ភ្នំពេញ៖ តាមរយៈសេចក្តីប្រកាសព័ត៌មានកាលពីថ្ងៃអាទិត្យទី១៥ខែវិច្ឆិកានេះ ក្រុមហ៊ុនណាហ្គាខបបានបង្ហាញពីគម្រោងអភិវឌ្ឍរមណីយដ្ឋានមួយកន្លែងក្នុងខេត្តសៀមរាប ដែលគិតជាទឹកប្រាក់ជាង៣៥០លាន ដុល្លារ។ គម្រោងនេះនឹងបង្កើតឲ្យមានជា សណ្ឋាគារ កន្លែងជិះក្តារលើទឹក សួនទឹកខ្នាតធំ សួនផ្កាបែបធម្មជាតិ ឧទ្យានបែបវប្បធម៌និងប្រវត្តិសាស្រ្ត និងទីក្រុង Siem Reap China Town ផងដែរ។
បន្ថែមលើនេះក្រុមហ៊ុនណាហ្គាខបបានគូសបញ្ជាក់ថា គម្រោងរមណីយដ្ឋានមួយនេះ និងមិនមានរាប់បញ្ចូលឡើយនូវសេវាកម្មល្បែងស៊ីសងគ្រប់ប្រភេទ។ បើតាមសេចក្តីប្រកាសព័ត៌មានដដែល រមណីយដ្ឋានដ៏ធំនេះគ្រោងនឹងសាងសង់ក្នុងទីតាំងមិនឆ្ងាយប៉ុន្មានពីឧទ្យានអង្គរឡើយ ក្នុងទំហំផ្ទៃដី ៧៥ហិកតា។
ចំពោះទីតាំងនេះផងដែរ រដ្ឋាភិបាលកម្ពុជាបានសម្រេចជួលឲ្យក្រុមហ៊ុនដែលមានមូលដ្ឋានក្នុងទឹកដីហុងកុងមួយនេះ ក្នុងរយៈពេល៥០ឆ្នាំគិតចាប់ពីឆ្នាំ២០២០ ដល់ ឆ្នាំ២០៧០ ក្នុងតម្លៃជួល ០,៦ដុល្លារ ក្នុងមួយម៉ែត្រការ៉េជារៀងរាល់ឆ្នាំ ហើយតម្លៃនេះនឹងកើនឡើង៥% នៅរាល់៥ឆ្នាំម្តង។
បើតាមការអះអាងរបស់ក្រុមហ៊ុន គម្រោងនេះនឹងជួយលើកកម្ពស់វិស័យទេសចរណ៍នៅកម្ពុជាឲ្យកាន់តែមានភាពប្រសើរឡើង ព្រមទាំងអាចទាក់ទាញភ្ញៀវទេសចរណ៍ជាតិនិងអន្តរជាតិមកទស្សនាខេត្តសៀមរាបផ្ទាល់តែម្តង។
ក្រុមហ៊ុនណាហ្គាខបបានឱ្យដឹងថា ការអភិវឌ្ឍន៍នេះនឹងបម្រើដល់គោលបំណងជាច្រើនដូចជា ការបង្កើនដំណើរទស្សនកិច្ចរបស់ភ្ញៀវទេសចរជាតិ អន្តរជាយិទៅកាន់ខេត្តសៀមរាប ស្របពេលណាហ្គាវើលអនុវត្តយុទ្ធសាស្ត្រ ធ្វើដំណើរថ្មីភ្ជាប់ខេត្តសៀមរាបនិងភ្នំពេញ។ ក្រុមហ៊ុននេះមានបំណងអនុវត្តយុទ្ធសាស្រ្ត ធ្វើការជាមួយភ្នាក់ងារទេសចរណ៍តាមអ៊ិនធឺរណែត និងភ្នាក់ងារទេសចរណ៍ប្រទេសចិន និងកន្លែងផ្សេងទៀត ដើម្បីផ្តល់ជូននូវដំណើរកម្សាន្ត ដោយផ្អែកលើមូលដ្ឋានពេញលេញ ក្នុងខេត្តសៀមរាប និងរាជធានីភ្នំពេញ៕