ទីក្រុងឡុងដ៍៖ ស្រ្ដីម្នាក់ មិនដឹងជាមានវិបត្ដិអ្វី បែរជាដើរចូលទៅក្នុងផ្សារទំនើប «Aldi» ហើយបានទាញដបស្រារាប់រយដប ទម្លាក់ចោលបណ្ដាលឲ្យបែកខ្ចាយពេញផ្សារ បង្កការភ្ញាក់ផ្អើលឡើង កាលពីរសៀលថ្ងៃពុធសប្ដាហ៍មុន (ថ្ងៃទី២៥ ខែវិចិ្ឆកា) នៅក្នុងទីក្រុង Stevenage ចក្រភពអង់គ្លេស។
បើតាមឃ្លីបវីដេអូ ដែលថតពីសកម្មភាពនេះ បានបង្ហាញថា ស្ដ្រីខាងលើនេះ បានប្រើដៃរបស់នាង ទាញដបស្រា ដែលគេតម្រៀបលើធ្នើរ រាប់រយដប បណ្ដាលឲ្យដបស្រាទាំងនោះ ធ្លាក់បែកពេញឥដ្ឋតែម្ដង។ រីឯស្រ្ដីនោះ បានរអិលជើងដួលអុកគូទទៅលើឥដ្ឋ។ ប៉ុន្ដែស្រ្ដីនោះនៅតែព្យាយាមក្រោកឡើង ដើម្បីទាញទម្លាក់ដបស្រាបន្ដទៀត។
ដោយឡែកអ្នកគ្រប់គ្រងផ្សារទំនើប បានប៉ាន់ប្រមាណថា ស្រ្ដីរូបនោះបានបង្កការខូចខាត សរុបជាទឹកប្រាក់ប្រហែល ១៣៣ ០០០ដុល្លារអាមេរិក ដោយគិតលើចំនួនដបស្រា និងប្រាក់ចំណូល ដែលត្រូវទទួលបាន នៅក្នុងអំឡុងពេលពួកគេបង្ខំចិត្ដ បិទហាង ដើម្បីលាងសម្អាត។
បើតាមសារព័ត៌មាន The Comment បានឲ្យដឹងថា ប៉ូលិសបានទៅដល់ទីតាំងកើតហេតុ នាម៉ោងប្រហែល២ និង៣០នាទីរសៀល ថ្ងៃដដែល ហើយបានចាប់ខ្លួនជនបង្កនោះ រួចបញ្ជូននាំខ្លួនទៅព្យាបាលរបួស នៅមន្ទីរពេទ្យ មុននឹងនាំទៅចាត់ការតាមផ្លូវច្បាប់៕