រាជធានីបាងកក៖ ក្រោយពេលតម្លៃស្រូវនៅក្នុងប្រទេសថៃធ្លាក់ចុះយ៉ាងគំហុក នៅចន្លោះពី៦ទៅ៧បាត (លុយថៃ) ឬស្មើនឹង៧៩៨-៩៣១រៀលលុយខែ្មរ ក្នុង១គីឡូក្រាម នៅក្នុងសប្ដាហ៍នេះ រហូតធ្វើឲ្យប្រជាកសិករថៃត្អូញត្អែរអំពីការជំពាក់បំណុលវ័ណ្ឌកនោះមក ធនាគាររបស់ប្រទេសនេះ នឹងជួយប្រាក់ឧបត្ថម្ភដល់អ្នកធ្វើស្រែឲ្យមានក្ដីសង្ឃឹមឡើងវិញ។
ធនាគារកសិកម្ម និងសហករណ៍កសិកម្ម (BAAC) បានថ្លែង នៅថ្ងៃព្រហស្បតិ៍ ទី២៦ ខែវិច្ឆិកា ឆ្នាំ២០២០ថាកសិករដាំស្រូវ នឹងទទួលបានប្រាក់ឧបត្ថម្ភធន អប្បបរមា ចន្លោះពី៥០០បាត (១៦ដុល្លារ) ក្នុងទំហំដីមួយរ៉ៃ (ស្មើនឹង១៦០០ម៉ែត្រការ៉េ) និងអតិបរមា១០ ០០០បាត (លុយថៃ) ឬស្មើនឹង ៣២៩ដុល្លារ រហូតដល់ថ្ងៃទី១ ខែធ្នូ ឆ្នាំ២០២០។ រីឯវិធានការនេះ ត្រូវបានអនុម័ត ដោយគណៈរដ្ឋមន្រ្តី នៅក្នុងអំឡុងពេលកិច្ចប្រជុំ តាមអនឡាញ នៅភូកេត កាលពីថ្ងៃទី៣ ខែវិច្ឆិកា ឆ្នាំ២០២០។ ចំណែកកសិករធ្វើស្រូវជាង៤,៥លាននាក់ ក៏បានដាក់ពាក្យស្នើសុំប្រាក់ឧបត្ថម្ភនេះផងដែរ។
ធនាគារកសិកម្ម និងសហករណ៍កសិកម្ម (BAAC) បានបញ្ជាក់ថា បើតាមនាយកដ្ឋានផ្សព្វផ្សាយព័ត៌មានកសិកម្ម បានឲ្យដឹងថា ប្រជាកសិករថៃ ចំនួន ៤ ៥៦៧ ៥៨៦នាក់ ជាអ្នកធ្វើស្រូវ ដោយមានផ្ទៃដីទំហំ ៦០ ៨១៧ ៨៥០,៨៣រ៉ៃ (ស្មើនឹង៩ ៧៣០ ៨៥០ហិកតា)៕