រដ្ឋធានីតៃប៉ិ៖ យន្ដហោះយោធារបស់ចិន ចំនួន៣គ្រឿង បានហោះចូលទៅក្នុងដែនអាកាសរបស់តៃវ៉ាន់ ហើយកងទ័ពអាកាសរបស់ដែនកោះនេះ ក៏បានឆ្លើយតបភ្លាមៗ ចេញប្រតិបត្ដិការ និងបញ្ចេញនូវការព្រមាន ព្រមទាំងពង្រាយនូវប្រព័ន្ធមីស៊ីលជាច្រើនគ្រឿង បណ្ដេញយន្ដហោះបច្ចាមិត្តចេញពីដែនអាកាសរបស់ខ្លួន។
បើតាមសារព័ត៌មាន Taiwan News បានផ្សាយ កាលពីថ្ងៃទី១៩ ខែវិច្ឆិកា ឆ្នាំ២០០២ថា យន្ដហោះយោធារបស់ប្រទេសចិន បានហោះចូលក្នុងតំបន់ការពារដែនអាកាសរបស់តៃវ៉ាន់ (ADIZ) កាលពីថ្ងៃទី១៨ ខែវិច្ឆិកា ឆ្នាំ២០២០។ នេះជាការហោះហើរ រំលោភចូលដែនអាកាសរបស់កោះតៃវ៉ាន់ជាថ្មី ពីសំណាក់កងទ័ពចិន។ បើគិតចាប់តាំងពីថ្ងៃទី១-១៨ ខែវិច្ឆិកា ឆ្នាំ២០២០ កងទ័ពចិនបានបើកយន្ដហោះចម្បាំងជាច្រើនគ្រឿង ចូលមកលើដែនអាកាសរបស់កោះតៃវ៉ាន់ ចំនួ១៣លើក។
សារព័ត៌មានដែល បានបន្ដថា ក្រោយពេលមានហេតុការណ៍បែបនេះ កងទ័ពអាកាសរបស់តៃវ៉ាន់ បានបើកយន្ដហោះចម្បាំងរបស់ខ្លួន ចេញប្រតិបត្ដិការភ្លាមៗ បណ្ដេញយន្ដហោះរបស់ចិន ចេញពីដែនអាកាសរបស់ខ្លួន និងពង្រាយមីស៊ីលទំនើប សម្រាប់បើកការវាយប្រហារទៅលើយន្ដហោះចម្បាំងរបស់ចិន។ ប៉ុន្ដែនៅក្នុងឧបទ្ទវហេតុទាំងនោះ មិនមានការប្រឈមមុខដាក់គ្នា រហូតបង្កឲ្យមានគ្រោះថ្នាក់ដល់ភាគីណាមួយនោះឡើយ។
បើតាមក្រសួងការពារជាតិតៃវ៉ាន៉ (MND) បានឲ្យដឹងថា យន្ដហោះយោធាចំនួន៣គ្រឿងរបស់កងទ័ពអាកាសរំដោះប្រជាជនចិន (PLAAF) ដែលហោះចូលមកក្នុងដែនអាកាសរបស់តៃវ៉ាន់នោះ រួមមាន យន្ដហោះចម្បាំងប្រឆាំងនឹងនាវាមុជទឹក ប្រភេទ Shaanxi Y-8, យន្ដហោះចម្បាំងអេឡិកត្រូនិក ប្រភេទ Shaanxi Y-8 និងយន្ដហោះចម្បាំងអេឡិកត្រូនិក ប្រភេទ Shaanxi Y-9 ។ យន្ដហោះចម្បាំងទាំង៣គ្រឿងនេះ បានហោះចូលមកភាគនិរតី នៃដែនកោះតៃវ៉ាន់ (ADIZ)។
