រដ្ឋធានីហាណូយ៖ ក្រោយពេលឈានជើងមកដល់ប្រទេសវៀតណាមភ្លាម នាយករដ្ឋមន្រ្ដីថ្មីរបស់ជប៉ុន កាលពីថ្ងៃទី១៩ ខែតុលា ឆ្នាំ២០២០ បានចរចាគ្នា ស្ដីអំពីអំពីការពង្រឹងសន្ដិសុខ នៅក្នុងតំបន់ និងការបង្កើនចំណងទំនាក់ទំនងពាណិជ្ជកម្ម រវាងប្រទេសជប៉ុន និងវៀតណាម។
លោក Suga Yoshihide នាយករដ្ឋមន្រ្ដីជប៉ុន និងសមភាគីវៀតណាម លោក Nguyen Xuan Phuc បានជួបចរចាគ្នា នៅក្នុងការិយាល័យរបស់នាយករដ្ឋមន្រ្ដីវៀតណាម នាទីក្រុងហាណូយ។ នាយករដ្ឋមន្រ្ដីជប៉ុន បានជ្រើសរើសយកប្រទេសវៀតណាម នៅក្នុងដំណើរទស្សនកិច្ចរបស់លោក ជាលើកដំបូង នៅឯនាយសមុទ្រ ហើយលោកបានអញ្ជើញមកដល់ប្រទេសនេះ កាលពីថ្ងៃទី១៨ ខែតុលា ម្សិលមិញ។
បើតាមគម្រោងនេះ នាយករដ្ឋមន្រ្ដីជប៉ុន នឹងថ្លែងអំពីគោលនយោបាយរបស់ជប៉ុន សម្រាប់ប្រជាជាតិអាស៊ាន ខណៈវៀតណាម នឹងធ្វើជាប្រធាន នៃកិច្ចប្រជុំកំពូលអាស៊ាន នៅខែក្រោយនេះ។ នៅក្នុងជំនួបជាមួយនឹងនាយករដ្ឋមន្រ្ដីវៀតណាមនោះ លោក Suga បានបញ្ជាក់ឡើងវិញ អំពីគោលជំហរ នៃកិច្ចសហប្រតិបត្ដិការរបស់ជប៉ុន ជាមួយនឹងវៀតណាម ក្នុងការបង្កើតតំបន់ Indo-Pacific សេរី និងចំហ ដោយផ្អែកលើបទដ្ឋាន នៃច្បាប់។ ជាមួយគ្នានេះ មេដឹកនាំទាំងបានបង្កើនទំនាក់ទំនងពាណិជ្ជកម្ម រវាងប្រទេសទាំង២ផងដែរ។
បើតាមអ្នកវិភាគ បានលើកឡើងថា លោក Suga នាយករដ្ឋមន្រ្ដីជប៉ុន បានថ្លែងបែបនេះ ចំពេលចិនកំពុងតែបង្កើនសកម្មភាពយោធា នៅក្នុងសមុទ្រចិនខាងត្បូង។ នេះជាសញ្ញាមួយ បង្ហាញថា ជប៉ុនប្រឆាំងដាច់ខាត ចំពោះឥទ្ធិពលរបស់ចិន នៅក្នុងដែនសមុទ្រនេះ។ នាយករដ្ឋមន្រ្ដីជប៉ុន មានគោលបំណងដ៏សំខាន់ក្នុងការបង្កើនកិច្ចសហប្រតិបត្ដិការសន្ដិសុខជាមួយនឹងប្រទេសវៀតណាម។ ក្រៅពីនេះ មេដឹកនាំទាំង២បានពិភាក្សាគ្នា លើកិច្ចព្រមព្រៀង បញ្ជូនសម្ភារការពារជាតិទៅឲ្យប្រទេសវៀតណាម និងកិច្ចសហប្រតិបត្ដិការខាងបច្ចេកទេសថែមទៀតផង៕