រាជធានីបាងកក៖ រហូតមកដល់ពេលនេះ ស្ថានការណ៍នយោបាយ នៅក្នុងប្រទេសថៃ កាន់តែ ឡើង កម្ដៅ ហើយនាយករដ្ឋមន្រ្ដីថៃ នៅតែព្យាយាមសម្របសម្រួលជាមួយនឹងក្រុមបាតុករ ខណៈពួកគេ នៅតែទាមទារឲ្យលោកចុះចេញពីតំណែង និងកំណែទម្រង់របបរាជានិយម។
លោក ប្រាយុត ចាន់អូចា (Prayut Chan-o-cha) នាយករដ្ឋមន្រ្តីថៃ កំពុងតែព្យាយាម និយាយ ទន់ភ្លន់ ដើម្បីបន្ទន់ចិត្តក្រុមបាតុករ ដែលអំពាវនាវឱ្យលោកចុះចេញពីតំណែង ខណៈបាតុកម្មប្រឆាំងនឹងរដ្ឋាភិបាលរបស់លោក កំពុងតែរាលដាលពេញប្រទេស។ វិធីសាស្រ្តថ្មី មានលក្ខណៈផ្សះផ្សាច្រើនជាងនេះ ផ្ទុយពីការប្រកាសថ្មីរបស់លោកថា លោកគ្មានចេតនាលាឈប់ពីតំណែង។ ប៉ុន្ដែកាលពីថ្ងៃទី១៥ ខែតុលា ឆ្នាំ២០២០ លោកបានចេញបទបញ្ជាមួយ ដាក់ប្រទេស ក្នុងគ្រាអាសន្ន ដើម្បីទប់ស្កាត់ការឆ្លងរាលដាល់កូវីដ-១៩ ដែលជាលេស សម្រាប់ជំរុញឲ្យសមត្ថកិច្ចបង្រ្កាបទៅលើក្រុមបាតុករ។
បើតាសារព័ត៌មាន Bangkok Post បានដកស្រង់សម្តីរបស់អ្នកនាំពាក្យរដ្ឋាភិបាល គឺលោក Anucha Burapachaisri បានមានប្រសាសន៍ថា រដ្ឋបាលរបស់លោកនាយករដ្ឋមន្រ្ដី មានឆន្ទៈស្តាប់នូវបញ្ហាដែលកំពុងកើតឡើង ដើម្បីពិភាក្សា និងស្វែងរកដំណោះស្រាយ។ រដ្ឋាភិបាលមានឆន្ទៈស្តាប់រាល់បញ្ហារបស់មនុស្សគ្រប់គ្នា ហើយបន្តដោះស្រាយបញ្ហាគ្រប់ផ្នែកទាំងអស់។
ក្នុងពេលរយៈពេលជាច្រើនខែមកនេះ សកម្មភាពនយោបាយរបស់យុវជនថៃ កំពុងតែកើតឡើង ហើយវាមានលក្ខណៈផ្ទុយស្រឡះពីការតវ៉ា នាពេលអតីតកាល។ រីឯក្រុមអ្នកចូលរួម មិនមែនជាក្រុមអាវក្រហម ឬអាវលឿងឡើយ ដោយពួកគេមិនបានផ្សារភ្ជាប់នឹងភាគីនយោបាយអតីតកាល ហើយពួកគេជាមនុស្សថ្មី និងទាមរទារឲ្យមានការការទម្រង់ប្រព័ន្ធនយោបាយ និងអំណាចរបស់ប្រមុខរដ្ឋរបស់ប្រទេសថៃ។