ក្រសួងការពារជាតិតៃវ៉ាន់ បានបញ្ជាក់ថា ជាការឆ្លើយតបវិញនោះ យន្ដហោះចម្បាំង ប្រភេទប្រដេញរបស់តៃវ៉ាន់ បានចេញប្រតិបត្ដិការ ដេញស្ទាក់យន្ដហោះរបស់ចិន ដោយបញ្ចេញការព្រមានតាមវិទ្យុ និងការពង្រាយប្រព័ន្ធមីស៊ីលការពារដែនអាកាស ដើម្បីតាមដានសកម្មភាពរបស់យន្ដហោះចិនទាំងនោះ។ សម្រាប់រយៈពេលជាង២ខែកន្លងមកនេះ ចិនបានបញ្ជូនយន្ដហោះចម្បាំង ប្រភេទ Shaanxi Y-8s ជាច្រើនគ្រឿង ចូលមកដែនអាកាស នាភាគនិរតី នៃកោះតៃវ៉ាន់។
ក្រសួងការពារជាតិតៃវ៉ាន់ បានបន្ថែមថា កាលពីថ្ងៃទី១៨ ខែតុលា ឆ្នាំ២០២០ រដ្ឋាភិបាលទីក្រុងប៉េកាំង បានបញ្ជូនយន្ដហោះចម្បាំង ចូលមកភាគពាយព្យ និង ភាគនិរតី នៃកោះតៃវ៉ាន់ ចំនួន១៨គ្រឿង។ យន្ដហោះចម្បាំងរបស់ចិនប៉េកាំងទាំងនោះ រួមមាន យន្ដហោះទម្លាក់គ្រាប់បែក ប្រភេទ H-6 យន្ដហោះ J-10 យន្ដហោះ J-11 និងយន្ដហោះប្រដេញ J-16 ។ យន្ដហោះចម្បាំង និងទម្លាក់គ្រាប់បែកទាំងនោះ ត្រូវបានគេបែងចែកជា៥ក្រុម សម្រាប់អនុវត្ដការហោះហើរ ចូលមកលើដែនអាកាសរបស់តៃវ៉ាន់។
ទោះជាយ៉ាងណា រហូតមកដល់ពេលនេះ រដ្ឋាភិបាលទីក្រុងប៉េកាំង នៅតែអះអាងថា កោះតៃវ៉ាន់ ស្ថិតក្នុងដែនអធិបតេយ្យភាពរបស់ខ្លួន ហើយចិនតែងតែគំរាមកំហែងថា ខ្លួននឹងវាយកម្ទេចដែនកោះមួយនេះ ប្រសិនបើប្រកាសឯករាជភាព ផ្ដាច់ចេញពីចិន។ ដោយសារមាន ផែនការ បែបនេះ ទើបរដ្ឋាភិបាលទីក្រុងប៉េកាំង តែងតែបញ្ជាឲ្យកងទ័ពអាកាស និងកងទ័ពជើងទឹក ហោះហើរ ហើយធ្វើនាវាចរណ៍នាវាចម្បាំង ចូលទៅ ក្នុងដែនអធិបតេយ្យភាពរបស់តៃវ៉ាន់ជាញឹកញាប់។
ដោយឡែក រដ្ឋាភិបាលទីក្រុងតៃប៉ិវិញ ក្រោយពេលមានការគំរាមកំហែងជាញឹកញាប់ពីសំណាក់ចិនប៉េកាំងនោះ តៃវ៉ាន់បានបង្កើនការទិញគ្រឿងសព្វាវុធទំនើបៗ មានតម្លៃរាប់សិបពាន់លានដុល្លារ ពីសហរដ្ឋអាមេរិក ទុកសម្រាប់យកមកធ្វើសង្រ្គាម ទប់ទល់នឹងការឈ្លានពានរបស់ចិន។ ជាមួយគ្នានេះ លោកស្រី សៃ អ៊ីងវ៉ិន ប្រធានាធិបតីកោះតៃវ៉ាន់ បានបញ្ជាក់ថា លោកស្រី ត្រូវតែការពារដែនកោះនេះឲ្យខាងតែបាន មិនឲ្យធ្លាក់ចូលទៅក្នុងកណ្ដាប់ដៃចិនប៉េកាំងនោះឡើយ បើទោះជាត្រូវចំណាយ ឬប្រើប្រាស់មធ្យោបាយបែបណាក៏ដោយ៕
