ប្រធានាធិបតីអាមេរិកជិតផុតអាណត្តិដូណាល់ ត្រាំបានធ្វើរឿងមួយគួរឱ្យចង់សើចបំផុត​មុនពេលលោកឈាន​ជើង​​ប្រជែងតំណែងប្រធានាធិបតីនៅឆ្នាំ ២០១៦។

នៅឆ្នាំ ២០១៥ដូណាល់ ត្រាំបានពឹងពាក់មេធាវីលោក Michael Cohen ឱ្យគំរាមចាត់វិធានការ​តាមផ្លូវច្បាប់​បើសិនសកលវិទ្យាល័យ Fordham University និងសាលាយោធា The New York Military Academy ហ៊ានបញ្ចេញកំណត់ហេតុការសិក្សារបស់លោកជាសាធារណៈ។ ស្ថាប័នអប់រំទាំងពីរសុទ្ធសឹង​ជាកន្លែងយុវជន​ដូណាល់ ត្រាំធ្លាប់រៀនសូត្រនៅទីនោះ។ ពោលនៅវ័យជំទង់ ១៣ ឆ្នាំដូណាល់ ត្រាំបានរៀននៅសាលាយោធា The New York Military Academy ហើយនៅអាយុ ១៨ឆ្នាំរូបគេចូលថ្នាក់មហាវិទ្យាល័យនៅ Fordham University។

ពីរឆ្នាំក្រោយមកទើបប្តូរទៅរៀននៅសកលវិទ្យាល័យ Wharton School of the University of Pennsylvania ដោយបញ្ចប់ថ្នាក់បរិញ្ញាប័ត្រដំបូងនៅអាយុ ២២ឆ្នាំជំនាញវិទ្យាសាស្រ្តសេដ្ឋកិច្ច។ មានរឿងងើង ឆ្ងល់មួយត្រង់ថាត្រាំបានបញ្ចប់ថ្នាក់មហាវិទ្យាល័យដំបូងនៅ Wharton តែរូបគេមិនដែលទទួលបានចំណាត់​ថ្នាក់ក្នុងតារាង៕