រដ្ឋធានីអាតែន៖ នាវាកងទ័ពក្រិកមួយគ្រឿង បានជួបនឹងឧបទ្ទវហេតុដ៏អាក្រក់ ត្រូវកប៉ាល់ដឹកទំនិញមួយគ្រឿង មានដោតទង់ជាតិប្រទេសអេស្ប៉ាញ បើកបុក បណ្ដាលឲ្យដាច់ខ្លួនជា២កំណាត់។ ហេតុការណ៍ដ៏រន្ធត់នេះ បានកើតឡើង កាលពីវេលាម៉ោង៧ និង៣០នាទីព្រឹក ថ្ងៃទី២៧ ខែតុលា ឆ្នាំ២០២០ នៅជិតកំពង់ផែ Piraeus ប្រទេសក្រិក។
មន្រ្ដីកងទ័ពជើងទឹកក្រិក បានឲ្យដឹងថា ហេតុការណ៍ប៉ះទង្គិចនេះ បានកើតឡើង កាលពី វេលាម៉ោង៧ និង៣០នាទីព្រឹក ថ្ងៃទី២៧ ខែតុលា នៅតំបន់សមុទ្រ Saronic ជិតកំពង់ផែ Piraeus។ នាវាដែលជួបនឹងឧបទ្ទវហេតុខាងលើនេះ រួមមាន នាវាដឹកទំនិញ ឈ្មោះ Launcheston មានដោតទង់ជាតិអេស្ប៉ាញ និងនាវាដោះមីនរបស់កងទ័ពជើងទឹកប្រទេសក្រិក ឈ្មោះ HS Kallisto ។
កងទ័ពជើងទឹកប្រទេសក្រិក បានបញ្ជាក់ថា បើតាមការពិនិត្យមើល នាវាដឹកទំនិញ Launcheston បានបុកនាវាដោះមីនរបស់កងទ័ពជើងទឹកក្រិក ខណៈកំពុងចាកចេញពីកំពង់ផែ Piraeus ។ នៅក្នុងហេតុការណ៍នោះ បានបណ្ដាលឲ្យនាវារបស់កងទ័ពជើងទឹកក្រិក ដាច់ជា២កំណាត់។ ដោយឡែក នាវិកចំនួន២៧នាក់ នៅលើនាវា HS Kallisto សំណាងល្អ បានគេចផុតពីគ្រោះថ្នាក់ ដោយគ្រាន់តែមានមនុស្ស២នាក់រងរបួសស្រាលតែប៉ុណ្ណោះ។
ក្រោយពេលកើតហេតុ កងទ័ពជើងទឹកក្រិកបានបញ្ជូនកប៉ាល់ផ្សេង មកអូសនាវារងគ្រោះនោះ ទៅកាន់កំពង់ផែវិញ។ ទោះជាយ៉ាងណា ករណីនេះ មន្រ្ដីជំនាញក្រិក កំពុងតែស៊ើបអង្កេត អំពីឧបទ្ទវហេតុ ដែលនាំឲ្យគ្រោះថ្នាក់បែបនេះកើតឡើង៕
