រដ្ឋធានីតៃប៉ិ៖ យន្ដហោះចម្បាំងរបស់កងទ័ពអាកាសកោះតៃវ៉ាន់ បានចេញប្រតិបត្ដិការ ហោះហើរ ហ្វឹក ហ្វឺន បង្កើនសមត្ថកិច្ចភាពរបស់ខ្លួន ប៉ុន្ដែយន្ដហោះចម្បាំងមួយគ្រឿង បានជួបនឹងគ្រោះថ្នាក់ដ៏អាក្រក់មួយ ធ្លាក់ចូលទៅក្នុងសមុទ្រ នាភាគខាងកើត ដែនកោះតៃវ៉ាន់ បណ្ដាលឲ្យអាកាសយានិកម្នាក់ស្លាប់ បើទោះជាគាត់ខំប្រឹងចុចឆត្រយោងក៏ដោយ។ ហេតុការណ៍ដ៏អាក្រក់នេះ បានកើតឡើង កាលពីថ្ងៃព្រហស្បតិ៍ ទី២៩ ខែតុលា ឆ្នាំ២០២០។
បើតាមសារព័ត៌មានសិង្ហបុរី CNA បានចេញផ្សាយ កាលពីរសៀល ថ្ងៃព្រហស្បតិ៍ ទី២៩ ខែតុលាថា ការធ្លាក់យន្ដចម្បាំងរបស់កងទ័ពអាកាសតៃវ៉ាន់ បានបណ្ដាលឲ្យអាកាសយានិកម្នាក់ ឈ្មោះ ជូ ក្វាង (Chu Kuang) អាយុ២៩ឆ្នាំ ស្លាប់ ។ នៅក្នុងហេតុការណ៍នោះ អាកាសយានិកបានចុចឆត្រយោង លោតចេញពីយន្តហោះចម្បាំង F-5E ដែរ ប៉ុន្ដែគាត់នៅតែមិនអាចរក្សាជីវិតរបស់គាត់ ដោយសារតែយន្តហោះចម្បាំងនោះ ធ្លាក់ចូលទៅក្នុងទឹកសមុទ្រ។
បើតាមបណ្ដាញផ្សព្វផ្សាយរបស់តៃវ៉ាន់ បានឲ្យដឹងថា យន្ដហោះចម្បាំងជួបនឹងគ្រោះថ្នាក់នោះ បានកើតឡើង ខណៈកំពុងហ្វឹកហ្វឺន។ កងទ័ពអាកាសកោះតៃវ៉ាន់ នាពេលបច្ចុប្បន្ននេះ បានបង្កើនសកម្មភាពហោះហើរហ្វឹកហ្វឺន និងល្បាតនៅលើដែនអាកាសរបស់ខ្លួន កើនឡើងទ្វេដង បើធៀបនឹងឆ្នាំ២០១៩។ ការបង្កើនសកម្មភាពហ្វឹកហ្វឺរបស់កងទ័ពអាកាសកោះតៃវ៉ាន់ បានកើតឡើង ក្រោយពេលមានការគំរាមកំហែងពីសំណាក់រដ្ឋាភិបាលចិន។ ដោយឡែក យន្តហោះចម្បាំង F-5E ដែលទើបធ្លាក់នោះ ជាប្រភេទយន្តហោះស៊េរីចាស់ ត្រូវបានអភិវឌ្ឍឡើងជាលើកដំបូង នាអំឡុងទសវត្សរ៍ ១៩៦០៕