ខេត្តមណ្ឌលគិរី៖ ដំរីព្រៃចំនួន២ហ្វូង កាលពីថ្ងៃទី៤ ខែមករា ឆ្នាំ២០២១ បានចូលមកអុកឡុក និងបំផ្លាញផលដំណាំ បង្កឲ្យប្រជាពលរដ្ឋ រស់នៅក្នុងឃុំប៉ក់ញ៉ៃ និងឃុំយ៉ាទុង ស្ថិតក្នុងស្រុកអូរយ៉ាដាវ ខេត្តរតនគិរី មានការភ័យខ្លាច។
លោក ស៊ឹម លីន អភិបាលរងស្រុកអូរយ៉ាដាវ បានឲ្យដឹងថា ហ្វូងសត្វដំរីព្រៃទាំងនេះ មានប្រមាណជាង១៥ក្បាល ដើរចល័ត នៅក្នុងឃុំប៉ក់ញ៉ៃ និងឃុំយ៉ាទុង នាពេលយប់។ រីឯចរិតរបស់ពួកវាមានភាពកាចសាហាវ ហើយពួកវាបានដើរបំផ្លាញផលដំណាំបំ, ស៊ីស្រូវ និងបំផ្លាញសម្ភាររបស់អ្នកភូមិផងដែរ។
លោកអភិបាលរងស្រុក បានបន្ដថា ក្រោយពេលមានសេចក្ដីរាយការណ៍បែបនេះ លោកបានដឹកនាំកម្លាំងប្រដាប់អាវុធ រួមមាន កម្លាំងសឹករងស្រុក កម្លាំងនគរបាលស្រុក និងកម្លាំងបរិស្ថានឧទ្យានជាតិអូរយ៉ាដាវ ចុះទៅធ្វើអន្តរាគមន៍ នៅក្នុងឃុំយ៉ាទុង ស្រុកអូរយ៉ាដាវ ។
លោកអភិបាលរងស្រុក បានបញ្ជាក់ថា ហ្វូងដំរីព្រៃ នៅក្នុងឧទ្យានជាតិស្រុកអូរយ៉ាដាវ នេះមានប្រហែល៤០ទៅ៥០ក្បាល ហើយដំរីព្រៃទាំងនេះបានដើរដាច់ហ្វូងពីគ្នា។ ប៉ុន្ដែដោយសារសំណូមពរ ពីប្រជាពលរដ្ឋឲ្យដាក់កងកម្លាំងប្រដាប់អាវុធប្រចាំការផងនោះ ទើបគណៈបញ្ជាការឯកភាពរដ្ឋបាលស្រុក បានសម្រេចដាក់កម្លាំងចំនួន២គោលដៅ គឺនៅភូមិដតូច ចំនួន៤នាក់ និងភូមិខ្វែង ចំនួន៤នាក់ (ឃុំយ៉ាទុង) ដោយសហការជាមួយកម្លាំងប្រជាពលរដ្ឋ នៅក្នុងភូមិ តាមយាមឃ្លាំមើលហ្វូងដំរីព្រៃទាំងនេះ។
តំណាងប្រជាពលរដ្ឋ រស់នៅឃុំយ៉ាទុង បានឲ្យដឹងថា ក្នុងរយៈពេល៥ទៅ៦ថ្ងៃនេះ ហ្វូងដំរីព្រៃ តែងតែចូលមកក្នុងភូមិរបស់ពួកគាត់ ហើយពួកវាបានបំផ្លាញខ្ទមចាំចម្ការ អស់ចំនួន១០ខ្នង, ស្រូវចំនួន៥៩បាវ, ដើមចន្ទីចំនួន១០ដើម, ម៉ាស៊ីនកាត់ស្មៅ៣គ្រឿង, ម៉ាស៊ីនបាញ់ស្មៅ៤គ្រឿង និងសម្ភារចានឆ្នាំងមួយចំនួនទៀត។
អ្នកភូមិដដែល បានបញ្ជាក់ថា ដោយសារតែសកម្មភាពរបស់ហ្វូងដំរីព្រៃខាងលើនេះ ទើបពួកគាត់សំណូមពរឲ្យសមត្ថកិច្ចជំនាញ និងស្ថាប័នពាក់ព័ន្ធកៀងដំរីទាំងនោះ ឲ្យចូលទៅក្នុងព្រៃធំវិញ ដើម្បីបង្ការហានិភ័យដល់កូនចៅរបស់ពួកគាត់ ខណៈកំពុងធ្វើដំណើរ នៅពេលយប់ ដូចជាឈឺស្កាត់ និងដឹកបញ្ជូនស្ត្រីឈឺពោះ ទៅកាន់មណ្ឌលសុខភាព។បើតាមអ្នកជំនាញបរទេស បានឲ្យដឹងថា បណ្ដាប្រទេសមួយចំនួន នៅតំបន់អាហ្វ្រិក ក៏មានករណីដំរីព្រៃចូលមកអុកឡុក និងបំផ្លាញផលដំណាំរបស់អ្នកស្រុកអ៊ីចឹងដែរ។ ប៉ុន្ដែក្រោយមក ពួកគាត់បានចិញ្ចឹមឃ្មុំ ធ្វើជារបង នៅតាមចម្ការទាំងនោះ ទើបដំរីលែងចូលមកឆាឆៅ ឬបំផ្លាញដំណាំទាំងនោះ។ ការចិញ្ចឹមឃ្មុំបែបនេះ គឺកសិករបានទាំងទឹកឃ្មុំលក់បានលុយផង និងរារាំងដល់សត្វដំរីផង ព្រោះដំរី ថ្វីត្បិតតែវាមានមាឌធំជាងគេនៅលើផែនដីនេះមែនតែវាក្លាយសត្វល្អិតទាំងនោះ៕