រាជធានីបាងកក៖ ដោយសារតែក្រុមបាតុករនៅតែបន្ដធ្វើបាតុកម្មទាមទារឲ្យលោកនាយករដ្ឋមន្រ្ដី ប្រាយុទ្ធ ចាន់អូចា ចុះចេញពីតំណែង នាំឲ្យប្រទេសថៃ ធ្លាក់ចូលក្នុងវិបត្ដិនយោបាយ ទើបធ្វើឲ្យវិស័យឯកជន ព្រួយបារម្ភ អំពីផលប៉ះពាល់ដល់សេដ្ឋកិច្ច។
សភាពាណិជ្ជកម្មថៃ បានថ្លែង កាលពីថ្ងៃទី២៨ ខែតុលា ឆ្នាំ២០២០ថា វិស័យឯកជន បានសម្ដែង ពីការព្រួយបារម្ភថា ការធ្វើបាតុកម្ម ដែលចេះតែកើនឡើង ជាបន្ដបន្ទាប់ នាពេលនេះ អាចនឹងជះឥទ្ធិពលអវិជ្ជមានដល់សេដ្ឋកិច្ច នៅក្នុងប្រទេសថៃ។
លោក Kalin Sarasin ប្រធានសភាពាណិជ្ជកម្មថៃ បានថ្លែងថា វិនិយោគិនបរទេស បានលៃលក បោះទុនវិនិយោគ នៅក្នុងប្រទេសថៃ។ ប៉ុន្ដែពួកគេ អាចនឹងផ្លាស់ប្ដូរគំនិតវិញ ប្រសិនបើភាពវឹកវរនយោបាយ នៅតែមិនអាចដោះស្រាយបាន នាពេលឆាប់ៗនេះ។
ប្រធានសភាពាណិជ្ជកម្មថៃ បានបញ្ជាក់ថា ក្នុងរយៈពេល៤ខែមកនេះ ភាពតានតឹង រវាងរដ្ឋាភិបាល និងក្រុមបាតុករ ដឹកនាំដោយក្រុមនិស្សិត បានពុះកញ្ជ្រោលឡើង ជាពិសេស ក្នុងរយៈពេល២សប្ដាហ៍មកនេះ ក្រោយពេលប៉ូលិស បានប្រើប្រាស់រថយន្ដបាញ់ទឹក បំបែកហ្វូងបាតុករ និងចាប់ខ្លួនសកម្មជន នៃការតវ៉ានេះ។ ដោយសារតែភាពវឹកវរខាងនយោបាយ នៅក្នុងប្រទេសថៃ នាពេលនេះ ទើបធ្វើឲ្យវិស័យឯកជន មានការព្រួយបារម្ព អំពីផលប៉ះពាល់ដល់សេដ្ឋកិច្ច។ ទន្ទឹមនឹងនេះដែរ វិស័យឯកជន ក៏ចង់ឃើញភាគីទាំងអស់ នៅក្នុងជម្លោះនេះ ជួបចរចាគ្នា ដើម្បីបញ្ចប់នូវភាពវឹកវរនេះ ដោយសន្ដិវិធី។
ដោយឡែក លោក ប្រាយុទ្ធ ចាន់អូនចា ( Prayut Chan-o-cha) នាយករដ្ឋមន្រ្ដីថៃ បានថ្លែងថា គណៈរដ្ឋមន្រ្ដីរបស់លោក បានយល់ព្រមបង្កើតនូវគណៈកម្មាធិការផ្សះផ្សាជាតិមួយ ដើម្បីស្វែងរកដំណោះស្រាយ បញ្ចប់នូវវិបត្ដិនេះ។ គណៈកម្មាធិការមួយនេះ នឹងត្រូវតែងតាំង ដោយសភា ហើយសមាសភាពនឹងមានទាំងតំណាងមកពីគណបក្សផ្សេងៗ សមាជិកព្រឹទ្ធសភា តំណាងរាស្រ្ដ និងសកម្មជនគាំទ្រលទ្ធិប្រជាធិបតេយ្យផងដែរ។
លោក Thanavat Phonvichai ប្រធានមជ្ឈមណ្ឌលសេដ្ឋកិច្ច និងពាណិជ្ជកម្មរបស់សាកលវិទ្យាល័យសភាពាណិជ្ជកម្មថៃ (UTCC) បានថ្លែងថា មជ្ឈមណ្ឌល UTCC បានព្យាករថា នៅឆ្នាំក្រោយ កំណើនសេដ្ឋកិច្ចរបស់ប្រទេសថៃ នឹងកើនឡើង ចន្លោះពី៣,៥-៤,៥ ។ ទោះជាយ៉ាងណា មជ្ឈមណ្ឌលនេះ នៅតែរក្សាការព្យាកររបស់ខ្លួន ចំពោះកំណើនសេដ្ឋកិច្ច នៅក្នុងឆ្នាំនេះ ចន្លោះពី -៧,៥ ទៅ-៨,៥ ភាគរយ។
ជាមួយគ្នានេះ បើតាមការស្ទង់មតិ កាលពីពេលថ្មីៗនេះ ធ្វើឡើង ដោយសាកលវិទ្យាល័យខាងលើ ស្តីពីប្រតិបត្តិករ មានទំនុកចិត្តលើអាជីវកម្ម គឺភាគច្រើន នៃអ្នកឆ្លើយសំណួរ៣០០នាក់ បាននិយាយថា កត្តាចម្បង ជះឥទ្ធិពលដល់ប្រតិបត្តិការរបស់ពួកគេ ដោយសារការផ្ទុះឡើង នៃកូវីដ-១៩ បន្ទាប់ពីមានការធ្លាក់ចុះ ភ្ញៀវទេសចរបរទេស និងភាពមិនច្បាស់ខាងនយោបាយ ហើយកង្វះសាច់ប្រាក់។
ដោយឡែកប្រតិបត្ដិករ ប្រហែល ២៨,៣៣ភាគរយ បាននិយាយថា ពួកគេប្រឈមនឹងហានិភ័យខ្ពស់ នៅក្នុងការបិទទ្វារអាជីវកម្ម។ រីឯ៣៨,៣៦ ភាគរយ និយាយថា ពួកគេប្រឈមនឹងហានិភ័យមធ្យម ក្នុងការបិទទ្វារ ខណៈ ៤,៣៦ ភាគរយ និយាយថា ពួកគេមិនមានហានិភ័យនោះទេ៕
