ភ្នំពេញ៖ កវីនិពន្ធ និងជាអ្នកដឹកនាំរឿងចាស់វស្សាដ៏ល្បីល្បាញក្នុងពិភពសិល្បៈ លោក សុខ ជំនោរ ដែលមហាជនទូទៅទទួលស្គាល់ពីទឹកដៃនិពន្ធនិងសមត្ថភាពក្នុងការដឹកនាំរឿងដ៏ប៉ិនប្រសប់ របស់លោក បានបោះជំហ៊ានថ្មីមួយទៀត ដោយលោកនិងក្រុមផលិតផ្ទាល់ខ្លួន ក្លាយជាក្រុម ផលិតនិងរៀបចំគម្រោងជាយុទ្ធសាស្ត្រ ក្នុងផលិតកម្មដាវីត្រា មេឌៀរ Davitra Mediaជាផលិតកម្មថ្មី និងជាផលិតកម្មមួយដែលលោកសុខ ជំនោរ ជឿជាក់ ពីព្រោះមាន ក្រុមការងារប្រកបដោយវិជ្ជាជីវៈ និងទេពកោសល្យខ្ពស់ ព្រមទាំងមានក្រុមបច្ចេកទេសដែល មានបទពិសោធន៍ និងជំនាញពិតប្រាកដក្នុងវិសយ័សិល្បៈចំរៀង និងភាពយន្ត។
ជាមួយនឹងការចាប់ផ្តើមដំបូងក្នុងផលិតកម្មដាវីត្រាលោកនឹងផ្តល់កាដូជូនអ្នកគាំទ្រនូវ MV ចម្រៀងពីរបទ គឺ «បទ ម្អមក្រៀម និងបទ កូនថៅកែស្នេហ៍បង» ដែលគ្រោងនឹង ចេញក្នុងពេលឆាប់ៗនេះ។
ដាវីត្រាជាផលិតកម្មថ្មីដែលមានសក្តានុពលខ្លាំងដោយបានកំពុងវិនិយោគសាងសង់ស្ទូឌីយោផ្ទាល់ខ្លួនលាតសន្ធឹងនៅលើផ្ទៃដី ៥ហិចតា ក្នុងស្រុកកៀនស្វាយ ខេត្តកណ្តាល ដើម្បីប្រើប្រាស់សម្រាប់ការផលិតបទចម្រៀង Original សម្តែង MV ថតកុន និងរៀបចំ កម្មវិធីប្រគុំ តន្ត្រីផ្ទាល់ខ្លួន សំដៅចូលរួមបម្រើចំណីអារម្មណ៍ និងចក្ខុរបស់ទស្សនិកជន។
នាពេលអនាគតយ៉ាងខ្លីផលិតកម្ម Davitra Media ក៏នឹងសហការជាមួយផលិតកម្ម នៃបណ្តាប្រទេស នានាក្នុងតំបន់អាស៊ីដើម្បីរួមគ្នាផលិតបទចម្រៀង និងថតខ្សែភាពយន្ត ដើម្បីជួយលើកតម្កើងអភិវឌ្ឍ វិស័យសិល្បៈកម្ពុជាផងដែរ ៕