រាជធានីបាងកក៖ ចូលមកដល់រដូវប្រមូលផលស្រូវនេះ មុនដំបូងប្រជាកសិករថៃ មានសង្ឃឹមនៅក្នុងចិត្តយ៉ាងខ្លាំង ដោយសារឃើញស្រូវទទួលបានទិន្នផលខ្ពស់ ប៉ុន្ដែចុងក្រោយ បែរជាធ្វើឲ្យពួកគាត់ខកចិត្ដយ៉ាងខ្លាំង ដោយសារតម្លៃស្រូវបានធ្លាក់ចុះយ៉ាងគំហុក នៅចន្លោះពី៦ទៅ៧បាត (លុយថៃ ឬស្មើនឹង៧៩៨-៩៣១រៀលលុយខែ្មរ) ក្នុង១គីឡូក្រាម នៅក្នុងសប្ដាហ៍នេះ។
លោក Pee Wannasri ជាកសិករម្នាក់រស់នៅខេត្ត Kalasin ប្រទេសថៃ បានថ្លែងថា នៅពេលឃើញស្រូវផ្លែខ្លាំង និងផ្ដល់ទិន្នផលខ្ពស់ រូបគាត់ ក៏ដូចជាកសិករដទៃទៀត សង្ឃឹមថា ស្រូវនឹងមានតម្លៃថ្លៃ យ៉ាងហោចណាស់ ក៏ក្នុង១គីឡូក្រាម មានតម្លៃចន្លោះពី៩ទៅ១០បាត (ឬចន្លោះពី១០៨១ទៅ១៣៣១រៀលលុយខ្មែរ)ដែរ។ បើតម្លៃនេះ គាត់អាចចំណេញច្រើន ហើយអាចរកលុយ មកដោះបំណុលធនាគារ និងមានលុយសល់ខ្លះ សម្រាប់ទ្រទ្រង់ដល់ជីវភាពក្រុមគ្រួសាររបស់គាត់។
ប្រជាកសិករដដែល បានបញ្ជាក់ថា នៅឆ្នាំនេះ ដីទំហំ១រ៉ៃ (ស្មើនឹង១៦០០ម៉ែត្រការ៉េ ឬ០,១៦ហិកតា) ស្រូវឲ្យផល ចន្លោះពី៣០០-៤០០គីឡូក្រាម។ បើតាមអត្រាតម្លៃនេះ កសិករនឹងរកប្រាក់ចំណូលបាន ចន្លោះពី១៨០០-២៤០០បាត (លុយថៃ ឬស្មើនឹងចន្លោះពី ២៣៩ ៥៨៦-៣១៩ ៤៤៩រៀល) ក្នុងមួយ១រ៉ៃ (ដីទំហំ១៦០០ម៉ែត្រការ៉េ) បើធៀបនឹងតម្លៃពីមុន ចន្លោះពី ២ ១០០បាត ទៅ ២ ៨០០បាត (ឬស្មើនឹង ២៧៩ ៥១៧ទៅ៣៧២ ៦៩០រៀល) ក្នុង១រ៉ៃ។
ប្រជាកសិករថៃដដែល បានបន្ដថា ការធ្លាក់ចុះតម្លៃស្រូវបែបនេះ នឹងធ្វើឲ្យប្រជាកសិរថៃ ខាតបង់ខ្លាំងណាស់។ ពួកគាត់មិនបានសល់អ្វី ក្រៅតែពីបាតដៃទទេនោះឡើយ។ ដូច្នេះពួកគាត់មានតែអំពាវនាដល់រដ្ឋាភិបាលថៃ ឲ្យជួយធានាអំពីតម្លៃស្រូវនេះ។ បើមិនដូច្នេះទេ ពួកគាត់មិនអាចមានលទ្ធភាព រកប្រាក់សងបំណុលធនាគារនោះឡើយ៕
