រាជធានីបាងកក៖ លោក ប្រាយុទ្ធ ចាន់អូចា ថ្វីបើមុនពេលក្លាយជានាយករដ្ឋមន្រ្ដីថៃ លោកជាអ្នកដឹកនាំធ្វើរដ្ឋប្រហារយោធា ហើយបន្ដការកាន់អំណាចមកដល់ពេលនេះក្ដី ប៉ុន្ដែលោកនៅតែទទូច មិនអនុញ្ញាតឲ្យប្រើប្រាស់ច្បាប់អាជ្ញាសឹក ប្រឆាំងនឹងក្រុមបាតុករនោះឡើយ។
បើតាមសារព័ត៌មាន Bangkok Post បានផ្សាយ នៅថ្ងៃព្រហស្បតិ៍ ទី២៦ ខែវិច្ឆិកា ឆ្នាំ២០២០ថា នាយករដ្ឋមន្រ្ដីថៃ លោក ប្រាយុទ្ធ ចាន់អូចា (Prayut Chan-o-cha) បានថ្លែងដដែលៗ កាលពីថ្ងៃពុធថា ច្បាប់អាជ្ញាសឹកនឹងមិនត្រូវអនុញ្ញាតឲ្យប្រើប្រាស់ សម្រាប់បង្ក្រាបមកលើក្រុមអ្នកតវ៉ា ប្រឆាំងនឹងរដ្ឋាភិបាលនោះឡើយ។ រីឯវិធានការតាមធម្មតា ដែលមានស្រាប់ គឺវាគ្រប់គ្រាន់ណាស់ទៅហើយ សម្រាប់ដោះស្រាយជាមួយអ្នករំលោភបំពានលើច្បាប់។
ទោះជាយ៉ាងណា លោកឧត្ដមសេនីយ៍ Prayut បានបន្ថែមថា លោកមិនបានគិតដល់ការប្រើប្រាស់ច្បាប់អាជ្ញាសឹកនោះទេ ហើយច្បាប់ជាច្រើន នាពេលបច្ចុប្បន្ន មានគ្រប់គ្រាន់ណាស់ទៅហើយ សម្រាប់ការដោះស្រាយជាមួយនឹងក្រុមបាតុករ។ លោកនាយករដ្ឋមន្រ្ដី បានធ្វើអត្ថាធិប្បាយបែបនេះ ក្រោយពេលជំនួបជាមួយនឹងក្រុមប្រឹក្សាពាណិជ្ជកម្មអាមេរិក-អាស៊ាន នៅក្នុងក្រសួងការបរទេសថៃ។
លោកនាយករដ្ឋមន្រ្ដី បានបញ្ជាក់ថា លោកបានពន្យល់ អំពីការតវ៉ានេះ នៅក្នុងជំនួបនោះថា «សង្គមប្រជាធិបតេយ្យ ខ្ញុំមិនអាចជំរុញឲ្យមនុស្សគ្រប់គ្នា យល់ព្រមធ្វើអ្វីមួយតាមខ្ញុំនោះឡើយ។ សរុបសេចក្ដីមក អ្វីដែលខ្ញុំអាចធ្វើបាន គឺដើម្បីស្វែងរកច្រកណាមួយ ឆ្ពោះទៅរកការរួបរួមគ្នា ដើម្បីគេចឲ្យផុតអំពីបញ្ហានានា នៅពេលអនាគត»។
លោក Wissanu Krea-ngam ឧបនាយករដ្ឋមន្រ្ដីថៃ បានថ្លែងថា ការប្រមូលផ្ដុំគ្នា កាលពីថ្ងៃទី២៥ ខែវិច្ឆិកា ក៏មានលក្ខណៈស្រដៀងគ្នាទៅនឹងការតវ៉ា នាពេលកន្លងមកអ៊ីចឹងដែរ។ ប៉ុន្ដែក្នុងករណីបែបនេះ គេមិនអាចយកច្បាប់អាជ្ញាសឹកមកប្រើនោះឡើយ៕
