រាជធានីភ្នំពេញ៖ ក្រោយការផ្អាកជើងហោះហើរ ដោយសារវិបត្ដិកូវីដ-១៩នោះមក ក្រុមហ៊ុនអាកាសចរណ៍ជប៉ុន ANA (All Nippon Airways) នឹងចាប់ផ្ដើមដំណើរការជើងហោះហើររបស់ខ្លួនឡើងវិញ មកកាន់រាជធានី ភ្នំពេញ នៅខែធ្នូ ខាងមុខនេះ។
ជាមួយគ្នានេះ ក្រសួងទេសចរណ៍ នៃព្រះរាជាណាចក្រកម្ពុជា បានសម្ដែងនូវការអបអរសាទរ និងស្វាគមន៍ចំពោះការហោះហើរឡើងរបស់ក្រុមហ៊ុនអាកាសចរណ៍ជប៉ុន ANA ដោយចេញពីទីក្រុងតូក្យូ ឆ្ពោះត្រង់មកទីក្រុងភ្នំពេញ (ណារីតា-ភ្នំពេញ-ណារីតា)។ ជើងហោះហើរនេះ នឹងចាប់ផ្ដើម ពីថ្ងៃទី២ ទី៥ ទី៩ ទី១២ ទី១៦ ទី១៩ ខែធ្នូ ឆ្នាំ២០២០ និងថ្ងៃទី៩ និងទី២៣ ខែមករា ឆ្នាំ២០២១។ នេះជាការចាប់ផ្ដើមហោះហើរឡើងវិញរបស់ក្រុមហ៊ុនអាកាសចរណ៍ជប៉ុនមួយនេះ បន្ទាប់ពីប្រកាសផ្អាកការហោះហើរ អស់មួយរយៈមក ដោយសារការរាតត្បាត នៃជំងឺកូវីដ-១៩។
រហូតមកដល់ពេលនេះ កម្ពុជា ក្លាយជាប្រទេសមួយ មានសុវត្ថិភាពល្អ សម្រាប់វិស័យទេសចរណ៍ ក្នុងការធ្វើដំណើរកម្សាន្ដ នៅក្នុងអំឡុងពេល នៃវិបត្តិជំងឺកូវីដ-១៩។ បើតាមពិនិត្យមើលលើតារាង នៃបណ្ដាប្រទេសមានឆ្លងកូវីដ-១៩ គឺកម្ពុជាគ្រប់គ្រងការឆ្លងរាតត្បាត នៃជំងឺកូវីដ-១៩បានល្អ។
មន្ត្រីជាន់ខ្ពស់ នៃស្ថានទូតជប៉ុនប្រចាំកម្ពុជា បានបញ្ជាក់ថា ការបើកការហោះហើរឡើងវិញនេះ ក៏ជាកិច្ចសហប្រតិបត្តិការល្អ រវាងព្រះរាជាណាចក្រកម្ពុជា និងជប៉ុន នៅក្នុងការជំរុញ និងលើកកម្ពស់វិស័យទេសចរណ៍ រវាងប្រទេសទាំងពីរ។
រហូតមកដល់ពេលនេះ ក្រសួងទេសចរណ៍បាន និងកំពុងរៀបចំកម្មវិធីទស្សនកិច្ច «ការធ្វើដំណើរ និងទេសចរណ៍សុវត្ថិភាព(Travel Bubble)» ដោយអនុញ្ញាតឲ្យភ្ញៀវទេសចរអន្តរជាតិ ជាពិសេស ភ្ញៀវទេសចរជប៉ុន អាចធ្វើដំណើរមកកាន់ព្រះរាជាណាចក្រកម្ពុជា ប្រកបដោយសុវត្ថិភាពខ្ពស់បំផុត៕