រាជធានីភ្នំពេញ៖ បុរសម្នាក់បានដេកផ្កាប់មុខ ស្លាប់នៅលើផ្លូវដែក ហើយ ត្រូវប្រជាពលរដ្ឋប្រទះឃើញ បង្ក ឲ្យភ្ញាក់ផ្អើលឡើង កាលពីវេលា ម៉ោង១១ និង១០នាទីយប់ ថ្ងៃទី១៧ ខែតុលា ឆ្នាំ២០២០ នៅតាមផ្លូវដែក ខាងក្រោយប៉ុស្តិ៍នគរបាលរដ្ឋបាលកាកាបទី២ មានចម្ងាយប្រហែល១០០ម៉ែត្រ ស្ថិតក្នុងសង្កាត់កាកាបទី២ ខណ្ឌពោធិ៍សែនជ័យ។
ប្រភពព័ត៌មានពីកន្លែងកើតហេតុ បានឱ្យដឹងថា កាលពីវេលាខាងលើ ប្រជាពលរដ្ឋបានធ្វើដំណើរ ឆ្លងកាត់ចំណុចខាងលើ ស្រាប់តែប្រទះឃើញបុរសម្នាក់ដេកផ្កាប់មុខ នៅលើផ្លូវដែក ដោយមានកង់១គ្រឿង នៅក្បែរនោះផង។ ភ្លាមៗនោះ ពួកគាត់បានរាយការណ៍ជូនទៅសមត្ថកិច្ច។ បន្ទាប់មកសមត្ថកិច្ចមូលដ្ឋាន និងមន្រ្ដីជំនាញបានចុះមកដល់កន្លែងកើតហេតុ និងពិនិត្យមើល រកឃើញមានបំណែកជ័របាក់បែក បន្សល់ទុកនៅទីនោះ ចំនួន៣ទៅ៤បំណែក។ រីឯកង់របស់ជនរងគ្រោះ គឹកង់ខាងក្រោយ វៀចខូចខាតយ៉ាងដំណំ ទើបសមត្ថកិច្ចសន្និដ្ឋានជាបឋមថា នេះអាចជាករណីគ្រោះថ្នាក់ចរាចរណ៍ ត្រូវរថយន្តបង្កបើកបុក ហើយបើកគេចបាត់។
ទោះជាយ៉ាងណា សមត្ថកិច្ចក៏នៅមិនទាន់ស្គាល់អត្ដសញ្ញាណរបស់ជនរងគ្រោះ នៅឡើយដែរ ហើយសមត្ថកិច្ចកំពុងតែស្រាវជ្រាវ ស្វែងរកសាច់ញាតិ មកទទួលយកទៅធ្វើបុណ្យ តាមប្រពៃណី៕