រាជធានីបាងកក៖ បុរសម្នាក់កំពុងតែបើករថយន្ដយ៉ាងលឿន ស្រាប់តែដំរីមួយហ្វូង មានចំនួន២០ក្បាល រត់ឆ្លងផ្លូវ ធ្វើឲ្យអ្នកបើកបរជាន់ហ្វ្រាំងមិនទាន់ ជ្រុលទៅបុកដំរីនោះ បណ្ដាលឲ្យរថយន្ដខ្ទេចមុខ និងដំរីរងរបួស ហើយរត់ចូលព្រៃបាត់ កាលពីវេលាម៉ោង៩ព្រឹក ថ្ងៃទី១៩ ខែតុលា ឆ្នាំ២០២០ នៅក្នុងស្រុក Ban Bueng , ខេត្ត Chonburi ប្រទេសថៃ។
បើតាមបណ្ដាញផ្សព្វផ្សាយថៃ (Thai Residents) បានផ្សាយ នៅថ្ងៃទី២០ ខែតុលា ថា អ្នកបររថយន្ដ នៅក្នុងហេតុការណ៍នោះ ឈ្មោះ Duangknam ភេទប្រុស អាយុ៣៤ឆ្នាំ រស់នៅក្នុងខេត្ដឈុនប៊ូរី។ គាត់បានបើករថយន្ដបុកហ្វូងដំរី ដែលរត់ឆ្លងផ្លូវ បណ្ដាលឲ្យរថយន្ដរបស់គាត់ ខូចខាតផ្នែកខាងមុខ។ ដោយឡែក ដំរីបានរងរបួស ហើយពួកវាបានរត់ចូលព្រៃបាត់អស់ទៅ។ រីឯអ្នករួមដំណើរម្នាក់បានរងរបួស ប៉ុន្ដែអ្នកបើកបរ មិនបានរងរបួសនោះឡើយ។
បើតាមសម្ដីរបស់អ្នកបើកបររថយន្ដ បានឲ្យដឹងថា មុនពេលកើតហេតុ គាត់បានបើករថយន្ដតាមធម្មតា។ លុះពេលគាត់បើករថយន្ដមកដល់ចំណុចកើតហេតុ ស្រាប់តែដំរីមួយហ្វូង មានចំនួន២០ក្បាល បានរត់កាត់ពីមុខ ក៏ជ្រុលទៅបុក បណ្ដាលឲ្យដំរីរងរបួស ហើយវាបានរត់ចូលទៅក្នុងព្រៃបាត់អស់។ ដោយឡែក រថយន្ដបានរងការខូចខាតផ្នែកខាងមុខ ហើយអ្នករួមដំណើរម្នាក់បានរងរបួស និងត្រូវបញ្ជូនទៅព្យាបាលរបួស នៅក្នុងមន្ទីរពេទ្យ។
ក្រោយពេលកើតហេតុ មេភូមិ Bo Thong និងអាជ្ញាធរពាក់ព័ន្ធ បានចុះមកពិនិត្យ និងសាកសួរអ្នកបើករថយន្ដខាងលើ ហើយអាជ្ញាធរបានណែនាំឲ្យមានការប្រុងប្រយ័ត្ន ពេលបើករថយន្ដ ចូលទៅក្នុងតំបន់ព្រៃ ព្រោះមានដំរីច្រើនណាស់។ រីឯអាជ្ញាធរពាក់ព័ន្ធ បានបញ្ជូនមន្រ្ដីរបស់ខ្លួន ទៅជួយគ្រប់គ្រងហ្វូងដំរីព្រៃទាំងនោះផងដែរ៕