រាជធានីបាងកក៖ បុរសម្នាក់ បានផ្ដាំផ្ញើបងប្អូន និងមិត្តភក្ដិថា បើគាត់ស្លាប់ សូមសាច់ញាតិកុំយំ ប៉ុន្ដែត្រូវរាំលេងឲ្យសប្បាយ លុះពេលគាត់ស្លាប់ បងប្អូនបានជួលក្រុមស្រីស្អាតរាំ Coyote មករាំ ដើម្បីបំពេញតាមបំណងរបស់សព។ ហេតុការណ៍បុណ្យសពដ៏ចម្លែក និងគួរឲ្យចង់សើចនេះ បានកើតឡើង កាលពីថ្ងៃទី២៩ ខែតុលា ឆ្នាំ២០២០ នៅក្នុងខេត្ត Suphanburi ។
បើតាមសារព័ត៌មានថៃ The Nation បានផ្សាយ នៅថ្ងៃទី៣០ ខែតុលា ថា ពិធីបុណ្យសព ក្លាយទៅជារឿងកំប្លែងនេះ បានកើតឡើង នៅក្នុងខេត្ត Suphanburi ។ រីឯការជួលក្រុមរាំ Coyote មករាំ នៅក្នុងពិធីបុណ្យសពនេះ ធ្វើឡើង តាមបំណងរបស់សព។
បើតាមមិត្តភក្ដិរបស់ជនរងគ្រោះ បានឲ្យដឹងថា ជនរងគ្រោះ ឈ្មោះ Kritsana Wongkasem ហើយគាត់ចូលចិត្ដដើរលេងជាមួយមិត្ដភក្ដិស្រីៗ ជាពិសេស ក្រុមនារីរាំសិចស៊ី Coyote ។ គាត់បានផ្ដាំថា ប្រសិនបើថ្ងៃណាមួយ គាត់ស្លាប់ គាត់ចង់ឲ្យពួកគេរាំ នៅក្នុងពិធីបុណ្យសពរបស់គាត់។ លុះក្រោយមក គាត់បានជួបនឹងគ្រោះថ្នាក់ចរាចរណ៍ ស្លាប់ នៅតាមដងផ្លូវ ទើបក្រុមគ្រួសារសម្រេច យកក្រុមរាំសិចស៊ីមករាំ នៅក្នុងពិធីបុណ្យសពរបស់គាត់។
បើតាមម្ដាយរបស់ជនរងគ្រោះ បានឲ្យដឹងថា បើកូនបានផ្ដាំយ៉ាងនេះទៅហើយ មានតែធ្វើយ៉ាងហ្នឹងទៅ ហើយមិត្តភក្តិរបស់គេ ក៏នឹងធ្វើអ្វីៗ ដើម្បីសេចក្ដីសុខសប្បាយផងដែរ៕