រាជធានីបាងកក៖ បុគ្គលិកកាស៊ីណូ ជនជាតិចិន ចំនួន៣នាក់ បានឆ្លងដែន ចេញពីប្រទេសភូមា ចូលមកកាន់ប្រទេសថៃ ដោយខុសច្បាប់ ក៏ត្រូវអាជ្ញាធរថៃ ឃាត់ខ្លួន និងដកហូតបានលុយ ចំនួន៨លានបាត (លុយថៃ) ឬស្មើនឹងជិត២៦ម៉ឺនដុល្លារអាមេរិក។
ប៉ូលិសថៃ បានឲ្យដឹងថា ជនជាតិចិនទាំង៣នាក់ខាងលើនេះ គឺប្រុសម្នាក់ និងស្រី២នាក់ ហើយពួកគេជាបុគ្គលិកកាស៊ីណូ។ ប៉ុន្ដែការឃាត់ខ្លួននេះ ក៏ដោយសារតែពួកគេបានចេញពីទីក្រុង Myawaddy របស់ប្រទេសមីយ៉ាន់ម៉ា (ភូមា) ចូលក្នុងទឹកដីថៃ ដោយខុសច្បាប់។
ប៉ូលិសថៃ បានបញ្ជាក់ថា មុនពេលឃាត់ខ្លួនោះ អ្នកស្រុកជាជនជាតិថៃ បានរាយការណ៍មកប៉ូលិសថា មានជនបរទេសចំនួន៣នាក់ គឺស្រី២នាក់ និងបុរសម្នាក់ ចូលមកក្នុងស្រុក Mae Sot នាភាគខាងជើង ខេត្ដ Tak ប្រទេសថៃ។ ប៉ុន្ដែដោយសារប្រទេសមីយ៉ាន់ម៉ាន់ មានការរីករាលដាល នៃកូវីដ-១៩ខ្លាំង ប៉ូលិសថៃបានបង្កើនការយាមល្បាត នៅតាមព្រំដែនរបស់ខ្លួន ហាមឃាត់អ្នកចេញពីប្រទេសភូមា ចូលមកលើទឹកដីថៃ។
ប៉ូលិសថៃ បានបន្ថែមថា បន្ទាប់ពីមានសេចក្ដីរាយការណ៍បែបនេះ ប៉ូលិស បានទៅកាន់ចំណុចខាងលើ ក៏ឃើញជនជាតិចិនចំនួន៣នាក់ ដូចអ្វីដែលបានរាយការណ៍ពិតប្រាកដមែន។ ពួកគេបានឆ្លងទន្លេ Moei ដែលពុះចេញទឹកដី Myawaddy របស់ភូមា និងស្រុក Mae Sot របស់ថៃ ដោយមានការជួយ ពីជនជាតិភូមាផងដែរ។ រីឯជនជាតិចិនទាំងនេះ មានគោលបំណងគេច ចេញពីប្រទេសភូមា ជាទីដែលកំពុងមានការរីករាតត្បាតខ្លាំង ពីកូវីដ-១៩ ។ ក្រៅពីឃាត់ខ្លួននោះ ប៉ូលិសបានឆែកឆេក រកឃើញមានលុយ រហូតដល់៨លានបាត (លុយថៃ) ឬស្មើនឹង ២៥៥ ៤៦៩ដុល្លារអាមេរិក។
ក្រោយពេលឃាត់ខ្លួនរួចមក សមត្ថកិច្ចថៃ បាននាំខ្លួនជនជាតិចិនទាំង៣នាក់ និងវត្ថុតាង ទៅកាន់ស្ថានីយ៍ប៉ូលិស ដើម្បីសាកសួរបន្ថែម និងចាត់ការតាមច្បាប់៕