រដ្ឋាភិបាលឡាវ បានព្យាករណ៍ថា សេដ្ឋកិច្ចរបស់ប្រទេសនេះនឹងកើនឡើង ៣,៣ ភាគរយនៅក្នុងឆ្នាំ២០២០ទោះបីមានការធ្លាក់ចុះនៃជម្ងឺកូវិត-19ក៏ដោយ។ នាយករដ្ឋមន្រ្តីឡាវ លោក ThonglounSisoulith បានបញ្ជាក់ពីការព្យាករណ៍នេះ នៅពេលថ្លែង ទៅកាន់ពិធីបើក សម័យប្រជុំលើកទី ១០ នីតិកាលទី ៨ នៃរដ្ឋសភា។
លោកបានគូសបញ្ជាក់ពីការ លំបាកផ្នែកសេដ្ឋកិច្ចរបស់ប្រទេស និងការកើនឡើងនូវ បន្ទុកបំណុលដែលកាន់តែធ្ងន់ធ្ងរទៅ ៗ ដោយវិបត្ដិជម្ងឺកូវិត-19 ហើយថ្មីៗនេះប្រទេសត្រូវបាន ឡោមព័ទ្ធទៅដោយទឹកជំនន់ ។ សារព័ត៌មានប្រចាំថ្ងៃរបស់កាសែត Vientiane Times បានដកស្រង់សំដីរបស់លោកនាយករដ្ឋមន្ត្រីថា យើងរងការលំបាកផ្នែកសេដ្ឋកិច្ច អស់រយៈពេល ជាច្រើនឆ្នាំមកហើយ។ លើសពីនេះទៅ ទៀតជួបបញ្ហាអាកាសធាតុ និងការរីករាល ដាលនៃជំងឺកូវិត – ១៩ កំពុងប៉ះពាល់យ៉ាងធ្ងន់ ធ្ងរដល់ការអភិវឌ្ឍសេដ្ឋកិច្ចសង្គម។
ជាមួយនឹងជំងឺរាតត្បាតបានដាក់បន្ទុកកាន់តែខ្លាំង ទៅលើសមត្ថភាពសេវាបំណុលរបស់ ប្រទេសឡាវ រដ្ឋាភិបាលបានបង្កើតផែនការរយៈ ពេលខ្លី មធ្យម និងវែង ដើម្បីដោះស្រាយបំណុលនិងកាតព្វកិច្ចរបស់ខ្លួនដោយព្យាយាម កាត់បន្ថយឱនភាពសារពើពន្ធជារៀងរាល់ឆ្នាំ។លោក Thongloun បានទទួលស្គាល់ថា សេដ្ឋកិច្ច របស់ប្រទេសនេះ ងាយរងគ្រោះដោយសារវិបត្តិ សេដ្ឋកិច្ចពិភពលោក និងការប្រែប្រួល អាកាសធាតុ ប៉ុន្តែលោកមានសុទិដ្ឋិនិយមថាកំណើនសេដ្ឋកិច្ចនឹងខ្ពស់ជាងអត្រាកំណើន ពិភពលោក។
វិស័យកសិកម្មនៅប្រទេសឡាវ ត្រូវបានគេរំពឹងថានឹងកើនឡើង ២,៣ ភាគរយ នៅឆ្នាំនេះ ដែលបង្ហាញចំនួន ១៦,៦ ភាគរយ នៃផលិតផលក្នុងស្រុកសរុប GDP របស់ខ្លួន។ វិស័យឧស្សាហកម្មត្រូវបានគេព្យាករណ៍ ថានឹងកើនឡើង ៩,៨ ភាគរយ ដែលស្មើនឹង ៣៣ ភាគរយនៃផលិតផលក្នុងស្រុកសរុប។ ប៉ុន្តែកំណើនក្នុងវិស័យសេវាកម្មត្រូវបានរំពឹងថា នឹងធ្លាក់ចុះ ១,៦ ភាគរយ ស្មើនឹង ៣៩,៥ ភាគរយនៃផលិតផលក្នុងស្រុកសរុប GDP។
លោកនាយករដ្ឋមន្រ្តីឡាវ និយាយថាទោះបីផល ប៉ះពាល់នៃការរាលដាល នៃរោគរាតត្បាត លើវិស័យសេដ្ឋកិច្ចដែលអាចនឹងបន្តរហូតដល់ឆ្នាំក្រោយក៏ដោយ ក៏រដ្ឋាភិបាលមាន សុទិដ្ឋិ និយមថា សេដ្ឋកិច្ចនឹងងើបឡើងវិញ ក្នុងកម្រិតខ្លះ ដោយសារតែការស្ថាបនា គម្រោង អភិវឌ្ឍន៍ទ្រង់ទ្រាយធំមិនមានការរំខាន។ លោកនិយាយថា គម្រោងទាំងនេះរួមមានផ្លូវ អយស្ម័យានឡាវ – ចិន, ផ្លូវល្បឿនលឿនវៀងច័ន្ទ – វ៉ាងវៀង, ការកសាងសួនឧស្សាហកម្ម និងផែស្ងួត រួមទាំងគម្រោងវារីអគ្គិសនី និងរ៉ែ ដែលផ្នែកទាំង អស់ នឹងជួយជំរុញ កំណើនសេដ្ឋកិច្ច។
