រដ្ឋធានីហាណូយ៖ ក្នុងរយៈពេលប៉ុន្មានថ្ងៃកន្លងមកនេះ គ្រោះទឹកជំនន់ បានវាយប្រហារយ៉ាងខ្លាំងមកលើប្រទេសវៀតណាម ហើយរហូតមកដល់ពេលនេះ ចំនួនអ្នកស្លាប់ បានកើនឡើងដល់ ១០៥នាក់ និង បាត់ខ្លួន២៧នាក់ ហើយវាបានបំផ្លាញសេដ្ឋកិច្ចរបស់ប្រទេសនេះ អស់ជាង២០០លានដុល្លារអាមេរិក។
អាជ្ញាធរគ្រប់គ្រងគ្រោះមហន្តរាយវៀតណាម បានចេញរបាយការណ៍ កាលពីថ្ងៃទី២០ ខែតុលា ឆ្នាំ២០២០ថា ចាប់តាំងពីដើមខែតុលា មក គ្រោះធម្មជាតិ រួមមាន គ្រោះទឹកជំនន់, ការរអិលបាក់ដី និងគ្រោះថ្នាក់ផ្សេងៗទៀត បានសម្លាប់ពលរដ្ឋវៀតណាម យ៉ាងហោចណាស់ ១០៥នាក់ និងមនុស្សចំនួន២៧នាក់ទៀត កំពុងបាត់ខ្លួន។ ជនរងគ្រោះទាំងនោះ ភាគច្រើន រស់នៅតំបន់ខ្ពង់រាប និងភាគកណ្តាល នៃប្រទេសវៀតណាម។
អាជ្ញាធរវៀតណាម បានបញ្ជាក់ថា ជនរងគ្រោះទាំងនោះ ភាគច្រើន នៅតាមខេត្តភាគកណ្តាល រួមមាន ខេត្ត Quang Tri, ខេត្ត Thua Thien-Hue និងខេត្ត Quang Nam។ រីឯគ្រោះធម្មជាតិធំៗទាំងនោះ រួមមាន គ្រោះរអិលបាក់ដី កាលពីថ្ងៃទី១៣ ខែតុលា បានសម្លាប់មន្ត្រី និងកងទ័ព សរុបចំនួន១៣នាក់ នៅក្នុងរោងចក្រវារីអគ្គិសនីមួយកន្លែង ស្ថិតក្នុងខេត្ត Thua Thien Hu ខណៈក្រុមសង្គ្រោះកំពុងបន្ដរុករកកម្មករបាត់ខ្លួន។ ស្របគ្នានោះដែរ គ្រោះរអិលបាក់ដីមួយកន្លែងទៀត បានកើតឡើង កាលពីថ្ងៃអាទិត្យ ទី១៨ ខែតុលាបានសម្លាប់ទាហានយ៉ាងហោច២២នាក់ នៅក្នុងខេត្ត Quang Tri ។
អាជ្ញាធរវៀតណាម បានបន្ដថា នៅក្នុងហេតុការណ៍គ្រោះទឹកជំនន់នោះ អាជ្ញាធរបានជម្លៀសប្រជាជនជាង ៥២១០០គ្រួសារ នៅតាមតំបន់នានា រួមមានខេត្ត Nghe An, ខេត្តHa Tinh, ខេត្ត Quang Binh និង ខេត្ត Quang Tri ។ រីឯផ្ទះជាង ១៧៧ ៩០០ខ្នង នៅក្នុងខេត្តទាំងនេះ ត្រូវបានទឹកជន់លិច។ ចំណែកផ្ទៃដីដំណាំប្រមាណ ជាង ២៣៣ ៨០០ហិកតា ត្រូវបានទឹកជំនន់បំផ្លិចបំផ្លាញ ហើយសត្វពាហនៈជាង ៦៩១ ១០០ក្បាលបានងាប់។ ស្របគ្នានេះ សាលារៀនជាច្រើនកន្លែង ត្រូវបិទទ្វារ។ ដោយឡែកផលប៉ពាល់ នៃសេដ្ឋកិច្ចទៅលើប្រទេសវៀតណាម ដោយសារគ្រោះទឹកជំនន់នេះ អាចនឹងបំផ្លាញអស់យ៉ាងតិចជាង២០០លានដុល្លារអាមេរិក៕
