រាជធានីភ្នំពេញ៖ រហូតមកដល់ពេលនេះ ប្រជាពលរដ្ឋរស់នៅខណ្ឌដង្កោ កំពុងរងគ្រោះ ដោយសារជំនន់ទឹកភ្លៀង តែពលរដ្ឋមួយគ្រួសារ បែរជាត្រូវរងសម្ពាធកាន់តែធ្ងន់បន្ថែមទៀត ត្រូវភ្លើងឆេះផ្ទះអស់។ ហេតុការណ៍គ្រោះអគ្គិភ័យនេះ បានកើតឡើង កាលពីវេលាម៉ោង៥ និង៤០នាទីព្រឹកព្រលឹម ថ្ងៃទី១៨ ខែតុលា ឆ្នាំ២០២០ នៅតាមផ្លូវលេខ១០៤ ស្ថិតក្នុងភូមិវាលថ្លាន់ សង្កាត់គងនយ ខណ្ឌដង្កោ។
ប្រជាពលរដ្ឋរស់នៅភូមិវាលថ្លាន់ បានឲ្យដឹងថា នៅក្នុងភូមិសាស្រ្ដនេះ ទឹកជំនន់មិនទាន់បានស្រកស្រួលបួលទេ។ ប៉ុន្ដែអ្វីដែលគួរឲ្យអាសូរដល់ប្រជាពលរដ្ឋមួយគ្រួសារខាងលើនេះ កំពុងតែរងទុក្ខនឹងទឹកជំនន់ផង ស្រាប់តែពីព្រឹកម្សិញ ភ្លើងបានឆេះផ្ទះរបស់ពួកគាត់យ៉ាងសន្ធោសន្ធៅឡើង ហើយទ្រព្យសម្បត្ដិនៅក្នុងនោះក៏ត្រូវបានបំផ្លាញអស់។ នេះមិនខុសពីពាក្យចាស់លោកពោលថា «ទុក្ខជាន់លើទុក្ខ» នោះឡើយ។
មន្រ្ដីការិយាល័យបង្ការ និងពន្លត់អគ្គិសនីរាជធានី បានឲ្យដឹងថា ម្ចាស់ផ្ទះជនរងគ្រោះ ឈ្មោះ ព្រឹល ស៊ីដេត ភេទប្រុស អាយុ៣៩ឆ្នាំ ជនជាតិខ្មែរ មានមុខរបរលក់នំប៉័ង (រុញតាមរទេះ)។ រីឯផ្ទះដែលត្រូវអគ្គីលេបត្របាក់អស់នោះ មានបណ្ដោយ៨ម៉ែត្រ និងទទឹង៦ម៉ែត្រ ធ្វើពីឈើលើ និងថ្មក្រោម។
មន្រ្ដីនគរបាលដដែល បានបញ្ជាក់ថា ក្រៅពីបំផ្លាញអស់ផ្ទះទាំងមូលនោះ គ្រោះអគ្គិភ័យនេះ បានលេបត្របាក់ទ្រព្យសម្បត្ដិជាច្រើនទៀត នៅក្នុងនោះ រួមមាន ម៉ូតូ១គ្រឿង, លុយខ្មែរ១លានរៀល, អាមេរិក ចំនួន ២០០ដុល្លារ។ ដោយឡែក នៅក្នុងអន្ដរាគមន៍នោះ សមត្ថកិច្ចបានប្រើប្រាស់រថយន្ដមួយគ្រឿងរបស់ការិយាល័យបង្ការ និងពន្លត់អគ្គិភ័យរាជធានីភ្នំពេញ ដោយប្រើអស់ទឹកចំនួន១ស៊ីទែន ទើបអាចគ្រប់គ្រងស្ថានការណ៍បានទាំងស្រុង មិនបង្កឲ្យមានគ្រោះថ្នាក់ ឬឆ្លងរាលដាលដល់ផ្ទះរបស់អ្នកជិតខាង ហើយធ្វើឲ្យភ្លើងរលត់អស់ទៅវិញ កាលពីវេលាម៉ោង៧ព្រឹក ថ្ងៃដដែល។
ទោះជាយ៉ាងណា បើតាមសមត្ថកិច្ច បានបញ្ជាក់ថា គ្រោះអគ្គិភ័យនេះ បណ្ដាលមកពីការដុតភ្លើងទៀនទុកចោល។ រីឯទំហំ នៃការខូចខាតទាំងស្រុង ក៏សមត្ថកិច្ចមិនទាន់គណនាដែរ។ ប៉ុន្ដែនៅក្នុងហេតុការណ៍នោះ មិនបានបង្កឲ្យមានគ្រោះថ្នាក់ដល់មនុស្សណាម្នាក់នោះឡើយ៕
