យល់ដឹង៖ ការជិតស្លាប់ដោយសារលង់ទឹក តម្រូវឱ្យមានការជួយសង្គ្រោះបន្ទាន់ មុននឹងបញ្ជូនទៅមន្ទីរពេទ្យដើម្បីជួយសង្គ្រោះបែបទំនើប។ នៅពេលលង់ទឹក ទឹកកម្រចូលទៅសួតក្នុងបរិមាណច្រើនណាស់ ពីព្រោះនៅពេលប៉ះនឹងវត្ថុរាវ ការកន្ត្រាក់បំពង់កកើតឡើងភ្លាម ហើយការកន្ត្រាក់ទាំងនេះនឹងបិទផ្លូវដង្ហើមពីមាត់ និងច្រមុះតែម្តង ។ ដូច្នេះ ថ្ងៃនេះ KBN សូមណែនាំពីវិធីសាស្ត្រសង្គ្រោះបឋមដល់អ្នកលង់ទឹកដូចខាងក្រោម៖
១-អាទិភាពដំបូងបំផុតនៅក្នុងការគ្រប់គ្រងជនរងគ្រោះលង់ទឹក គឺអ្នកជួយសង្គ្រោះគួរពិចារណាពីលទ្ធភាពនៃការកើតមានរបួសនៅត្រង់ឆ្អឹងខ្នងរបស់ជនរងគ្រោះ ប្រសិនបើទាក់ទងនឹងការគ្រោះថ្នាក់ដោយការលោត ឬមុជទឹករកអ្នករងគ្រោះដើម្បីស្រង់ចេញពីទឹក អ្នកសង្គ្រោះគួរប្រើក្តារបន្ទះរឹងជាជំនួយ ។
២-ដើម្បីជៀសវាងការមានបញ្ហាធ្ងន់ធ្ងរពីការខ្វះអុកស៊ីសែន យើងត្រូវនាំជនរងគ្រោះឱ្យបានលឿនមកខាងលើផ្ទៃទឹក ។ ទោះបីជាអ្នកលង់ទឹកមិនទាន់ត្រូវបានយកចេញពីផ្ទៃទឹកក៏ដោយ ក៏យើងត្រូវចាប់ផ្តើមបញ្ចូលខ្យល់សិប្បនិម្មិត និងកុំផ្តាច់ខ្យល់សិប្បនិម្មិតរហូតដល់អ្នកលង់ទឹកត្រូវបានយកមកដល់ច្រាំង ។
៣-នៅលើដីគោកអ្នកសង្គ្រោះអាចទាញត្រឡប់ជនរងគ្រោះទៅខាងឆ្វេងតែធ្វើយ៉ាងណាកុំឱ្យឆ្អឹងខ្នងមានចលនាខ្លាំងពេក ដើម្បីឱ្យទឹកកំអួតចេញពីផ្លូវដង្ហើមហូរមកក្រៅ ហើយប្រសិនបើនៅមានសំណល់កំអួតគួរតែអ្នកជួយសង្គ្រោះបឺតសម្អាតឱ្យអស់ពីផ្លូវដង្ហើមបានឆាប់រហ័ស និងចាប់ផ្តើមធ្វើការបញ្ចូលខ្យល់សិប្បនិម្មិតឡើងវិញរហូតដល់ដង្ហើមរបស់អ្នកលង់ទឹកដំណើរការឡើងវិញ ។
៤-ប្រសិនបើជនរងគ្រោះគ្មានជីពចរទេ ការធ្វើចលនាបេះដូង និងសួតត្រូវចាប់ផ្តើមភ្លាមៗ។ ការធ្វើចលនាបេះដូង និងសួតក្នុងពេលពីរ-បីនាទីដំបូង ក្រោយពីការគាំងបេះដូងគឺជាការព្យាករមួយយ៉ាងសំខាន់នៃការរស់រានមានជីវិតរបស់អ្នកលង់ទឹក។ ប្រសិនបើការប៉ោងក្រពះប៉ះពាល់ដល់ការបញ្ចូលខ្យល់សិប្បនិម្មិត អ្នកសង្គ្រោះគួរតែដាក់ជនរងគ្រោះឱ្យដេកផ្អៀងទៅខាងឆ្វេង ហើយគួរបន្តវិធានការ ជួយសង្គ្រោះនៅពេលដែលអ្នកលង់ទឹកត្រូវបានដឹកទៅកាន់មន្ទីរពេទ្យដែលពួកគេអាចទទួលបានការជួយសង្គ្រោះជីវិតបែបទំនើបពេញលេញ។
ប្រភព៖ បងពេទ្យចិត្តល្អ
