យល់ដឹង៖ បងប្អូនទាំងអស់គ្នាប្រាកដជាធ្លាប់ដឹងហើយអំពីបង្អែមបាញ់ចានឿក បង្អែមនេះជាបង្អែមខ្មែរ ដែលពេញនិយមធ្វើនៅពេលដែលមានកម្មវិធីម្ដងៗ។ ដូច្នេះ ថ្ងៃនេះ KBN សូមណែនាំពីវិធីធ្វើនំដូចខាងក្រោម៖
១.គ្រឿងផ្សំ
-ស្ករត្នោត
-ល្ងរស
-អំបិល
-ខ្ទិះដូង
-ម្សៅដំណើប
-សណ្តែកលឿង
-ម្សៅឆា (រូបយន្តហោះ)
-ខ្ញី ប្រហែល ពីរដុំ
២.របៀបធ្វើ
-របៀបធ្វើទឹកស្ករ៖ មុនដំបូងយកខ្ញីមកហាន់ជាបន្ទះស្តើងៗ រួចយកឆ្នាំងដាក់ដាំដោយបើកភ្លើងល្មម ចាក់ស្ករត្នោតចូលកូរអោយឡើងក្រហមបន្តិចក៏ដាក់ខ្ញីទាំងអស់នោះចូល កូរអោយឡើងឈ្ងុយទើបចាក់ចុងខ្ទិះចូល បង់អំបិលបន្តិច កូរវាអោយពុះសព្វជាការស្រេចដោយទុកមួយអន្លើរសិន ។ភ្លក់ថារសជាតិផ្អែមល្មមឬនៅ។
-របៀបធ្វើស្នូលនំប្រៃល្មមៗ៖ មុនដំបូងយកសណ្តែកលឿងមកលាងទឹកអោយស្អាត រួចត្រាំវាចោលកន្លះម៉ោងទើបយកទៅស្ងោរដោយដាក់អំបិលចូលបន្តិច រំងួសអោយរីកគោកទឹកល្អ បន្ទាប់មកទៀតយកមកកិនឬ សង្កត់អោយម៉ត់ល្អ ទើបយកមកពូនជាដុំតូចៗល្មម ជាការស្រេច។
-របៀបលាយម្សៅដំណើប៖ យកម្សៅដំណើបមកលាយជាមួយទឹកត្រជាក់ធម្មតា លាយបញ្ចូលគ្នារហូតដល់ម្សៅមិនស្អិតជាប់ដៃ បន្ទាប់យកមកលុនជាដុំមូលៗ ហើយសង្កត់អោយត្រប៉ែតលើបាតដៃ រួចយកស្នូលដែរធ្វើរួចយកមកខ្ចប់ជាមួយម្សៅ ជាការស្រេច ។
-របៀបលាយម្សៅសាគូ៖ សាគូ ត្រូវយកមកលាងទឹកអោយស្អាតហើយ ស្រង់ដាក់ចានរួចចាក់ទឹកក្តៅចូលល្មមអោយរីកបន្តិច ទុកអោយត្រជាក់បន្តិចដែរទើបយកម្សៅរូប យន្តហោះមកលាយបញ្ចូលអោយស្មើសព្វ ដូចក្នុងរូប រួចយកមកខ្ចប់ដូចម្សៅដំណើបដែរ ហើយ របៀបស្ងោរយកទឹកដាក់ចូលឆ្នាំងរាងជ្រៅបន្តិចងាយស្រួលស្ងោរ ដោយដាក់ដាំទឹកអោយពុះសិនទើបយក នំដែរខ្ចប់ទាំងអស់នោះមកបង់ចូលឆ្នាំងកំពុងពុះនោះ ដោយបើកភ្លើងល្មម កុំខ្លាំងពេក ទុករហូតដល់នំអណ្តែតឡើងមកលើ រាងយូរតិច បញ្ចាក់ថានំឆ្អិនល្អហើយ ។
ជាចុងក្រោយលោកអ្នកគ្រាន់តែដួសគ្រឿងផ្សំទាំងអស់នោះបញ្ចូលគ្នា ចូលក្នុងចានហើយស្រោចទឹកខ្ទិះដើមពីលើនិងរោយល្ងរលីងតិចៗជាការស្រេច ។ លោកអ្នកនឹងទទួលបានបង្អែមដ៏ឈ្ងុយឆ្ងាញ់ សំរាប់ជួបជុំគ្រួសារផងដែរ។
ប្រភព៖ ចុងភៅ