ដោយឡែក គោលបំណងដ៏សំខាន់របស់ក្រុមបាតុករ រួមមាន ទាមទារឲ្យលោក ប្រាយុត ចាន់អូចា (Prayut Chan-o-cha) នាយករដ្ឋមន្រ្ដីថៃ ចុះចេញពីតំណែង, រំលាយសភា និងការបង្កើតរដ្ឋធម្មនុញ្ញថ្មី ជំនួសរដ្ឋធម្មនុញ្ញ ឆ្នាំ២០១៧ ដែលបង្កើតឡើង ក្រោយរដ្ឋប្រហារយោធា ហើយដកសិទ្ធិអំណាចពីព្រះមហាក្សត្រ ដែលត្រូវបានរដ្ឋាភិបាលបច្ចុប្បន្នគាំទ្រ។
ការបង្ហាញ១០ ចំណុចរបស់អ្នកតវ៉ា បានគូសបញ្ជាក់ពីការទាមទាររបស់ពួកគេ ប្រឆាំងនឹងរដ្ឋាភិបាលបច្ចុប្បន្ន ហើយទាមទារឲ្យប្រជាធិបតេយ្យពិតប្រាកដមួយ។ លោក ប្រាយុទ្ធ ចាន់អូចា បានបន្ដកាន់តំណែងជានាយករដ្ឋមន្រ្ដីថៃ ក្រោយការធ្វើរដ្ឋប្រហារយោធា នៅក្នុងឆ្នាំ២០១៤។ មេដឹកនាំរដ្ឋប្រហារ គឺលោកឧត្តមសេនីយ៍ ប្រាយុទ្ធ ចានអូចា នាពេលនេះក្លាយជានាយករដ្ឋមន្ត្រី ដែលត្រូវបានបោះឆ្នោតជ្រើសរើស ដោយសំឡេងភាគច្រើន នៃសមាជិកសភា ក្រោមការតាក់តែងឡើង ដោយក្រុមមេដឹកនាំរដ្ឋប្រហារយោធាថៃ។
ទោះជាយ៉ាងណា រដ្ឋាភិបាលថៃ បច្ចុប្បន្ននៅមិនមានជម្រើសណាមួយ និងធ្វើតាមការទាមទាររបស់ក្រុមអ្នកតវ៉ានៅឡើយ។ រីឯវរដ្ឋាភិបាលក៏នឹងមិនប្រគល់អំណាចទៅឲ្យបក្សប្រឆាំងដទៃទៀតដែរ ថ្វីបើកាលពីខែកន្លងមុន មានការទាមទារឲ្យធ្វើវិសោធនកម្មរដ្ឋធម្មនុញ្ញក្ដី។ ចំណែកការវិវឌ្ឍស្ថានការណ៍នយោបាយយ៉ាងណានោះ ក៏គេមិនទាន់អាចទស្សន៍ទាយបានជាមុនដែរ ព្រោះកាលពីថ្មីៗនេះ លោកនាយករដ្ឋមន្រ្ដីបានបដិសេធ លាលែងពីតំណែង។ ប៉ុន្ដែក្រុមបាតុករ នៅបន្ដទាមទារឲ្យលោកចុះចេញពីតំណែង និងធ្វើកំណែទម្រង់របបរាជានិយម នៅក្នុងប្រទេសថៃ។
ស្ថានការណ៍នយោបាយនៅក្នុងប្រទេសថៃ បានបង្ហាញនូវភាពសាហាវឃោរឃៅ ក្នុងរយៈពេល៥ទសវត្សរ៍កន្លងមកនេះ ដោយមានរដ្ឋប្រហាររាប់មិនអស់ ហើយក្នុងរយៈពេលអស្ថិរភាពនយោបាយ ការបង្ក្រាបដោយហិង្សាទៅលើក្រុមប្រឆាំងនឹងរដ្ឋធម្មនុញ្ញ ឆ្នាំ២០១៧ រឹតតែធ្វើឲ្យស្ថានភាពអាចបន្តទៅមុខបាន ដោយមិនអាចគ្រប់គ្រង និងមានតុល្យភាពក្នុងប្រព័ន្ធសភានាសម័យទំនើបបានឡើយ៕
