយបណ្តាញសង្គមហ្វេសប៊ុក និងសារព័ត៌មានដែលបានយករូបថតរបស់លោកហើយសរសេរថា ជាជនសង្ស័យឃាតករបាញ់សម្លាប់មន្ត្រីនគរបាល មេត្តាជួយកែតម្រូវ ព្រោះវាប៉ះពាល់ដល់កត្តិយសគាត់ជាខ្លាំង ៕