ទីក្រុងតៃប៉ិ៖ សមាជិកសភាបក្សប្រឆាំងរបស់កោះតៃវ៉ាន់ (KMT) នៅថ្ងៃទី២៧ ខែវិច្ឆិកា ឆ្នាំ២០២០ បានយកគ្រឿងក្នុងរបស់ជ្រូកគប់ទៅលើសមាជិកសភាដទៃទៀត ខណៈសភាកំពុងតែពិភាក្សា ជុំវិញជម្លោះការនាំចូលសាច់ជ្រូក មកពីសហរដ្ឋអាមេរិក មានលាយសារធាតុ «រ៉ាក់តូផាមីន»។
បើតាមសារព័ត៌មាន Taiwan News បានផ្សាយថា សមាជិកសភា មកពីគណបក្សប្រឆាំងដ៏សំខាន់របស់កោះតៃវ៉ាន់ Kuomintang (KMT) បានគប់សាច់ជ្រូកទៅលើសមាជិកសភាដទៃទៀត នៅក្នុងសភា កាលពីថ្ងៃសុក្រ (២៧ វិច្ឆិកា) ខណៈពួកគេព្យាយាមបញ្ឈប់នាយករដ្ឋមន្រ្តីតៃវ៉ាន់ ថ្លែងទៅកាន់សភា ជុំវិញជម្លោះដ៏ជូរចត់មួយ ស្តីពីការបន្ធូរបន្ថយការនាំចូលសាច់ជ្រូក មកពីសហរដ្ឋអាមេរិក។
លោកស្រី សៃ អ៊ីងវ៉ឹន (Tsai Ing-wen) ប្រធានាធិបតីតៃវ៉ាន កាលពីខែសីហា កន្លងទៅ បានប្រកាសថា ចាប់ពីថ្ងៃទី១ ខែមករា ឆ្នាំ២០២១ រដ្ឋាភិបាលតៃវ៉ាន់ នឹងអនុញ្ញាតឲ្យនាំចូលផលិតផលសាច់ជ្រូកពីសហរដ្ឋអាមេរិក មានលាយសារធាតុ «Ractopamine» ដែលត្រូវបានហាមឃាត់ នៅក្នុងសហភាពអឺរ៉ុប (EU) និង នៅក្នុងប្រទេសចិន រួមជាមួយផលិតផលសាច់គោ នាំចូលមកពីអាមេរិក ដែលចាស់លើសពី៣០ខែ។
ការសម្រេចចិត្តនេះក៏ទទួលបានការស្វាគមន៍ ពីរដ្ឋាភិបាលទីក្រុងវ៉ាស៊ីនតោន ប៉ុន្ដែគណបក្សជាតិនិយមតៃវ៉ាន់ គូមីនតាង (Kuomintang) បានជំទាស់យ៉ាងដាច់អហង្ការ ដោយលើកឡើង អំពីការព្រួយបារម្ភពីសាធារណជន ជុំវិញសុវត្ថិភាពចំណីអាហារ។ ចាប់តាំងពីពាក់កណ្តាល ខែកញ្ញា ឆ្នាំ២០២០មក គណបក្ស Kuomintang (KTM) បានតវ៉ានៅក្នុងសភាតៃវ៉ាន់ តាមរយៈការរារាំងមិនឲ្យលោក ស៊ូ ត្សេងឆាង (Su Tseng-chang) នាយករដ្ឋមន្រ្តីតៃវ៉ាន់ អានរបាយការណ៍ ឬឆ្លើយសំណួរអ្វីឡើយ។ ដោយសារធុញទ្រនាន់នឹងការប្រឆាំងរបស់គណបក្ស KTM ខ្លាំងពេក ទើបគណបក្សកាន់អំណាច DPP បានប្តេជ្ញាថា ត្រូវធានាថា លោក Su នឹងអាចឡើងថ្លែងទៅកាន់សភា។
នៅក្នុងកិច្ចប្រជុំសភា នាថ្ងៃសុក្រ ទី២៧ ខែវិច្ឆិកា ក្រុមសមាជិកសភារបស់គណបក្ស DPP បានព្យាយាមប្រមូលផ្តុំគ្នា បង្កើតជារបាំងការពារ ខណៈលោកនាយករដ្ឋមន្រ្ដី ឡើងថ្លែងទៅកាន់សភាតៃវ៉ាន់។ ស្របពេលនោះ ក្រុមសមាជិកសភា នៃបក្ស KTM បានស្រែកចំអក និងផ្ដុំកញ្ចែយ៉ាងកងរំពង។ លុះពេលនាយករដ្ឋមន្រ្ដីកំពុងតែថ្លែង ស្រាប់តែក្រុមគណបក្ស KTM បានគប់គឿងក្នុងជ្រូក ហោះរំលងសមាជិកសភានានា និងធ្លាក់ពាសពេញក្នុងរដ្ឋសភា បង្កឲ្យមានការប្រតាយប្រតប់គ្នាយ៉ាងរញ៉េរញ៉ៃ រវាងសមាជិកសភាបក្សប្រឆាំង និងបក្សកាន់អំណាច។
ជាមួយគ្នានេះ គណបក្សកាន់អំណាច DPP របស់ដែនកោះតៃវ៉ាន់ បានថ្កោលទោសយ៉ាងខ្លាំង ចំពោះទង្វើរបស់គណបក្សប្រឆាំង KTM ។ ការប្រជុំសភារបស់កោះតៃវ៉ាន់ តែងមានការឈ្លោះប្រកែកគ្នាជាញឹកញាប់៕